¶ 1 E HOKU foha, kabau kuo ke hoko koe fetogi ki ho kaiga, kabau kuo ke fekuku nima mo ha muli,

2 Ta kuo tauhele‘i koe aki ae gaahi lea mei ho gutu, kuo ke fihia koe i he gaahi lea a ho gutu.

3 E hoku foha, ke ke fai eni, koeuhi ke ke hao oka ke ka to ki he nima o he kaiga: alu koe, o fakavaivai koe, koeuhi ke ke lava‘i ai ho kaiga.

4 Oua naa tuku ke mohe ho mata, be tuku ke tulemohe ho laumata.

5 Fakamoui koe o hage koe kaseli mei he nima oe tagata tuli manu, bea hage koe manu buna mei he nima oe tagata tauhele.

¶ 6 Akoe koe fakabikobiko, alu ki he lo; tokaga ki he ene aga, bea ke boto ai:

7 Aia oku ikai hano fakahinohino, be eginaki, be ha bule,

8 Ka oku ne tokonaki ene mea kai i he faahita‘u mafana, o ne tanaki ene mea kai i he ututa‘u.

9 Akoe koe fakabikobiko, e fefe hono fuoloa o hoo mohe? te ke toki tuu hake afe mei hoo mohe?

10 E toe jii be ae mohe, e toe jii moe moumohea, e toe jii moe fehulunaki oe nima ke mohe:

11 Bea behe, e ha‘u ai hoo majiva o hage ha taha oku fonoga mai, bea mo hoo baea o hage ha tagata oku too mahafu.

¶ 12 Oku alu moe gutu kovi, ae tagata oku agakovi, moe tagata agahala.

13 Oku kakamo eia aki hono mata, oku lea aki eia hono va‘e, oku ako aki eia hono louhi‘i nima;

14 Oku i hono loto ae kovi, oku ne fakatubu mau ai be ae kovi; oku tūtū‘i eia ae maveuveu.

15 Koia e hoko fakafokifa ai a ene malaia; e maumau fakafokifa ia tae hano fakamoui.

¶ 16 Oku fehia a Jihova ki he mea ni e ono: io, koe mea e fitu oku fakalielia i hono ao:

17 Koe mata fielahi, koe elelo oku loi, moe nima oku liligi ae toto oe taehalaia,

18 Koe loto oku fakatubu ae gaahi mahalo kovi, moe va‘e oku vee vave ki he fai kovi,

19 Koe fakamooni loi oku lea aki ae gaahi loi, mo ia oku fakatubu maveuveu i he kaiga.

¶ 20 E hoku foha, ke ke tauhi ae fekau a hoo tamai, bea oua naa liaki ae fono a hoo fa‘e:

21 Nonoo mau ai be ia ki ho loto, bea kahoa aki ia i ho kia.

22 Oka ke ka alu, te ne tataki koe; oka ke ka mohe, te ne tauhi koe; bea oka ke ka a, te mo alea mo ia.

23 He koe fekau koe tuuga māma ia: bea koe fono koe māma ia; bea koe valoki fakaboto koe hala ia oe moui:

24 Ke fakahaofi koe mei he fefine agahala, mei he lea fakaoloolo ae fefine muli.

25 Oua naa ke holi i ho loto ki hono fakaofoofa; bea oua naa tuku ke ne kākā‘i koe aki hono laumata.

26 He koe mea i he fefine feauaki oku fakamajiva‘i ae tagata ke toe jii ene koga ma: bea e tuli e he tonotagata ae moui mahuiga.

27 E faa ai e ha tagata ae afi ki hono fatafata, bea ikai vela hono gaahi kofu?

28 E eveeva ha taha i he fuga maka vela, ka e ikai vela hono va‘e?

29 Oku behe aia oku alu atu ki he unoho o hono kaugaabi; e ikai tonuhia ia oku ala ki ai.

30 Oku ikai fehia ae kakai ki ha kaihaa, o kabau kuo ne kaihaa ke fakafiemalie hono loto i he ene feiga fiekaia;

31 Ka oka ilo ia, e totogi eia ke liuga fitu; e atu eia ae mea kotoabe o hono fale.

32 Ka koia oku tonofefine, oku majiva boto: koia oku ne fai ia oku fakaauha eia hono laumalie oona.

33 E lavea ai ia mo ogoogokovi: bea e ikai holoholo‘i a hono manukia.

34 He koe fuaa koe fakalili ia oe tagata: koia e ikai te ne toe mamae ai i he aho oe totogi.

35 E ikai tokaga‘i eia ha tukugoue; bea e ikai fiemalie ia i hoo foaki lahi.