ຫລັກແຫ່ງຄວາມເຊື່ອ
ຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ
ບົດທີ 1
1 ພວກເຮົາ ເຊື່ອໃນ ພຣະເຈົ້າ, ພຣະບິດາຜູ້ສະຖິດນິລັນດອນ, ແລະ ໃນ ພຣະບຸດຂອງພຣະອົງ, ພຣະເຢຊູຄຣິດ, ແລະ ໃນ ພຣະວິນຍານບໍລິສຸດ.
2 ພວກເຮົາເຊື່ອວ່າ ມະນຸດຈະໄດ້ຮັບໂທດເພາະບາບ ຂອງຕົນ ແລະ ບໍ່ແມ່ນເພາະການລ່ວງລະເມີດ ຂອງອາດາມ.
3 ພວກເຮົາເຊື່ອວ່າ ຜ່ານທາງ ການຊົດໃຊ້ຂອງພຣະຄຣິດ ມະນຸດຊາດທັງປວງຈະ ລອດໄດ້ ໂດຍ ການປະຕິບັດຕາມ ກົດ ແລະ ພິທີການແຫ່ງ ພຣະກິດຕິຄຸນ.
4 ພວກເຮົາເຊື່ອວ່າ ຫລັກທຳ ແລະ ພິທີການເບື້ອງຕົ້ນແຫ່ງພຣະກິດຕິຄຸນຄື: ໜຶ່ງ ສັດທາໃນອົງພຣະເຢຊູຄຣິດເຈົ້າ; ສອງ ການກັບໃຈ; ສາມ ບັບຕິສະມາໂດຍ ການລົງໄປໃນນ້ຳໝົດທັງຕົວເພື່ອການປົດບາບ; ສີ່ ການວາງ ມືເພື່ອຮັບ ຂອງປະທານແຫ່ງພຣະວິນຍານບໍລິສຸດ.
5 ພວກເຮົາເຊື່ອວ່າ ມະນຸດຕ້ອງໄດ້ຮັບ ການເອີ້ນຈາກພຣະເຈົ້າໂດຍ ການພະຍາກອນ ແລະ ໂດຍ ການວາງມືໂດຍຜູ້ມີ ສິດອຳນາດ ເພື່ອໃຫ້ ສັ່ງສອນພຣະກິດຕິຄຸນ ແລະ ປະຕິບັດ ພິທີການຕາມນັ້ນ.
6 ພວກເຮົາເຊື່ອໃນ ການຈັດວາງລະບຽບງານຢ່າງດຽວກັນກັບທີ່ມີຢູ່ໃນສາດສະໜາຈັກສະໄໝບູຮານ ນັ້ນຄື ອັກຄະສາວົກ, ສາດສະດາ, ສິດຍາພິບານ, ຄູສອນ, ຜູ້ປະກາດຂ່າວປະເສີດ, ແລະ ອື່ນໆ.
7 ພວກເຮົາເຊື່ອໃນ ຂອງປະທານແຫ່ງ ການເວົ້າພາສາ, ການພະຍາກອນ, ການເປີດເຜີຍ, ພາບທີ່ມາໃຫ້ເຫັນ, ການປິ່ນປົວ, ການແປພາສາ, ແລະ ອື່ນໆ.
8 ພວກເຮົາເຊື່ອວ່າ ພຣະຄຣິສຕະທຳຄຳພີເປັນ ພຣະຄຳຂອງພຣະເຈົ້າຕາບໃດທີ່ແປມັນ ຖືກຕ້ອງ. ພວກເຮົາເຊື່ອອີກວ່າ ພຣະຄຳພີມໍມອນເປັນພຣະຄຳຂອງພຣະເຈົ້າ.
9 ພວກເຮົາເຊື່ອທັງໝົດທີ່ພຣະເຈົ້າໄດ້ ເປີດເຜີຍມາ, ທັງໝົດທີ່ພຣະອົງເປີດເຜີຍຢູ່ໃນຂະນະນີ້ ແລະ ພວກເຮົາເຊື່ອວ່າ ພຣະອົງຈະ ເປີດເຜີຍເລື່ອງສຳຄັນ ແລະ ຍິ່ງໃຫຍ່ອີກຫລາຍເລື່ອງກ່ຽວກັບອານາຈັກຂອງພຣະເຈົ້າ.
10 ພວກເຮົາເຊື່ອໃນ ການຮ່ວມກັນແທ້ໆຂອງເຊື້ອສາຍອິດສະຣາເອນ ແລະ ໃນການກັບຄືນມາຂອງຄົນ ສິບເຜົ່າ ແລະ ວ່າ ຊີໂອນ (ເຢຣູຊາເລັມໃໝ່) ຈະຖືກສ້າງຂຶ້ນໃນທະວີບອາເມຣິກາ ວ່າພຣະຄຣິດຈະ ປົກຄອງແຜ່ນດິນໂລກເອງ ແລະ ວ່າແຜ່ນດິນໂລກຈະຖືກ ເຮັດໃໝ່ ແລະ ໄດ້ຮັບ ລັດສະໝີພາບ ແຫ່ງສຸຂະເສີມຂອງມັນ.
11 ພວກເຮົາເຊື່ອຖື ສິດທິແຫ່ງການນະມັດສະການພຣະເຈົ້າ ຜູ້ມີລິດທານຸພາບຕາມ ການບອກຂອງ ຄວາມຮູ້ສຶກຜິດ ຫລື ຖືກຂອງເຮົາເອງ ແລະ ຍອມໃຫ້ຄົນທັງປວງມີສິດທິເຊັ່ນດຽວກັນ ໃຫ້ເຂົາ ນະມັດສະການຢ່າງໃດ, ທີ່ໃດ, ຫລື ສິ່ງໃດທີ່ເຂົາຈະນະມັດສະການ.
12 ພວກເຮົາເຊື່ອໃນການຂຶ້ນຢູ່ກັບກະສັດ, ປະທານາທິບໍດີ, ຜູ້ປົກຄອງ, ແລະ ຜູ້ພິພາກສາ ໃນການເຮັດຕາມການຍົກຍ້ອງ ແລະ ໃນການສະໜັບສະໜູນ ກົດໝາຍ.
13 ພວກເຮົາເຊື່ອໃນການເປັນຄົນ ຊື່ສັດ, ຈິງໃຈ, ບໍລິສຸດ, ມີເມດຕາ, ມີຄຸນນະທຳ, ແລະ ໃນ ການເຮັດຄວາມດີຕໍ່ມະນຸດທັງປວງ ໂດຍແທ້ແລ້ວ ພວກເຮົາຈະກ່າວວ່າ ພວກເຮົາດຳເນີນຕາມ ຄຳແນະນຳຂອງໂປໂລ—ນັ້ນຄື ພວກເຮົາເຊື່ອທຸກສິ່ງ, ພວກເຮົາ ຫວັງທຸກສິ່ງ, ພວກເຮົາອົດທົນມາແລ້ວຫລາຍສິ່ງ ແລະ ຫວັງທີ່ຈະສາມາດ ອົດທົນໄດ້ທຸກສິ່ງ ຫາກມີສິ່ງໃດທີ່ເປັນ ຄຸນນະທຳ, ງົດງາມ, ຫລື ຈາກການລາຍງານດີ ຫລື ຄວນສັນລະເສີນ, ພວກເຮົາສະແຫວງຫາສິ່ງເຫລົ່ານີ້.
ໂຈເຊັບ ສະມິດ.