¶ 1 OKU laga hake hono fale e he fefine kotoabe oku boto: ka oku holoki hifo ia e he vale aki hono nima.

2 Koia oku eveeva i he ene agatonu oku manavahe ia kia Jihova: ka koia oku bikobiko i hono gaahi hala oku ne fehia kiate ia.

3 Oku ai ae vaa oe laukau i he gutu oe vale: ka oku fakamoui ae boto e ho nau lougutu.

4 I he botu oku ikai ai ha faga bulu oku maa ai ae aiaga kai: ka oku ai ae tubu lahi i he malohi oe bulu.

5 E ikai faa loi ae fakamooni agatonu: ka e lea loi be ae fakamooni loi.

6 Oku kumi ae boto e he manuki, ka oku ikai te ne ilo ia: ka oku ma‘ugofua ae boto kiate ia oku fakakaukau.

7 Alu atu mei he ao oe tagata vale, oka ke ka mamata oku ikai iate ia ae lougutu oe boto.

8 Koe boto eni ae fakamakukaga ke ne ilo be hono hala: ka koe vaiga ae vale koe kākā ia.

9 Oku manuki‘i ae agahala e he kakai vale: ka oku ai ae lelei i he haohaoga oe maonioni.

10 Oku ilo e he loto a ene mamahi aana: bea oku ikai ke kau ha taha kehe i he ene fiefia.

11 E holoki hifo ae fale oe agahala: ka e ma‘u be ae lelei i he fale fehikitaki oe agatonu.

12 Oku ai ae hala oku matamata totonu ki he tagata, ka ko hono gataaga koe gaahi hala oe mate.

13 I he lolotoga ae kata oku mamahi ai ae loto: bea koe ikuaga oe vāke koia koe māfajia.

14 E fakafonu aia oku fakaholomui i loto aki hono gaahi hala oona: bea e makona ae tagata agalelei meiate ia be.

15 Oku tui e he tae boto ki he lea kotoabe: ka oku tokaga lahi aia oku aga fakabotoboto ki he ene alu.

16 Oku manavahe ae tagata boto, o ne fakamamao mei he kovi: ka oku fakalili ae vale, mo faa bolebole.

17 Oku fai vale ia aia oku ita vave: bea oku tubu ae fehia ki he tagata oku filioi kovi.

18 Oku ma‘u e he fakavalevale ae vale: ka oku tatā aki ae boto aia oku fakamakukaga.

19 Oku bunou ae agakovi i he ao oe agalelei: bea moe agahala i he mataba oe maonioni.

20 Oku fehianekina ae tagata majiva e hono kaugaabi: ka oku toko lahi akinautolu oku ofa ki he koloaia.

21 Koia oku fehia ki hono kaugaabi koe fai hala ia: ka oku monuia ia aia oku agaofa ki he majiva.

22 Ikai oku he akinautolu oku filioi kovi? ka e oe kakai oku filioi lelei ae aloofa moe mooni.

23 Oku ai hono aoga oe gaue kotoabe: ka koe faa lea ae lougutu oku tubu ai ae majiva.

24 Koe koloa ae boto ko ho nau tatā ia: ka koe fai vale ae vale ko ho nau vale ia.

25 Oku fakamoui ae gaahi laumalie e he fakamooni oku mooni: ka oku lea aki ae loi e he fakamooni loi.

26 Oku ai ae falala malohi i he manavahe kia Jihova: bea e ma‘u e he ene fānau ae botu hufaga.

27 Koe manavahe kia Jihova koe matavai ia oe moui, ke tau hao ai mei he gaahi tauhele oe mate.

28 Oku ogoogo lahi ha tu‘i i he toko lahi o hono kakai: ka koe majiva kakai koe vaivaiaga ia oe houeiki.

29 Oku boto lahi ia aia oku fakatuotuai ene ita: ka koia oku oho vave hono loto oku fakahikihiki eia ae vale.

30 Koe loto agamalu koe moui ia ae kakano: ka koe meheka koe fakabobo ia oe gaahi hui.

31 Koia oku fakamalohi‘i ae majiva oku manuki‘i eia a hono Tubuaga: ka koia oku fakaabaaba kiate ia, oku agaofa ia ki he majiva.

32 Oku kabuji atu ae agakovi i he ene agahala: ka oku ma‘u e he maonioni ae amanaki lelei i he ene mate.

33 Oku nofo ae boto i he loto oia oku ma‘u ae faa ilo: ka oku fakaha mai aia oku i he loto oe kakai vale.

34 Oku hiki hake e he maonioni ae buleaga: ka koe mea fakama ae agahala ki he gaahi buleaga.

35 Oku ofeina e he tu‘i ae tamaioeiki oku boto: ka oku houhau ia kiate ia oku tubu mei ai ae ma.