1 Ndo kupedzwa kwakaitwa denga nepasi, nemhomho dzayo dzose.

2 Uye muzuva rechinomwe, ini Mwari, ndakapedza basa rangu, nezvose zvinhu zvandakanga ndaita; uye ndikazorora muzuva rechinomwe kubva kubasa rangu rose, uye zvose zvinhu zvandakanga ndaita zvakapera, uye ini Mwari, ndikaona kuti zvakanaka.

3 Uye ini Mwari, ndakaropafadza zuva rechinomwe, uye ndikarichenesa; nokuti mariri ndakazorora mubasa rangu rose iro ini Mwari, ndakanga ndasika nekugadzira.

4 Uye zvino tarisai, ndinoti kwauri, kuti izvi ndizvo zvizvarwa zvedenga nezvepasi, pazvakasikwa, muzuva iro ini Ishe Mwari, randakagadzira denga nepasi;

5 Uye chose chinomera musango chisati chave muvhu, negwenzi rose resango risati rakura. Nokuti, ini Ishe Mwari, ndakasika zvinhu zvose, izvo zvandakataura nezvazvo, zviri mumweya, zvisati zvave sezvazviri pamusoro penyika. Nokuti ini Ishe Mwari, handina kunge ndaita kuti kunaye pamusoro penyika. Uye ini Ishe Mwari, ndakanga ndasika vana vose vevanhu; uye kwete munhu wekurima ivhu, nokuti kudenga ndiko kwandakavasika; uye kwakanga kusati kwave nenyama panyika, kana mumvura, kana mumhepo;

6 Asi ini Ishe Mwari, ndakataura, uye kukasimuka mhute kubva pasi, uye ikadiridza pamusoro penyika yose.

7 Uye ini Ishe Mwari, ndakaumba munhu kubva muguruva repasi, uye ndikafemera mhuno dzake mweya weupenyu; uye munhu akave mweya unorarama, nyama yekutanga pamusoro penyika, munhu wekutangawo, zvakadaro, zvinhu zvose zvakanga zvasikwa; asi mumweya zvakasikwa uye zvakagadzirwa maererano nezwi rangu.

8 Uye ini Ishe Mwari, ndakadyara bindu nechokumabvazuva muEdeni, uye imomo ndikaisa munhu wandakanga ndaumba.

9 Uye kubva muvhu ndakagadzira, ini Ishe Mwari, kuti mukure wose muti, unokura wega, unofadza mumaziso emunhu; uye munhu agogona kuuona. Uye naiwo wakave zvakare mweya unorarama. Nokuti waive wemweya musi wandakausika; nokuti unogara uri munzvimbo umo ini Mwari, mandakausikira, hongu, kunyangwe zvose zvinhu zvandakagadzirira kushandiswa nemunhu, uye munhu akaona kuti zvakanaka kuve zvekudya. Uye ini Ishe Mwari ndakadyara muti weupenyu zvakare pakati pebindu, zvakare nemuti weruzivo wezvakanaka nezvakaipa.

10 Uye ini Ishe Mwari, ndakaita kuti rukova rwubve muEdeni kunodiridza bindu; uye kubvira ipapo rwakanga rwapatsanurwa, uye rwukave hova ina.

11 Uye ini Ishe Mwari, ndakadaidza rwekutanga kuti Pisoni, uye rwakatenderedza yose nyika yeHavira, uko ini Ishe Mwari, ndakasika goridhe rakawanda;

12 Uye goridhe renyika iyoyo rakanga rakanaka, uye maive nedheriamu nebwe reoniksi.

13 Uye zita rerukova rwechipiri rainzi Gihoni; rwumwecheterwo rwunonotenderedza nyika yose yeEtiopia.

14 Uye zita rerukova rwechitatu rainzi Hidekeri; urwo rwunoenda nechekumabvazuva eAsiria. Uye rukova rwechina rwaive Yufratesi.

15 Uye ini Ishe Mwari, ndakatora munhu, uye ndakamuisa muBindu reEdeni, kuti arishongedze, nokurichengeta.

16 Uye ini Ishe Mwari, ndakaraira munhu ndichiti: Kumiti yose yebindu unogona kudya wakasununguka.

17 Asi zvemuti weruZivo rwezvakanaka nezvakaipa, iwe usazoudya, zvisinei, iwe unogona kuzvisarudzira pachako, nokuti zvapihwa kwauri; asi, yeuka kuti ini ndinozvirambidza, nokuti muzuva rauchadya iwoyu, iwe zvechokwadi uchafa.

18 Uye ini Ishe Mwari, ndakati kune wangu Mumwechete Akaberekwa, kuti hazvina kunaka kuti murume ave ega; nokudaro, ndichamuitira muyamuri akamukwanira.

19 Uye kubva muvhu, ini Ishe Mwari, ndakaumba mhuka yose yesango, neshiri yose yedenga; uye ndikaraira kuti zviuye kuna Adama, kuti aone kuti angazvidaidza kuti chiyi; uye zvaive zviri mweya unorarama; nokuti ini Mwari, ndakazvifemera mweya weupenyu, uye ndikaraira kuti chose zvacho chikisikwa chinorarama chinenge chatumidzwa zita naAdama, ndiro richave zita racho.

20 Uye Adama akapa mazita kune dzose mombe, nokushiri dzedenga, nekumhuka dzose dzesango; asi kuna Adama, hakuna kuwanikwa mubatsiri akamukwanira.

21 Uye ini Ishe Mwari, ndakaita kuti Adama akotsire chaizvo; uye akakotsira, ndikatora imwe yembabvu dzake uye ndikavhara pakare nyama munzvimbo yayo;

22 Uye rumbabvu urwo ini Ishe Mwari, rwandakanga ndatora kumurume, ini ndakaita mukadzi, uye ndikamuunza kumurume.

23 Uye Adama akati: Uyu ndave kuziva zvino kuti ibvupa remapfupa angu, nenyama yenyama yangu; achadaidzwa kuti Mukadzi, nokuti akabviswa pamurume.

24 Nokudaro murume achasiya baba vake naamai vake, uye achanamatira kumukadzi wake; uye ivavo vachave nyama imwechete.

25 Uye vakanga vasina kusimira vose, murume nemukadzi wake, uye vakanga vasinganyare.