1 Em̧ool, āindein Irooj ej ba: Enaaj ālikin men kein bwe jabdewōt armej eo ej eļļo̧k jān jero̧wiwi ko an im itok n̄an Eō, im kūr ioon Eta, im pokake Ainikiō, im kōjparok kien ko Aō, enaaj lo turun Meja im jeļā bwe N̄aij mour;

2 Im bwe N̄aij meram eo em̧ool eo ej kōmeram aolep armej ro rej itok ilo laļ in;

3 Im bwe N̄aij ilo Jema, im Jema ilo N̄a, im Jema im N̄a kōmij juon—

4 Jema kōnke Eaar letok n̄an Eō tarlep eo An, im Nejin kōnke Iaar pād ilo laļ im kar kōm̧m̧an bwe kanniōk en erom Ānbwinnū, im jokwe ilubwiljin ro nejin armej raņ.

5 Iaar pād ilo laļ im kar bōk jān Jema, im jerbal ko An rekar kanooj in alikkar.

6 Im Jon eaar lo im kam̧ool kōn tarlep in aiboojoj eo Aō, im tarlep in ļo̧o̧k eo an Jon naaj kwaļo̧ke e tokālik.

7 Im eaar kam̧ool, im ba: Iaar lo aiboojoj eo An, bwe E ar ilo jinoin, m̧okta jān kar laļ;

8 Kōn menin, ilo jinoin ekar Naan eo, bwe E eaar Naan eo, em̧ool ribōktok lo̧mo̧o̧r—

9 Meram eo im Ripinmuur eo an laļ; Jitōbōn m̧ool eo, eo Eaar itok ilo laļ, kōnke laļ eaar kōm̧anm̧an jān E, im ilo E eaar mour eo an armej raņ im meram eo an armej raņ.

10 Im laļ ko rekar kōm̧anm̧an jān E; armej raņ rekar kōm̧anm̧an jān E; aolep men otemjeļo̧k rekar kōm̧anm̧an jān E, im kōn E, im ilo E.

11 Im N̄a, Jon, Ij kam̧ool bwe Iaar lo aiboojoj eo An, āinwōt aiboojoj eo an eo Nejin Emake Keotake in Jemān, obrak kōn jouj im m̧ool, em̧ool Jitōbōn m̧ool, Eo eaar itok im jokwe ilo kanniōk, im kar jokwe ilubwiljim.

12 Im N̄a, Jon, iaar lo bwe Eaar jab bōk tarlep eo ilo jinoin, a Eaar bōk jouj kōn jouj;

13 Im Eaar jab bōk tarlep eo ilo jinoin, a ar wōnm̧aanļo̧k jān jouj n̄an jouj, m̧ae An kar bōk tarlep eo;

14 Im āindein kar kūr E eo Nejin Anij, kōnke Eaar jab bōk tarlep eo ilo jinoin.

15 Im n̄a, Jon, ij kam̧ool, im lo, lan̄ ko rekar peļļo̧k, im Jetōb Kwōjarjar eaar wanlaļtak Ioon ilo jekjek in juon m̧uļe, im pād Ioon, im eaar itok juon ainikien jān ilo lan̄ eaar ba: En̄in ej Nejū Jitōnbōro.

16 Im N̄a, Jon, ij kam̧ool bwe E eaar bōk tarlep in aiboojoj eo an Jemān;

17 Im E eaar bōk aolep kajoor, jim̧or ilo lan̄ im ioon laļ, im aiboojoj eo an Jemān eaar pād Ippān, bwe Eaar pād ilo E.

18 Im naaj ālikin men kein, bwe eļan̄n̄e kom̧ij tiljek kom̧ naaj bōk tarlep in ļo̧o̧k eo an Jon.

19 Ij lewōj n̄an kom̧ ennaan kein bwe kom̧in maron̄ meļeļe im jeļā ekōjkan kabun̄-jar, im jeļā ta kom̧ij kabun̄-jar n̄an e, bwe kom̧in maron̄ itok n̄an Jemān ilo Eta, im ilo iien eo ejim̧we bōk tarlep eo An.

20 Bwe eļan̄n̄e kom̧ij kōjparok kien ko Aō kom̧ naaj bōk tarlep eo An, im aiboojoj ilo N̄a āinwōt N̄aij ilo Jemān; kōn menin, Ij ba n̄an kom̧, kom̧ naaj bōk jouj kōn jouj.

21 Im kiiō, em̧ool Ij ba n̄an kom̧, Iaar pād ilo jinoin ippān Jemān, im ij M̧aanje eo;

22 Im aolep ro keotake er kōn Eō rej dien bōk jān aiboojoj eo an ejja in wōt, im rej kabun̄ eo an M̧aanje eo.

23 Kom̧ ar barāinwōt ilo jinoin ippān Jemān; men eo ej Jetōb, em̧ool Jitōbōn m̧ool;

24 Im m̧ool ej jeļāļo̧kjeņ kōn men ko āinwōt aer kiiō, im āinwōt aer kar waļo̧k, im āinwōt aer naaj waļo̧k tokālik;

25 Im jabdewōt ej ļapļo̧k ak dikļo̧k jān in ej jitōbōn eo enana eo eaar juon ririab jān wōt jinoin.

26 Im Jetōb in m̧ool ej jān Anij. N̄aij Jetōb in m̧ool, im Jon eaar kam̧ool kake Eō, im ba: Eaar bōk tarlep in m̧ool eo, aaet, em̧ool aolep m̧ool;

27 Im ejjeļo̧k armej ej bōk tarlep eo ijello̧kun wōt n̄e ej kōjparok kien ko An.

28 E eo ej kōjparok kien ko An ej bōk m̧ool im meram, m̧ae e kaiboojoj e ilo m̧ool im ejeļā aolep men otemjeļo̧k.

29 Armej eaar barāinwōt pād ilo jinoin ippān Anij. Jeļāļo̧kjeņ, ak meram in m̧ool, kar jab ejaake ak kōm̧anm̧ane, barāinwōt em̧ool ej jab maron̄.

30 Aolep m̧ool ej jutakļo̧k make iaan ilo jekjek eo me Anij eaar likūti ie, n̄an m̧akūtkūt n̄an e make, āinwōt aolep jeļāļo̧kjeņ barāinwōt; eļan̄n̄e jaab ejjeļo̧k pād.

31 Lo, en̄in ej anemkwōj in kāālet eo an armej, im en̄in ej liaakeļo̧k eo an armej; kōnke men eo ekar jān jinoin ej kanooj alikkar n̄an er, im rej jab bōk meram eo.

32 Im armej otemjej eo jetōb eo an ej jab bōk meram eo ej pād ium̧win liaakeļo̧k.

33 Bwe armej ej jetōb. Irinekkatak ko rej n̄an indeeo, im jetōb im irinekkatak, rej jamin tūm̧ jān aer ekkejel, rej bōk tarlep in lan̄lōn̄;

34 Im n̄e rejenolo̧k, armej ejjab maron̄ bōk tarlep in lan̄lōn̄.

35 Irinekkatak ko rej jikin kōppād an Anij; aaet, armej ej jikin kōppād an Anij, em̧ool tampeļ ko; im jabdewōt tampeļ ej ettoon, Anij enaaj rupe tampeļ en.

36 Aiboojoj eo an Anij ej jeļāļo̧kjeņ, ak, ilo bar jet naan, meram im m̧ool.

37 Meram im m̧ool rej kaarmejjete e eo enana.

38 Jabdewōt jitōbōn armej eaar ejjeļo̧k ruōn ilo jinoin; im kōnke Anij Eaar lo̧mo̧o̧ren armej jān wōtlo̧k eo, armej rekar bar juon alen erom, ilo iien inono eo aer, kar ejjeļo̧k ruweer im̧aan Anij.

39 Im e eo enana ej itok im bōkļo̧k meram im m̧ool, kōn jab pokake, jān ro nejin armej raņ, im kōnke m̧anit ko an ro jemāer.

40 A Iaar jiron̄ kom̧ n̄an kōkaajririk ro nejimi ilo meram im m̧ool.

41 A em̧ool Ij ba n̄an eok, karejera Frederick G. Williams, kwaar wōnm̧aanļo̧k wōt ium̧win liaakeļo̧k in;

42 Kwōj jan̄in kar katakin ro nejūm̧ meram im m̧ool, ekkar n̄an kien ko; im bwe e eo enana eaar wōr an kajoor, tok n̄an kiiō, ioom, im en̄in ej unin am en̄taan.

43 Im kiiō juon kien Ij lewōj n̄an eok—eļan̄n̄e kwo kōņaan jo̧o̧r kwo naaj ko̧koņe m̧weo im̧ōm make, bwe elōn̄ men ko rej jab jim̧we ilo m̧weo im̧ōm.

44 Em̧ool, Ij ba n̄an karejera Sidney Rigdon, bwe ilo jet men eaar jab kōjparok kien ko kake ajri ro nejin; kōn menin, m̧okta ko̧koņe m̧weo im̧ōm.

45 Em̧ool, Ij ba n̄an karejera Josep Smith, Jun., ak ilo bar jet naan, I naaj ān̄inn̄in kom̧ ro jera, bwe kom̧ij ro jera, im kom̧ naaj wōr ami jolōt Ippa—

46 Iaar kūr kom̧ rikarejera kōn em̧m̧an eo an laļ, im kom̧ij ro aer rijerbal kōn Eō.

47 Im kiiō, em̧ool Ij ba n̄an Josep Smith, Jun.—Kwaar jab kōjparok kien ko, im emennin aikuj bwe en jutak n̄an bōk kauwe im̧aan Irooj;

48 Baam̧le eo am eaikuj ukeļo̧k im kaarmejjete jet men ko, im kanooj eo̧ron̄i ennaan ko am, eļan̄n̄e jaab naaj kōm̧akūt er jān ijo jikier.

49 Ta eo ij ba n̄an juon Ij ba n̄an aolep; jar iien otemjej n̄e eo enana eab wōr an kajoor ilo kwe, im kōm̧akūt eok jān ijo jikūm̧.

50 Karejera Newel K. Whitney barāinwōt, juon bisop ilo kabun̄ eo Aō, ewōr aikuj in kauweiki, im ko̧koņ baam̧le eo an, im lale bwe ren tiljekļo̧k im inepata im̧weo im̧weer, im jar iien otemjej, eļan̄n̄e jaab naaj kōm̧akūt er jān ijo jikier.

51 Kiiō, Ij ba n̄an kom̧, ro jera, karejera Sidney Rigdon en ilo̧k ilo ito-itak eo an, im en kaiur, im barāinwōt kabun̄bun̄ļo̧k bwe iiō eo in ebun̄-būruōn Irooj kake, im gospel in lo̧mo̧o̧r eo, āinwōt Inaaj leļo̧k an ekkōnono; im jān jar in tōmak eo ami kōn juon wōt bōro Inaaj kajutak wōt e.

52 Im ro karejera Josep Smith, Jun., im Frederick G. Williams ren kaiur barāinwōt, im naaj leļo̧k e n̄an er em̧ool ekkar n̄an jar in tōmak; im toun wōt ami kōjparok ennaan ko Aō kom̧ naaj jamin pok ilo laļ in, im jab ilo laļ eo ej itok.

53 Im, em̧ool Ij ba n̄an kom̧, bwe in ej ankilaō bwe kom̧in kaiur n̄an ukōti jeje ko rekwōjarjar Aō, im n̄an bōk jeļāļo̧kjeņ kōn bwebwenato, im kōn laļ ko, im kōn aelōn̄ in kiin̄ ko, im kōn kakien ko an Anij im armej, im aolep men kein n̄an lo̧mo̧o̧r eo an Zaion. Amen.