15. Nauvoo Temple

Nauvoo Temple a odzi kan no wɔdze asaase no do limestone a n’enyi tse dɛ nsõ fufuw sii. Dan no ne tsentsen yɛ meter 39 na ne tɛtɛr yɛ meter 27. N’etsifi abantsentsen no ne tsentsen yɛ meter 48 fi famu. Asɔrmba no bɔɔ afɔr kɛse ma wɔdze sii temple fɛɛfɛw yi, wɔhyɛɛ edwuma no ase 1841 mu. Binom yɛɛ edwuma wɔ dan no ho abosoom pii; binom so dze hɔn sika bɔɔ afɔr abosoom kakra mu ansaana woruguan akɔ Anee no ber a wonnwiee temple no si mpo no nna asɔrmba a wɔrebɛyɛ hɔn ayɛdze no hyɛ temple no mu mã. Ber a Ahotseweefo no hɔn mu pii fii Nauvoo wɔ fefɛwber n’ahyɛse wɔ 1846 mu ber a basabasayɛfo rehaw hɔn no, edwumayɛfo kuw bi kaa ekyir dɛ wɔrosɔw edwuma no do dze ewie temple no. Ebɔbira 30, 1846 mu no, Elderfo Orson Hyde na Wilford Woodruff a wɔkã Duebien no hɔn Quorum ho no na nyimpa bɛyɛ 20 na wotuu Ewuradze ne fie no hyɛɛ Nyame nsa. Wogyaa temple no hɔ Fankwa mu ber a wɔpaam Asɔrmba a wɔaka no fii Nauvoo. Nkyii dɔm no guu dan krɔnkrɔn no ho fĩ. Ogya hyeew no mu ndzɛmba no Ɔbɛsɛ 1848 mu. Temple a woesi no bio no (no mfonyin wɔ ha yi) yɛ dza odzii kan no ne saso ara pɛr, na President Gordon B. Hinckley na otui hyɛɛ Nyame nsa Obiradzi 27–30, 2002 mu.

Dza Osisii Tsitsir: Wɔyɛɛ ɔdodow ehyiadzi wɔ temple no ne nhyiamu dan no mu Ɔbɛsɛ 5, 1845 mu. Wɔhyɛɛ Endowment dwumadzi no ase Mumu 10, 1845 na wɔsɔɔw do dze kesii Kwakwar 7, 1846 mu. Nda a Odzi Ekyir Ahotseweefo a wɔbor 5,500 na wɔyɛɛ hɔn endowment maa hɔn, na wɔyɛɛ ewufo enuma na nsɔwano pii so.