1 და იყო ასე: როდესაც მე, უფალმა ღმერთმა, ისინი განვდევნე, ადამმა დაიწყო მიწის დამუშავება და ბატონობა ყოველი მინდვრის ცხოველზე და თავისი პირის ოფლით პურის ჭამა, როგორც მე, უფალმა, ვუბრძანე. და ევაც, მისი ცოლი, შრომობდა მასთან ერთად.

2 და ადამმა შეიცნო თავისი ცოლი და ევამ გაუჩინა ვაჟები და ასულები და მათ დაიწყეს გამრავლება და დედამიწის აღვსება.

3 და იმ ჟამიდან, ადამის ვაჟებმა და ასულებმა ორ-ორად დაიწყეს გაყოფა მიწაზე და მიწის დამუშავება და ფარების მოვლა; და მათაც გაუჩდათ ვაჟები და ასულები.

4 და ადამმა და ევამ, მისმა ცოლმა, მოუხმეს უფლის სახელს და მოესმათ უფლის ხმა ედემის ბაღის მხრიდან, მიმართავდა რა მათ და ისინი მას ვერ ხედავდნენ; ვინაიდან გაძევებულნი იყვნენ მისი გარემოცვიდან.

5 და უბოძა მათ მცნებები, რომ თაყვანი ეცათ უფლისთვის, თავიანთი ღმერთისთკის, და პირველშობილი თავიანთი ფარიდან შეეწირათ მსხვერპლად უფლისთკის. და ადამი მორჩილი იყო უფლის მცნებებისადმი.

6 და მრავალი დღის შემდეგ ადამს უფლის ანგელოზი გამოეცხადა, ეუბნებოდა რა: რატომ სწირავ მსხვერპლს უფალს? და ადამმა მიუგო: არ ვიცი, მაგრამ ასე მიბრძანა უფალმა.

7 და შემდეგ ანგელოზმა უთხრა სიტყვები: ეს არის მსგავსი მამის მხოლოდშობილის მსხვერპლშეწირვისა, რომელიც აღსავსეა მადლითა და ჭეშმარიტებით.

8 ამიტომ, რასაც გააკეთებ, გააკეთე ძის სახელით და უნდა მოინანიო და უფალს მოუხმო ძის სახელით მარად.

9 და იმ დღეს ადამს მოეფინა სულიწმინდა, რომელიც მოწმობს მამაზე და ძეზე, ამბობდა რა: მე ვარ მამის მხოლოდშობილი დასაბამიდანვე, ამიერიდან და სამარადისოდ; რადგან დაეცი, შეძლებ, იყო გამოსყიდული და მთელი კაცობრიობაც, ყოველი, ვინც კი ისურვებს.

10 და იმ დღეს ადამმა ადიდა ღმერთი, აღივსო და დაიწყო წინასწარმეტყველება დედამიწის ყოველი ოჯახის შესახებ, ამბობდა რა: კურთხეულ იყოს ღვთის სახელი, რადგან ჩემი შეცოდებების გამო ამეხილა თვალები, მექნება სიხარული ამ ცხოვრებაში და ხორციელად, კვლავ ვიხილავ ღმერთს.

11 და ევამ, მისმა ცოლმა, ყოველივე ეს გაიგო და გაიხარა ამბობდა რა: რომ არ შეგვეცოდა, ვერასდროს ვერ გვეყოლებოდა შთამომავლობა, ვერასდროს შევიცნობდით კეთილსა და ბოროტს, ჩვენი გამოსყიდვის სიხარულსა და მარადიულ სიცოცხლეს, რომელსაც ღმერთი უბოძებს ყოველ მორჩილს.

12 და ადამმა და ევამ დალოცეს ღვთის სახელი და გაანდეს ყოველივე თავიანთ ვაჟებსა და ასულებს.

13 და სატანა მოვიდა მათ შორის და თქვა: მეც ღმერთის შვილი ვარ; და უბრძანა მათ: ნუ იწამებთ ამას და მათ არ იწამეს; და მათ, ღმერთზე უფრო მეტად, სატანა უყვარდათ. და იმ ჟამიდან ადამიანი გახდა ხორციელი, ავხორცი და ეშმაკისეული.

14 და უფალმა ღმერთმა მოუწოდა ყველგან ადამიანებს სულიწმინდით და უბრძანა, მოენანიებინათ;

15 და რომლებმაც იწამეს ძე და მოინანიეს ცოდვები, გადარჩებიან; და რომლებმაც იწამეს და არ მოინანიეს, იქნებიან წყეულნი; და გამოვიდა სიტყვები ღმერთის ბაგეთაგან მტკიცე ბრძანებულებად, ამიტომ ისინი უნდა აღსრულდეს.

16 ადამმა და ევამ, მისმა ცოლმა, არ შეწყვიტეს უფლისადმი ღაღადი. და ადამმა შეიცნო ევა, თავისი ცოლი და ევა დაორსულდა და შვა კაენი და ევამ თქვა: მე მივიღე კაცი ღვთისგან, ამიტომ, დაე, ნუ უარყოფს იგი მის სიტყვებს. მაგრამ, აჰა, კაენი ყურს არ უგდებდა, ამბობდა რა: ვინ არის უფალი, რომ მას ვცნობდე?

17 და ევა კვლავ დაორსულდა და შვა მისი ძმა, აბელი. და აბელი ყურს უგდებდა უფლის ხმას. და იყო აბელი მწყემსი, ხოლო კაენი – მიწადმოქმედი.

18 და კაენს სატანა უყვარდა ღმერთზე მეტად. და სატანამ მას უბრძანა: მიართვი ძღვენი უფალს.

19 და გავიდა ხანი და იყო ასე, რომ კაენმა მიართვა მიწის ნაყოფთაგან ძღვენი უფალს.

20 და ასევე აბელმაც მიართვა უფალს თავისი ცხვრების პირმშოთაგან და მათი ცხიმიდან. და გადმოხედა უფალმა აბელსა და მის ძღვენს;

21 მაგრამ კაენსა და მის ძღვენს არ გადმოხედა. ახლა სატანამ იცოდა ეს და იყო ამით კმაყოფილი. და კაენს ძალზედ ეწყინა და მოეღუშა სახე.

22 და უფალმა უთხრა კაენს: რა გეწყინა? რად მოგიღუშავს სახე?

23 თუ სიკეთეს სჩადიხარ, ხომ მიგიღებენ? ხოლო თუ სიკეთეს არ სჩადიხარ, მაშინ კართან დაგელოდება ცოდვა და სატანას სურს, დაგეუფლოს; და თუ არ დაიცავ ჩემს მცნებებს, მე გადაგცემ და მოგეზღება მისი სურვილისამებრ. და შენ იბატონებ მასზე.

24 ვინაიდან, ამიერიდან შენ იქნები სიცრუის მამა; შენ გიწოდებენ წყეულს; ვინაიდან შენც ასევე იყავი ამაქვეყნის დასაბამიდან.

25 და მომავალში იტყვიან ასე – რომ ეს სისაძაგლე მოდის კაენიდან; ვინაიდან უარყო მან უდიდესი დარიგება, რომელიც მოდიოდა ღვთისგან; და ამ წყევლას დაგადებ, თუ არ მოინანიებ.

26 და კაენს ეწყინა და აღარ უსმენდა უფლის ხმას, არც აბელს, თავის ძმას, რომელიც წმინდად დადიოდა უფლის წინაშე.

27 და ადამი და მისი ცოლი გლოვობდნენ უფლის წინაშე კაენისა და მისი ძმების გამო.

28 და იყო ასე, რომ კაენმა ერთერთი თავისი ძმის ასული ცოლად შეირთო და მათ სატანა ღმერთზე უფრო მეტად უყვარდათ.

29 და სატანამ უთხრა კაენს: ყელით დაიფიცე, თუ ამას გათქვავ, მოკვდები; და დააფიცე შენი ძმები თავიანთი თავით, ცოცხალი ღმერთით, რომ არ გათქვამენ; ვინაიდან, თუ ამას გათქვამენ, უსათუოდ მოკვდებიან; და ეს იმიტომ, რომ შენმა მამამ ვერ შეიტყოს ეს; და ამ დღეს აბელს ჩაგიგდებ ხელში.

30 და სატანამ შეჰფიცა კაენს, რომ მოიქცეოდა მისი ბრძანებებისამებრ. და ყოველივე ეს გაკეთდა საიდუმლოდ.

31 და კაენმა თქვა: ჭეშმარიტად, მე ვარ მაჰანი, ოსტატი, ამ დიდი საიდუმლოს მფლობელი, რადგან შემიძლია ვკლა და მივიღო სარგებელი, ამიტომ, კაენს ეწოდა ოსტატი მაჰანი და იგი ხარობდა საკუთარ სიბოროტეში.

32 და კაენი წავიდა ველზე და ელაპარაკა კაენი აბელს, თავის ძმას. და იყო ასე: როცა ისინი ველად იყვნენ და აღდგა კაენი აბელზე, თავის ძმაზე, და მოკლა იგი.

33 და კაენი ხარობდა იმით, რაც ჩაიდინა, ამბობდა რა, თავისუფალი ვარ; ხელში აუცილებლად ჩამივარდება ჩემი ძმის ფარა.

34 და უთხრა უფალმა კაენს: სად არის შენი ძმა, აბელი? და უპასუხა მან: არ ვიცი. განა მე ჩემი ძმის დარაჯი ვარ?

35 და უფალმა უთხრა: ეს რა ჰქენი! შენი ძმის სისხლი შემომღაღადებს მიწიდან.

36 და ახლა, წყეული იყავ მიწისაგან, რომელმაც გახსნა თავისი პირი შენი ძმის სისხლის შენი ხელიდან მისაღებად.

37 როდესაც დაამუშავებ მიწას, ის არ მოგცემს თავის ძალას. დევნილი და მაწანწალა იქნები მიწაზე.

38 და კაენმა უთხრა უფალს: სატანამ მაცდუნა ჩემი ძმის ფარის გამო და ასევე განაწყენებული ვიყავი, ვინაიდან მისი ძღვენი მიიღე და არა ჩემი; ჩემი სასჯელი უფრო დიდია, რისი ატანაც მძალუძს.

39 აჰა, გამაძევებ დღეს უფლის პირისაგან და შენი სახისგან ვიქნები დამალული; და ვიქნები დევნილი და მიუსაფარი ქვეყნად; და ყოველი მნახველი ჩემი მომკლავს ჩემი ურჯულობის გამო, ვინაიდან ყოველივე ეს არ არის ღვთისგან დაფარული.

40 და მე, უფალმა, მას ვუთხარი: ყოველი შენი მკვლელი შვიდგზის იქნება შურისგებული. და მე, უფალმა, დავადე ნიშანი კაენს, რომ არ მოეკლა იგი ყოველ მის მპოვნელს.

41 და გაძევებულ იქნა კაენი უფლის გარემოცვიდან და თავისი ცოლითა და ძმებიდან მრავალთაგანით დამკვიდრდა ნოდის მიწაზე ედემის აღმოსავლეთით.

42 და შეიცნო კაენმა თავისი ცოლი და იგი დაორსულდა და შვა ენოქი. და მასაც ეყოლა მრავალი ვაჟი და ასული. და ააშენა მან ქალაქი და უწოდა სახელი ამ ქალაქს, როგორც თავის ძეს, ენოქი.

43 და შვა ენოქმა ყირადი და სხვა ვაჟები და ასულები. და ყირადმა შვა მეხუაელი და სხვა ვაჟები და ასულები. და მეხუაელმა შვა მეთუშაელი და სხვა ვაჟები და ასულები. და მეთუშაელმა შვა ლამექი.

44 და მოიყვანა ლამექმა ორი ცოლი; ერთის სახელი იყო ყადა, ხოლო მეორისა – ცილა.

45 და შვა ყადამ იაბალი. იგი იყო კარვებში მკვიდრთა და მეჯოგეთა მამა და ისინი მწყემსავდნენ ნახირს; და მისი ძმის სახელი იყო იუბალი. იგი იყო ყველა მეჩანგეთა და მესტვირეთა მამა.

46 და ცილამ აგრეთვე შვა თუბალ კაენი, მჭედელი სპილენძისა და რკინის ყოველგვარი საჭურვლის, თუბალკაენის დას ერქვა ნაყამა.

47 და ლამექმა უთხრა თავის ცოლებს: ყადა და ცილა, მოისმინეთ ჩემი ხმა, ლამექის ცოლებო, ყური უგდეთ ჩემს ნათქვამს, რადგან მოვკალი კაცი ჩემდა სატკივრად და ყმაწვილი, ჩემდა საგვემელად.

48 თუ კაენისთვის შვიდგზის იქნება შურისგებული, ჭეშმარიტად, ლამექისთვის – სამოცდაათჯერ შვიდგზის.

49 ვინაიდან ლამექმა, დადო რა აღთქმა სატანასთან კაენის მაგვარად, რომლითაც იგი ოსტატ მაჰანად იქცა, იმ დიდი საიდუმლოს მფლობელად, რომელიც გადაეცა კაენს სატანისგან; და ყირადმა, ენოქის ძემ, შეიტყო რა მათი საიდუმლო, დაიწყო ამის განდობა ადამის შვილთათვის.

50 ამიტომ, ლამექმა მრისხანებაში მოკლა იგი, არა როგორც კაენმა თავისი ძმა, აბელი, სარგებლისთვის, არამედ იგი მოკლა ფიცის გამო.

51 კაენის დღეებიდან არსებობდა საიდუმლო შეთქმულებები და მათი საქმენი იყო ბნელში და ყოველი მათგანი ცნობს თავის ძმას.

52 ამიტომ, უფალმა დაწყევლა ლამექი და მისი სახლი და ყოველი, ვინც სატანასთან დადო აღთქმა, ვინაიდან არ იცავდნენ ღვთის აღთქმებს და ამან გამოიწვია ღმერთის უკმაყოფილება და იგი აღარ უწევდა მათ დახმარებას, მათი საქმენი საძაგელი იყო და ადამიანის ყველა შვილებს შორის იწყო გავრცელება. და ეს იყო ადამიანის ვაჟთა შორის.

53 და ადამიანის ასულთა შორის ამაზე არ ლაპარაკობდნენ, ვინაიდან ლამექმა მოუყვა ეს საიდუმლო თავის ცოლებს და მას ისინი აუჯანყდნენ და გამოაცხადეს საყოველთაოდ ყოველივე ეს და არ უთანაგრძნეს.

54 ამიტომ ლამექი შეძაგებულ და განდევნილ იქნა და აღარ მოდიოდა ადამიანთა შვილებს შორის, რომ არ მომკვდარიყო.

55 და ამგვარად, ბნელეთის საქმეებმა დაიწყო ფართოდ გავრცელება ადამიანთა შვილებს შორის.

56 და ღმერთმა დაწყევლა დედამიწა მწარე წყევლით და განრისხდა ბოროტებზე, ყოველ ადამიანის შვილზე, რომელიც მან შექმნა;

57 ვინაიდან, ყურს არ უგდებდნენ მის ხმას, არც მისი მხოლოდშობილი ძის სწამდათ, მისი, რომლის შესახებ მან გამოუცხადა, რომ მოვიდოდა ჟამთასვლის ზენიტში, რომელიც მომზადებული იყო ამაქვეყნის დასაბამამდე.

58 და ამგვარად დაიწყო სახარების ქადაგება, დასაწყისიდან, ცხადდებოდა რა წმინდა ანგელოზების მიერ, მოვლენილნი ღმერთის გარემოცვიდან და მისი საკუთარი ხმით და სულიწმინდის ძღვენით.

59 და ამგვარად ყოველივე დადასტურებულ იქნა ადამისთვის, წმინდა წეს-ჩვეულებით და იქადაგებოდა სახარება; და ბრძანებულება გაიცა, რათა სახარება ყოფილიყო ამაქვეყნად მის დასასრულამდე; და ეს იყო ასე. ამინ.