ປຈສ, ໂຣມ 7:5–27. ປຽບທຽບໃສ່ກັບ ໂຣມ 7:5–25
ພຽງແຕ່ພຣະຄຣິດເທົ່ານັ້ນທີ່ສາມາດປ່ຽນຈິດວິນຍານຂອງມະນຸດໄປໃນທາງດີແບບຖາວອນ.
5 ເພາະເມື່ອພວກເຮົາໄດ້ຢູ່ໃນເນື້ອໜັງ, ຢູ່ໃນການກະຕຸ້ນຂອງບາບ, ຊຶ່ງບໍ່ສອດຄ່ອງກັບກົດ, ໄດ້ເຮັດໃຫ້ອະໄວຍະວະຂອງເຮົາເກີດຜົນທີ່ນຳໄປສູ່ຄວາມຕາຍ.
6 ແຕ່ບັດນີ້ ພວກເຮົາໄດ້ພົ້ນຈາກກົດແລ້ວທີ່ພວກເຮົາຖືກຜູກມັດ, ໂດຍທີ່ໄດ້ຕາຍຈາກກົດ, ວ່າພວກເຮົາຄວນຮັບໃຊ້ດ້ວຍວິນຍານໃໝ່, ແລະ ບໍ່ຮັບໃຊ້ຕາມຕົວອັກສອນທີ່ມີຂຽນໄວ້.
7 ແລ້ວພວກເຮົາຈະວ່າຢ່າງໃດ? ກົດຄືບາບຊັ້ນບໍ? ຂໍຢ່າໃຫ້ເປັນເຊັ່ນນັ້ນເລີຍ. ບໍ່ແມ່ນຢ່າງນັ້ນດອກ, ເຮົາຈະບໍ່ຮູ້ຈັກບາບເລີຍ, ຍົກເວັ້ນແຕ່ໂດຍກົດ; ເພາະເຮົາຄົງບໍ່ຮູ້ຈັກຄວາມໂລບ, ຖ້າຫາກກົດບໍ່ໄດ້ກ່າວວ່າ ຢ່າໂລບ.
8 ແຕ່ຄວາມຜິດບາບ, ໂດຍທີ່ຖືໂອກາດໃຊ້ພຣະບັນຍັດ, ໄດ້ເຮັດໃຫ້ເກີດຄວາມປາດຖະໜາອັນແຮງກ້າຕ່າງໆນາໆໃນຕົວຂອງເຮົາ. ເພາະຖ້າບໍ່ມີກົດ ຄວາມຜິດບາບນັ້ນກໍຕາຍເສຍແລ້ວ.
9 ເພາະຄັ້ງໜຶ່ງ ເຮົາເຄີຍມີຊີວິດຢູ່ໂດຍບໍ່ມີກົດ, ແຕ່ເມື່ອພຣະບັນຍັດຂອງພຣະຄຣິດມີມາ, ແລ້ວຄວາມຜິດບາບກໍເກີດຂຶ້ນ, ແລະ ເຮົາກໍຕາຍ.
10 ແລະ ເມື່ອເຮົາບໍ່ເຊື່ອພຣະບັນຍັດຂອງພຣະຄຣິດທີ່ມີມາ, ຊຶ່ງຖືກແຕ່ງຕັ້ງໄວ້ເພື່ອໃຫ້ຊີວິດ, ເຮົາຈຶ່ງພົບວ່າ ມັນກ່າວໂທດເຮົາໄປສູ່ຄວາມຕາຍ.
11 ເພາະຄວາມຜິດບາບ, ໂດຍຖືໂອກາດ, ໄດ້ປະຕິເສດພຣະບັນຍັດ, ແລະ ໄດ້ຫລອກລວງເຮົາ; ແລະ ໂດຍກົດນັ້ນ ເຮົາໄດ້ຖືກຂ້າ.
12 ເຖິງຢ່າງໃດກໍຕາມ, ເຮົາພົບວ່າ ກົດກໍສັກສິດ, ແລະ ພຣະບັນຍັດກໍສັກສິດ, ແລະ ຍຸດຕິທຳ, ແລະ ດີງາມ.
13 ແລ້ວ ສິ່ງທີ່ດີນຳຄວາມຕາຍມາສູ່ເຮົາຊັ້ນບໍ? ຂໍຢ່າໃຫ້ເປັນເຊັ່ນນັ້ນເລີຍ. ແຕ່ແມ່ນຄວາມຜິດບາບນັ້ນແຫລະ ຊຶ່ງອາໄສສິ່ງທີ່ດີ ເພື່ອນຳຄວາມຕາຍມາສູ່ເຮົາ; ບາບນັ້ນແຫລະ, ໂດຍພຣະບັນຍັດ, ອາດກາຍເປັນບາບທີ່ຊົ່ວຮ້າຍທີ່ສຸດ.
14 ເພາະພວກເຮົາຮູ້ວ່າ ພຣະບັນຍັດເປັນມາໂດຍຝ່າຍພຣະວິນຍານ; ແຕ່ເມື່ອເຮົາຢູ່ພາຍໃຕ້ກົດ, ເຮົາຍັງມີຕັນຫາ, ຖືກຂາຍໃຫ້ຢູ່ພາຍໃຕ້ບາບ.
15 ແຕ່ບັດນີ້ ເຮົາສົນໃຈຝ່າຍພຣະວິນຍານ; ເພາະສິ່ງທີ່ເຮົາຖືກບັນຊາໃຫ້ເຮັດ, ເຮົາຈະເຮັດ; ແລະ ສິ່ງທີ່ເຮົາຖືກບັນຊາບໍ່ໃຫ້ຍອມ, ເຮົາຈະບໍ່ຍອມ.
16 ເພາະສິ່ງທີ່ເຮົາຮູ້ວ່າບໍ່ຖືກຕ້ອງ, ເຮົາຈະບໍ່ເຮັດ; ເພາະສິ່ງທີ່ເປັນບາບ, ເຮົາກຽດຊັງ.
17 ແລ້ວຖ້າເຮົາບໍ່ເຮັດສິ່ງທີ່ເຮົາບໍ່ຍອມ, ເຮົາກໍຍອມຮັບກົດ, ວ່າກົດນັ້ນດີ; ແລະ ເຮົາບໍ່ຖືກກ່າວໂທດ.
18 ແລ້ວບັດນີ້, ບໍ່ແມ່ນເຮົາອີກຕໍ່ໄປທີ່ເຮັດບາບ; ແຕ່ເຮົາພະຍາຍາມປາບບາບນັ້ນ ທີ່ຢູ່ໃນຕົວຂອງເຮົາ.
19 ເພາະເຮົາຮູ້ວ່າ ໃນຕົວຂອງເຮົາ, ນັ້ນຄື ໃນເນື້ອໜັງຂອງເຮົາ, ບໍ່ມີສິ່ງດີສະຖິດຢູ່; ເພາະຄວາມປະສົງທີ່ມີຢູ່ກັບເຮົາ, ແຕ່ເຮົາບໍ່ພົບເຫັນການປະຕິບັດທີ່ດີເລີຍ, ມີແຕ່ໃນພຣະຄຣິດເທົ່ານັ້ນ.
20 ເພາະສິ່ງດີທີ່ເຮົາອາດຈະໄດ້ເຮັດເມື່ອເຮົາຢູ່ພາຍໃຕ້ກົດ, ເຮົາບໍ່ພົບວ່າເປັນສິ່ງດີ; ສະນັ້ນ, ເຮົາຈຶ່ງບໍ່ໄດ້ເຮັດມັນ.
21 ແຕ່ສິ່ງຊົ່ວຊຶ່ງເຮົາຈະບໍ່ເຮັດພາຍໃຕ້ກົດ, ເຮົາພົບວ່າເປັນສິ່ງດີ; ສິ່ງນັ້ນ, ເຮົາເຮັດ.
22 ບັດນີ້ ຖ້າເຮົາເຮັດສິ່ງນັ້ນ, ຜ່ານຄວາມຊ່ວຍເຫລືອຂອງພຣະຄຣິດ, ເຮົາຈະບໍ່ເຮັດພາຍໃຕ້ກົດ, ເຮົາຈະບໍ່ຢູ່ພາຍໃຕ້ກົດ; ແລະ ເຮົາຈະບໍ່ພະຍາຍາມເຮັດຜິດອີກຕໍ່ໄປ, ແຕ່ຈະປາບບາບທີ່ຢູ່ໃນຕົວຂອງເຮົາ.
23 ແລ້ວ ເຮົາພົບວ່າ ພາຍໃຕ້ກົດ, ເມື່ອເຮົາເຮັດຄວາມດີ, ຄວາມຊົ່ວກໍຈະຢູ່ກັບເຮົາ; ເພາະໃນສ່ວນເລິກຂອງໃຈຂອງເຮົາແລ້ວ ເຮົາເບີກບານໃນກົດຂອງພຣະເຈົ້າ.
24 ແລະ ບັດນີ້ ເຮົາເຫັນກົດອີກຂໍ້ໜຶ່ງ, ແມ່ນແຕ່ພຣະບັນຍັດຂອງພຣະຄຣິດ, ແລະ ມັນຖືກຝັງໄວ້ໃນຈິດໃຈຂອງເຮົາ.
25 ແຕ່ອະໄວຍະວະຂອງເຮົາ ຕໍ່ສູ້ກັບກົດໃນຈິດໃຈຂອງເຮົາ, ແລະ ພາເຮົາໄປສູ່ການເປັນຊະເລີຍຕໍ່ກົດຂອງບາບ ຊຶ່ງຢູ່ໃນອະໄວຍະວະຂອງເຮົາ.
26 ແລະ ຖ້າເຮົາປາບບາບທີ່ຢູ່ໃນຕົວຂອງເຮົາບໍ່ໄດ້, ກໍເປັນເພາະເນື້ອໜັງທີ່ຮັບໃຊ້ກົດຂອງບາບ; ໂອ້ ເຮົາຊ່າງຕ່ຳຕ້ອຍແທ້ໆນໍ! ຜູ້ໃດເດທີ່ສາມາດຊ່ວຍເຮົາໃຫ້ພົ້ນຈາກຮ່າງກາຍທີ່ຕາຍເປັນນີ້ໄດ້?
27 ເຮົາຂໍຂອບພຣະໄທພຣະເຈົ້າໂດຍທາງພຣະເຢຊູຄຣິດ ອົງເປັນພຣະຜູ້ເປັນເຈົ້າຂອງພວກເຮົາ, ເຫດສະນັ້ນ, ທາງດ້ານຈິດໃຈຂອງເຮົາ, ເຮົາຮັບໃຊ້ກົດຂອງພຣະເຈົ້າ.