JS—Ukok Matu 3:4–6. Keidi Matu 2:4–6
Rikanaan ro rar ba m̧oktaļo̧k bwe Betleem enaaj kar jikin lotak eo an Messaia.
4 Im ke em̧ōj an ainitok aolep pris ro reutiej, im skraib ro an armej ro ippān doon, eaar kōnan jeļā jān er, im ba, Ia eo ej jikin eo kar jeje jān rikanaan ro, eo me ie Kraist enaaj kar lotak? Bwe eaar kanuij mijak, bwe e ejjan̄in kar tōmak rikanaan ro.
5 Im rar ba n̄an e, E kar jeje jān rikanaan ro, bwe E aikuij kar lotak ilo Betleem in Judia, bwe āindein kar aer ba,
6 Naan eo an Irooj ar itok n̄an kōm, im ba, Im kwe Betleem, eo ej pād ilo āneen Judia, ilo kwe enaaj lotak juon irooj, eo kwōj jab diktata ilubwilijin irooj ro an Judia; bwe jān kwe enaaj itok Messaia eo, eo enaaj lo̧mo̧o̧ren armej ro aō Israel.
JS—Ukok, Matu 3:24–26. Keidi Matu 2:23
Jisōs ej ruttoļo̧k im kōttar e Irooj m̧okta jān An jinoe ministry eo An.
24 Im ālikin men kein Jisōs eaar rūttoļo̧k ippān ro jein im jatin, im kanooj kajoor, im kōttare Irooj kōn iien eo jerbal eo An ej itok.
25 Im eaar jerbal ium̧win Jemān, im Eaar ekkōnono ej jab āinwōt armej ro jet, im kar jab maron̄ katakin E; bwe Eaar jab aikuj bwe jabdewōt armej en katakin E.
26 Im ālikin elōn̄ iiō ko, awa eo in jerbal eo An eaar epaaktok.
JS—Ukok, Matu 3:34–36. Keidi Matu 3:8–9
Ro rej dike enaan eo an Jon Peptaij rej dike Kraist. Anij emaron̄ kōm̧m̧an armej in bujen eo jān ro rej jab jān Israel.
34 Etke men in bwe kom̧in jab bōk kwaļo̧k naan an eo im Anij ar jilkintok? Elan̄n̄e kom̧ij jab bōk men in ilo buruōm̧i, kom̧ij jab bōk Eō, im elan̄n̄e kom̧ij jab bōk Eō, kom̧ij jab bōk Eo im jān E kar jilkintok Eō n̄an kwaļo̧k kam̧ool; im jero̧wiwi ko ami ejjelok aer liboror.
35 Komin ukweļo̧k, kōn menin, im jebar ļo̧k kōn leen ko rekkar n̄an ukweļo̧k;
36 Im ļōmnak in jab ba ilo kom̧ make, Kōmij ro nejin Ebream, im kōm̧ wōt ewōr am kajoor n̄an bōktok ine n̄an jemām Ebream; bwe ij ba n̄an kom̧ Anij emaron̄ jān dekā kein kōjerkak tok ilo Ebream ro nejin.
JS—Ukok, Matu 3:38–40. Keidi Matu 3:11–12
Jon Peptaij ej kam̧ool bwe ewōr an Jisōs kajoor n̄an peptaij kōn Jetōb Kwōjarjar im kijeek.
38 Em̧ool ij peptaiji kom̧ kōn dān, ālkin ami ukweļo̧k; im n̄e E eo ij kam̧ool kake Ej itok, eo eļap An kajoor jān eō, eo eran neen ij jab tello̧ke n̄an kotake, (ak Eo ijo jikin ij jab maron̄ kanne,) āinwōt iaar ba, em̧ool ij peptaiji kom̧ m̧okta jān An itok, bwe n̄e Ej itok En maron̄ peptaiji kom̧ kōn Jetōb Kwōjarjar im kijeek.
39 Im en̄in E eo im kake E inaaj kam̧ool, eo deel eo An e naaj ilo Pein, im E naaj lukkun karreoik jikin den̄den̄ wit eo An, im ainitok wit ilo nieer; a ilo tarlep in iien eo An make enaaj tile kilin wit ko kōn kijeek ejjamin kun.
40 Āindein ar itok Jon, im kwaļo̧k im peptaij ilo reba in Jordon; im kwaļo̧k kam̧ool, bwe Eo ej itok ālkin e ewōr An kajoor n̄an peptaij kōn Jetōb Kwōjarjar im kijeek.
JS—Ukok, Matu 3:43–46. Keidi Matu 3:15–17
Jon ej peptaiji Jisōs jān tulo̧k, ej lo Jetōb Kwōjarjar ej wanlaļtak āinwōt juon mule, im ej ron̄ ainikien Jemān.
43 Im Jisōs, ej uwaak, im ba n̄an e, Kōtļo̧k Eō bwe in peptaij jān eok, bwe āindein ej kōm̧m̧an bwe jen kakūrm̧ool jim̧we otemjej. Innām eaar kōtļo̧k E.
44 Im Jon eaar wanlaļļo̧k ilo dān eo im peptaiji E.
45 Im Jisōs ke eaar peptaij, em̧ōkaj An ato jān dān eo; im Jon eaar lo, im lo, lan̄ ko raar peļļo̧k n̄an e, im eaar lo Jitōbōn Anij ej wanlaļļo̧k āinwōt juon m̧uļe im jokadikdik ioon Jisōs.
46 Im lo, eaar ron̄ juon ainikien jān lan̄, ej ba: En̄in ej nejū jitōnbōro M̧aan, ilo E Ij kanooj bun̄ buruō kake. Kom̧in ron̄jake E.