17. Anee Nkɔree
Worubotu efi Nauvoo, Illinois ahyɛse no, wɔhyehyɛɛ dɛ wobefi hɔ Ebɔw—Ebɔbira, mbom osiandɛ nna dɔm no rehaw hɔn no ntsi President Brigham Young kyerɛɛ dɛ Ahotseweefo no nhyɛ ase ntwa Esutsen Mississippi no Kwakwar 4, 1846 mu. President Young kaa ekyir yɛɛ Ahotseweefo no hɔn endowment maa hɔn ntsi oemmfi Nauvoo hɔ kɛpeem Kwakwar ne finimfin.
Dza Osisii Tsitsir: Ansaana President Joseph Smith rubowu no ɔhyɛɛ nkɔm, “Hom mu binom bɛtsena ase ama wɔaakɔ aakɔboa ma wɔaabɔ ntsenae na wɔaakyekyer nkuropɔn no na woeehu Ahotseweefo no dɛ wɔayɛ ekunyin wɔ Mbepɔw Abotan no ne finimfin.” Ahotseweefo bɛyɛ 12,000 fii Nauvoo fi Kwakwar dze kesi Fankwa 1846 mu. Ahotseweefo no fii Winter Quarters na ekyir no fii mbea binom so, wɔboaboaa hɔn ano ekuw du du, eduonum eduonum, na aha aha, hyɛɛ asahen ase (N&A 136:3). Fankwa 1846 mu no dɔm bɛyɛ mbarimba 800 dze ɔkõ-apram bɔtoaa Nauvoo kurow no. Wɔkõo nda pii ekyir no okehiaa dɛ Ahotseweefo a wɔaka no gyaa hɔnho mu ma, dze per hɔn nkwa ama woeenya kwan etwa esutsen no. Mbarimba, mbaa na mbofra ahaenum dze rokɔ ahaesia twaa esutsen no na wɔbɔɔ asese wɔ esuegya hɔ. President Brigham Young somaa dɔm ma wɔdze edziban kɛmaa “Ahotseweefo abɔbɔfo” yi na wɔkɛfaa hɔn.