1 E moni, ua faapea ona fetalai mai le Alii: O le a oo mai, o tagata taitoatasi e lafoai ana agasala ma sau ia te a’u, ma valaau mai i lo’u igoa, ma usiusitai i lo’u leo, ma tausi i a’u poloaiga, o le a vaai i o’u mata ma iloa o i ai a’u;

2 Ma o A’u o le malamalama moni ua faamalamalama ai tagata uma e o mai i le lalolagi;

3 Ma ua Ou i ai i totonu o le Tamā, ma le Tamā i totonu ia te a’u, ma o le Tamā ma A’u ua tasi—

4 O le Tamā ona ua ia tuuina mai ia te a’u lona atoatoaga, ma o le Atalii ona sa Ou i ai i le lalolagi ma fai i la le tino lo’u fale apitaga, ma mau ai i totonu o atalii o tagata.

5 Sa Ou i ai i le lalolagi ma maua mai lo’u Tamā, ma o ana galuega sa manino ona faaalia mai.

6 Ma sa vaai ma molimau Ioane i le atoatoaga o lo’u mamalu, ma o le a faaalia i se taimi o mulimuli mai le atoatoaga o le talafaamaumau a Ioane.

7 Ma sa molimau mai o ia, fai mai: Sa ou vaai i lona mamalu, sa i ai o ia i le amataga, ae le’i i ai le lalolagi;

8 O le mea lea, sa i ai i le amataga le Lokou, ona o ia o le Lokou, le avefeau lava lea o le faaolataga—

9 O le malamalama ma le Togiola lea o le lalolagi; o le Agaga o le upumoni, o lē na afio mai i le lalolagi, ona o le lalolagi na faia e ia, ma sa i totonu ia te ia le ola o tagata ma le malamalama o tagata.

10 O ia na faia lalolagi; o ia na faia tagata; o ia na faia mea uma, ma ala mai ia te ia, ma mai ia te ia.

11 Ma o a’u, o Ioane, ou te molimau sa ou vaai i lona mamalu, o le mamalu lea o le Toatasi na Fanaua e le Tamā, ua tumu i le alofa tunoa ma le upumoni, le Agaga lava lea o le upumoni, lea na afio mai ma mau i la le tino, ma mau i totonu o i tatou.

12 Ma o a’u, o Ioane, sa ou vaai, sa le’i maua e ia le atoatoaga i le amataga, ae sa maua e ia le alofa tunoa mo le alofa tunoa;

13 Ma sa le’i maua e ia le atoatoaga i le amataga, ae sa faaauau pea mai lea alofa tunoa i lea alofa tunoa, seia oo ina maua e ia le atoatoaga;

14 Ma sa faapea ona ta’ua ai o ia o le Atalii o le Atua, ona sa le’i maua e ia le atoatoaga i le amataga.

15 Ma o a’u, o Ioane, ou te molimau atu, ma faauta, sa avanoa le lagi, ma sa afio ifo le Agaga Paia i ona luga e peiseai o se lupe, ma afio i ona luga, ma sa oo mai se siufofoga mai le lagi ua fetalai mai: O lo’u Atalii pele lenei.

16 Ma o a’u, o Ioane, ou te molimau atu, sa maua e ia se atoatoaga o le mamalu o le Tamā;

17 Ma sa maua e ia le mana uma, i le lagi ma i le lalolagi, ma sa faatasi ma ia le mamalu o le Tamā, ona sa afio o ia i totonu o ia.

18 Ma o le a oo mai, afai tou te faamaoni, o le a outou maua le atoatoaga o le talafaamaumau a Ioane.

19 Ou te tuu atu ia te outou nei upu, ina ia outou malamalama ma iloa ai le ala e tapuai ai, ma iloa ai le mea tou te tapuai i ai, ina ia mafai ona outou o mai i le Tamā i lo’u igoa, ma maua lona atoatoaga i le taimi e tatau ai.

20 Aua afai tou te tausi i a’u poloaiga, o le a outou maua lona atoatoaga, ma faamamaluina ia te a’u e pei o a’u i le Tamā; o lea, Ou te fai atu ia te outou, o le a outou maua le alofa tunoa mo le alofa tunoa.

21 Ma o lenei, e moni Ou te fai atu ia te outou, sa Ou i ai i le amataga faatasi ma le Tamā, ma o A’u o le Ulumatua na Fanaua;

22 Ma o i latou uma o e e fananauina e ala mai ia te a’u ua faatofutofusia i le mamalu o lea lava e tasi, ma o le ekalesia a le Ulumatua na Fanaua.

23 Sa outou i ai foi i le amataga faatasi ma le Tamā; o lena o le Agaga, o le Agaga lava lea o le upumoni;

24 Ma o le upumoni o le iloa lea o mea e pei ona i ai, ma e pei ona sa i ai, ma e pei ona o le a oo mai;

25 Ma o soo se mea lava e tele atu pe itiiti ifo nai lo lenei, o le agaga lea o lena amioleaga e toatasi, o lē o se pepelo mai le amataga.

26 O le Agaga o le upumoni ua mai le Atua. O A’u o le Agaga o le upumoni, ma sa molimau Ioane e uiga ia te a’u, fai mai: Sa maua e ia se atoatoaga o le upumoni, ioe, upumoni uma lava;

27 Ma e leai se tagata na te mauaina se atoatoaga vagana ai ua tausi e ia ana poloaiga.

28 O ia o lē e tausia ana poloaiga, e maua e ia le upumoni ma le malamalama, seia oo ina faamamaluina o ia i le upumoni ma iloa e ia mea uma.

29 Sa i ai foi le tagata i le amataga faatasi ma le Atua. O le atamai, po o le malamalama o le upumoni, sa le’i foafoaina pe na gaosia, pe mafai moni lava ona foafoaina pe gaosia.

30 O upumoni uma lava ua tu lē faalagolago i le tulaga ua tuu i ai e le Atua, e gaoioi mo ia lava, e pei foi o atamai uma; a na lē faapea, ua leai se olaga.

31 Faauta, o le faitalia lenei a le tagata, ma o le ta’usalaga lenei o le tagata; ona ua manino ona faaali atu ia te i latou o lena mea sa i ai mai le amataga, ae ua latou lē taliaina le malamalama.

32 Ma o tagata uma o e e lē talia e o latou agaga le malamalama, ua saisaitia e le ta’usalaga.

33 Auā o le tagata o le agaga. O elemene ua faavavau, ma o le agaga ma le elemene, ua soofaatasi e lē matuu’eseeseina, e mauaina se atoatoaga o le olioli;

34 Ma a tuu’eseese, e lē mafai e le tagata ona maua se atoatoaga o le olioli.

35 O elemene o fale apitaga a le Atua; ioe, o le tagata o le fale apitaga o le Atua, o ni malumalu lava; ma o soo se malumalu e faaleagaina, o lena malumalu o le a faaumatiaina e le Atua.

36 O le mamalu o le Atua o le atamai lea, pe faapea, o le malamalama ma le upumoni.

37 O le malamalama ma le upumoni e lafoa’i i lena toatasi leaga.

38 O agaga uma o tagata sa mamā i le amataga; ma ona ua togiolaina e le Atua le tagata mai le pa’ū, o lea na toe mamā ai tagata, i lo latou tulaga tamameamea, i luma o le Atua.

39 Ma ona sau lea o le amioleaga e toatasi lena, ma aveese mai le fanauga a tagata le malamalama ma le upumoni, e ala i le lē usiusitai, ma ona o le uputuu a o latou tamā.

40 Ae ua Ou poloaiina outou ia tausi a’e a outou fanau i le malamalama ma le upumoni.

41 Peitai e moni Ou te fai atu ia te oe, la’u auauna, o Frederick G. Williams, ua e i ai pea i lalo o lenei tausalaga;

42 E te le’i a’oa’o atua lau fanau i le malamalama ma le upumoni, e tusa ma poloaiga; ma ua i ai pea i lena amioleaga e toatasi le mana, i luga o oe, ma o le pogai lea o lou puapuagatia.

43 Ma o lenei Ou te tuu atu ia te oe se poloaiga—afai e te manao ia laveaiina oe, ia e faatulaga tatau lou lava fale, ona e tele mea ua lē sa’o i lou fale.

44 E moni, Ou te fai atu i la’u auauna o Sini Rikitone, e i ai ni isi mea e lei tausia ai e ia poloaiga e faatatau i lana fanau; o lea, ia muamua ona faatulaga tatau lou fale.

45 E moni, Ou te fai atu i la’u auauna o Iosefa Samita, Le Itiiti, po o i ni isi upu, o le a Ou ta’ua outou o ni uo, ona o outou o a’u uo, ma o le a outou maua se tofi faatasi ma a’u—

46 Sa Ou ta’ua outou o auauna ona o le lalolagi, ma o outou o a latou auauna mo a’u—

47 Ma o lenei, e moni Ou te fai atu ia Iosefa Samita, Le Itiiti—E te le’i tausia poloaiga, ma ua ao ai ona e tulai a’oa’iina i luma o le Alii;

48 E ao ina salamo lou aiga ma lafoai ni isi o mea, ma gauai atili mai ma le filiga i a’u upu, po o le a aveesea i latou mai lo latou tulaga.

49 O le mea Ou te fai atu ai i le toatasi Ou te fai atu ai i tagata uma; ia tatalo e lē aunoa ne’i maua e le leaga e toatasi lena le mana i totonu o outou, ma aveese outou i fafo mai lo outou tulaga.

50 O la’u auauna foi o Newel K. Whitney, o se epikopo o la’u ekalesia, ua manaomia foi ona a’oa’iina, ma faatulaga tatau lona aiga, ma vaai ia latou filiga atili ma popole i le aiga, ma tatalo e lē aunoa, po o le a aveesea i latou mai lo latou tulaga.

51 O lenei, Ou te fai atu ia te outou, a’u uo, ia tuu atu i la’u auauna o Sini Rikitone e alu lana malaga, ma ia faia faavave, ma tala’i atu foi le tausaga talileleia o le Alii, ma le talalelei o le faaolataga, e pei o le a Ou tuu atu ai ia te ia le manavaga; ma o le a Ou lagolagoina o ia e ala i la outou tatalo i le faatuatua ma le autasi.

52 Ma ia tuu atu i a’u auauna o Iosefa Samita, Le Itiiti, ma Frederick G. Williams, e fai faavave atu foi, ma o le a tuu atu ia te i la’ua e tusa lava ma le tatalo o le faatuatua; ma e tusa ai ma lo outou tausia o a’u upu o le a lē mafai ona faafememea’iina outou i le lalolagi lenei, po o le lalolagi a sau.

53 Ma, e moni Ou te fai atu ia te outou, o lo’u loto ia faataalise ona outou faaliliu o a’u tusitusiga paia, ma maua se malamalama o talafaasolopito, ma atunuu, ma malo, o tulafono a le Atua ma tagata, ma nei mea uma mo le faaolataga o Siona. Amene.