5 He lolotonga ʻetau ʻi he kakanó, naʻe ngāue ʻi hotau ngaahi kupuʻi sinó, ʻa e ngaahi holi ʻo e angahalá, ʻa ia naʻe ʻikai fakatatau ki he fonó, ke fakatupu ʻa e fua ki he maté.

6 Ka ko ʻeni kuo fakahaofi ʻa kitautolu mei he fono ʻa ia naʻa tau moʻua ki aí, pea tau mate ʻi he fonó, koeʻuhí ke tau ngāue ʻi he fakafoʻou ʻo e laumālié, kae ʻikai ʻi he mataʻi tohi motuʻa ʻo e fonó.

7 Ko e hā leva ke tau leaʻakí? Ko e angahala ʻa e fonó? ʻIkai ʻaupito. ʻIkai, naʻe ʻikai te u ʻilo ʻa e angahalá, kae ʻi he fonó; he naʻe ʻikai te u ʻilo ʻa e holi koví, ka naʻe pehē ʻe he fonó, ʻOua naʻá ke mānumanu.

8 Ka ko e angahalá, ʻi heʻene meʻa ngāue ʻaki ʻa e fekaú, ʻo ne fakatupu ʻiate au ʻa e ngaahi faʻahinga holi mālohi kotoa pē. He ka ne ʻikai ʻa e fonó ʻoku mate ʻa e angahalá.

9 He naʻá ku moʻui ʻi muʻa taʻe-maumauʻi ʻa e fonó, ka ʻi he hoko mai ʻa e fekau ʻa Kalaisí naʻe toe ake hake ʻa e angahalá, peá u mate ai.

10 Pea ʻi he ʻikai te u tui ki he fekau ʻa Kalaisi ʻa ia naʻe ʻomí, ʻa ia naʻe tuʻutuʻuni ko e moʻuiʻangá, ne u ʻilo kuó ne fakahalaiaʻi au ke u mate.

11 Ka ko e angahalá, ʻi hono meʻa ngāue ʻakí, naʻá ne fakaʻikaiʻi ʻa e fekaú, pea kākaaʻi au; pea naʻe tāmateʻi ai au.

12 Ka neongo iá, naʻá ku ʻilo ʻoku māʻoniʻoni ʻa e fonó, pea māʻoniʻoni, mo angatonu, mo lelei ʻa e fekaú.

13 Pea kuo hoko ʻa ia ʻoku leleí ko e mateʻanga kiate au? ʻIkai ʻaupito? Ka ko e angahalá, koeʻuhi ke hā ai ia ko e angahala ʻi he meʻa ʻa ia ʻoku leleí, ʻo fakatupu ʻa e maté ʻiate au; koeʻuhi ko e angahala ʻi he fekaú, ke hoko ia ko e angahala lahi fakaʻulia.

14 He ʻoku tau ʻilo ʻoku fakalaumālie ʻa e fekaú; ka ʻi heʻeku moʻulaloa ki he fonó, naʻá ku anga-fakakakano, pea moʻulaloa ki he angahalá.

15 Ka ko ʻeni ʻoku ou anga-fakalaumālie; he ko ia kuo fekau ke u faí, ʻoku ou fai ia; pea ko ia kuo fekau ke ʻoua naʻá ku tuku ke faí, ʻoku ʻikai te u tuku ke fai ia.

16 Pea ko e meʻa ʻoku ou ʻilo ʻoku ʻikai totonú, ʻoku ʻikai te u fai ia; pea ko ia ʻoku angahalá, ʻoku ou fehiʻa ki ai.

17 Pea ko ia kapau ʻoku ʻikai te u fai ʻa ia ʻe ʻikai te u tuku ke faí, ʻoku ou fakamoʻoniʻi ai ʻa e fonó, ʻoku lelei ia; pea ʻoku ʻikai fakahalaʻi au.

18 Ko ia ko ʻeni, ʻoku ʻikai te u kei fai angahala; ka ʻoku ou feinga ke ikunaʻi ʻa e angahala ʻa ia ʻoku nofoʻia ʻiate aú.

19 He ʻoku ou ʻilo ʻoku ʻikai nofoʻia ʻi loto ʻiate au, ʻa ia, ko hoku kakanó, ha meʻa ʻoku lelei; he ko e loto fie faí ʻoku ʻiate au, ka ʻoku ʻikai te u maʻu ʻa e mālohi ke fai ʻa ia ʻoku leleí, kae ʻia Kalaisi pē.

20 Ka ko e lelei ʻa ia naʻe totonu ke u fai ʻi heʻeku moʻulaloa ki he fonó, ʻoku ou ʻilo ʻoku ʻikai lelei ia; ko ia, ʻoku ʻikai te u fai ia.

21 Ka ko e kovi ʻa ia ʻoku ʻikai te u fai ʻo fakatatau ki he fonó, naʻá ku ʻilo ʻoku lelei ia; peá u fai ia.

22 Ko ʻeni kapau te u fai ia, ʻi he tokoni mai ʻa Kalaisi, ʻe ʻikai te u fai ia ʻi he fonó, ʻoku ʻikai te u moʻulaloa ai ki he fonó; pea ʻoku ʻikai ko haʻaku kumi ia ke fai kovi, ka ke ikunaʻi ʻa e angahala ʻoku nofoʻia ʻiate aú.

23 ʻOku ou ʻilo ai ʻi he fonó, kapau te u failelei ʻoku ʻiate au ʻa e koví, he ʻoku ou fiefia ʻi he fono ʻa e ʻOtuá ʻo fakatatau ki he tangata ʻi lotó.

24 Pea ko ʻeni ʻoku ou mamata ki ha fono ʻe taha, ʻio ʻa e fekau ʻa Kalaisí, pea kuo tohi tongi ia ki hoku ʻatamaí.

25 Ka ʻoku fepaki ʻa hoku ngaahi kupuʻi sinó mo e fono ʻo hoku ʻatamaí, pea fakapōpulaʻi au ki he fono ʻo e angahala, ʻa ia ʻoku ʻi hoku ngaahi kupuʻi sinó.

26 Pea kapau ʻe ʻikai te u ikunaʻi ʻa e angahala ʻa ia ʻoku ʻi loto ʻiate aú, ka te u tauhi ki he fono ʻo e angahalá ʻi he kakanó; ʻOiauē ʻa e tangata malaʻia ko au! ko hai te ne fakahaofi au mei he sino ʻo e mate ko ʻení?

27 ʻOku ou fakafetaʻi ki he ʻOtuá ʻia Sīsū Kalaisi ko hotau ʻEikí, ko ia, te u tauhi ʻe au ʻi hoku ʻatamaí ʻa e fono ʻa e ʻOtuá.