Seksen 9
Revelesen we Lod i givim long Oliva Kaodri tru long Profet Josef Smit, long Hamoni, Pensilvania, long Epril 1829. Lod i bin tok strong long Oliva blong hem i mas save stap wet longtaem mo i askem strong long hem blong hem i glad nomo blong stap raet, blong naoia i go, folem wanem transleta bambae i talem, be hem i no traem blong mekem translesen.
1–6, I gat ol narafala rekod blong bifo we oli stap yet blong oli mas transletem; 7–14, Wan i mas transletem Buk blong Momon tru long stadi mo konfemesen we i kam long Tabu Spirit.
1 Luk, mi talem long yu, boe blong mi, se from we yu no bin mekem translesen folem wanem we yu bin askem long mi, mo yu bin stat blong raet bakegen blong wokman blong mi, Josef Smit Junia, nao mi wantem yu blong yu gohed olsem kasem taem we yu finisim rekod ia, we mi bin givim long han blong hem.
2 Mo afta, luk, mi gat ol narafala rekod i stap, we bambae mi givim yu paoa blong yu save givhan blong transletem.
3 Yu mas save wet longtaem, boe blong mi, from mi talem se hem i waes, mo hem i no nid blong yu mekem translesen long taem naoia.
4 Luk, wok we mi bin singaotem yu blong mekem i blong yu raet blong wokman blong mi, Josef.
5 Mo luk, hem i from we yu no bin gohed olsem we yu bin statem taem yu stat blong mekem translesen, mekem se mi bin tekemaot spesel janis ia long yu.
6 No komplen sloslo, boe blong mi, from mi talem se hem i waes we mi mekem long yu long wei ia.
7 Luk, yu no bin andastanem; yu bin ting se bambae mi givim nomo long yu; yu no bin tingting hevi long hem, be yu askem nomo long mi.
8 Be, luk mi talem long yu, se yu mas stadi gud long hem insaed long maen blong yu; afta, yu mas askem long mi sapos hem i raet, mo sapos hem i raet, bambae mi mekem jes blong yu i gat wan filing we i hot insaed; from hemia, bambae yu filim se hem i raet.
9 Be sapos hem i no raet, bambae yu no gat ol filing olsem ia, be bambae tingting blong yu i fasfas, mekem se bae yu fogetem wanem we hem i rong; from hemia, yu no save raetem wanem we i tabu, be nomo sapos mi mi givim long yu.
10 Nao, sapos yu bin save samting ia, bambae yu bin save mekem translesen; be, hem i no nid blong yu mekem translesen naoia.
11 Luk, i bin nid taem yu bin stat; be yu bin fraet, mo taem i pas finis, mo hem i nomo nid naoia;
12 From, ?yu no luk se mi bin givim long wokman blong mi, Josef, inaf paoa blong mekemap hemia? Mo yutufala, mi no bin panisim wan long yutufala.
13 Mekem samting ia we mi bin komandem yu blong mekem, mo bambae yu kam antap. Stap fetful, mo no foldaon long eni temtesen.
14 Stanap strong long wok we mi bin singaotem yu blong mekem, mo bambae i no gat wan hea blong hed blong yu bambae i lus, mo bambae mi leftemap yu long las dei. Amen.