1 Im Adam eaar eo̧ron̄e ainikien Anij, im kar kūr ioon ļōm̧aro nejin n̄an ukeļo̧k.

2 Im Adam eaar bar jeļā lio pāleen, im lio ar keotak juon ļaddik, im eaar ņa etan Set. Im Adam eaar wūjtake etan Anij; bwe eaar ba: Anij eaar letok n̄an eō bar juon ineō, n̄an bōk jikin Ebel, eo Kein ar m̧ane.

3 Im Anij eaar kwaļo̧k E make n̄an Set, im eaar jab jum̧ae, a eaar kōm̧m̧ane juon katok em̧m̧an, āinļo̧k wōt eo an ļeo jein Ebel. Im n̄an e barāinwōt eaar ļotak juon nejin em̧m̧aan, im eaar ņa etan Inōs.

4 Innām eaar ijjino an ļōm̧arein kūr ioon etan Irooj, im Irooj eaar kōjeraam̧m̧an er;

5 Im juon bok in keememej kar kōjparoke, eo ilo e kar ļo̧o̧ke, ilo kajin eo an Adam, bwe kar leļo̧k e n̄an jon̄an wōt lōn̄in eo eaar kūr ioon Anij n̄an jeje jān jitōbōn kabab-laļ;

6 Im jān er ro nejier rekar ekkatak n̄an kōnono ilo bok im n̄an jeje, im ekar wōr juon aer kajin eo me eaar lukkuun erreo im jab kabodān.

7 Kiiō ejja Priesthood in wōt, eo me ekar pād ilo jinoin, enaaj pād ilo jem̧ļo̧k in laļ in barāinwōt.

8 Kiiō en̄in kanaan eo Adam ar kōnono, ke kar kōm̧akūti jān Jetōb Kwōjarjar, im juon menmenbwij kar kōjparoke kōn ro nejin Anij. Im en̄in kar bok in epepen ko an Adam, im ba: Ilo raan eo Anij ar kōm̧anm̧an armej, ilo jekjek in Anij Eaar kōm̧m̧ane e;

9 Ilo nememen wōt Ānbwinnin make, m̧aan im kōrā, Eaar kōm̧anm̧an er, im kōjeraam̧m̧an er, im kūr etaer Adam, ilo raan eo ke kar kōm̧anm̧an er im rekar erom ro remour ilo āne eo ej eran neen Anij.

10 Im Adam ar mour jibukwi im jiln̄uul iiō ko, im eaar keotak juon nejin em̧m̧aan ilo jekjek in wōt e, ilo̧kan nememen eo an, im eaar ņa etan Set.

11 Im raan ko an Adam, ālikin an kar keotak Set, rekar ruwalitōkbukwi iiō, im eaar keotak elōn̄ m̧aan ro im kōrā ro;

12 Im aolep raan ko an Adam ar mour rekar ruwatimjuonbukwi im jiln̄uul iiō, im eaar mej.

13 Set eaar mour jibukwi im ļalem iiō, im eaar keotak Inōs, im eaar kanaan ilo aolep raan ko an, im kar katakin ļeo nejin Inōs ilo iaļ ko an Anij; kōn menin Inōs eaar kanaan barāinwōt.

14 Im Set ar mour, ālikin an keotak Inōs, ruwalitōkbukwi im jiljilimjuon iiō, im eaar keotak elōn̄ m̧aan ro im kōrā ro.

15 Im ro nejin armej raņ rekar kanooj lōn̄ ioon aolepān mejān āneo. Im ilo raan ko Setan ar ļap an pepe ilubwiljin armej raņ, im kar bwiltōn̄tōn̄ ilo burueer; im jān iien en m̧aanļo̧k ekar itok tariņae ko im kōto̧o̧rļo̧k bōtōktōk; im pein juon em̧m̧aan eaar ņae eo jein im jatin make, ilo kōjebare mej, kōnke jerbal ko reittino, im kappukote kajoor.

16 Aolep raan ko an Set rekar ruwatimjuonbukwi im jon̄oulruo iiō, im eaar mej.

17 Im Inōs ar mour ruwatimjuonn̄oul iiō, im keotak Keinan. Im Inōs im bwe eo bwe in armej ro an Anij raar wanlaļļo̧k jān āneo, me kar etan Sulon, im raar jokwe ilo juon āneen kallim̧ur, eo me kar ņa etan ilo̧kan ļeo nejin make, eo eaar ņa etan Keinan.

18 Im Inōs ar mour, ālikin an kar keotak Keinan, ruwalitōkbukwi im jon̄oulļalem iiō, im eaar keotak elōn̄ m̧aan ro im kōrā ro. Im aolep raan ko an Inōs rekar ruwatimjuonbukwi im ļalem iiō, im eaar mej.

19 Im Keinan eaar mour jiljilimjuonn̄oul iiō, im eaar keotak Mehalelel; im Keinan eaar mour ālikin an keotak Mehalelel ruwalitōkbukwi im en̄oul iiō, im eaar keotak m̧aan ro im kōrā ro. Im aolep raan ko an Keinan rekar ruwatimjuonbukwi im jon̄oul iiō, im eaar mej.

20 Im Mehalelel eaar mour jiljinon̄oul ļalem iiō, im eaar keotak Jered; im Mehalelel ar mour, ālikin an kar keotake Jered, ruwalitōkbukwi im jiln̄uul iiō, im eaar keotak m̧aan ro im kōrā ro. Im aolep raan ko an Mehalelel rekar ruwalitōkbukwi im ruwatimjuonn̄oul ļalem iiō, im eaar mej.

21 Im Jered ar mour jibukwi im jiljinon̄oul ruo iiō, im eaar keotak Inok; im Jered ar mour, ālikin an kar keotak Inok, ruwalitōkbukwi iiō, im eaar keotak m̧aan ro im kōrā ro. Im Jered eaar katakin Inok ilo aolep iaļ ko an Anij.

22 Im en̄in ej menmenbwij eo an ļōm̧aro nejin Adam, eo eaar nejin Anij, eo ippān Anij, e make, eaar kōm̧m̧ao.

23 Im rekar rikwaļo̧k in wānōk, im raar kōnono im kanaan, im kūr ioon aolep armej, ijoko jabdewōt, n̄an ukeļo̧k; im tōmak kar katakin n̄an ro nejin armej raņ.

24 Im ālikin men kein aolep raan ko an Jered rekar ruwatimjuonbukwi im jiljinon̄oul ruo iiō, im eaar mej.

25 Im Inok ar mour jiljinon̄oul ļalem iiō, im eaar keotak Mitusela.

26 Im ālikin men kein ke Inok eaar ito-itak ilo āneo, ilubwiljin armej ro; im ke eaar ito-itak, Jitōbōn Anij eaar wanlaļtak jān lan̄, im pād ioon.

27 Im eaar ron̄ juon ainikien jān lan̄, ej ba: Inok, nejū m̧aan, kwōn kanaan n̄an armej rein, im ba n̄an er—Ukeļo̧k, bwe āindein Irooj ej ba: N̄aij illu ippān armej rein, im Aō illu ekijon̄ ej urur ņae er; bwe burueer rekar kanooj pen, im lo̧jiln̄ier reron̄iia n̄an ron̄jake, im mejaer rej jab maron̄ lo ettoļo̧k;

28 Im n̄an epepen kein rellōn̄, jān wōt raan eo Iaar kōm̧anm̧an er, rekar jebwābwe, im kar kaarmejjete Eō, im kar kappukot kapilōk ko aer make ilo marok; im ilo mennin jōjō ko aer make rekar āeiki uror, im rekar jab kōjparok kien ko, ko Iaar liļo̧k n̄an jemāer, Adam.

29 Kōn menin, rekar kanejnej im̧aanļo̧k kōn nana n̄an er make, im, jān kanejnej ko aer, rekar bōktok ioer make mej; im juon hell em̧ōj Aō kōpooje n̄an er, eļan̄n̄e rej jab ukeļo̧k;

30 Im en̄in ej juon kean̄, eo em̧ōj Aō jilkinļo̧k ilo jinoin laļ, jān Lo̧n̄iiū make, jān foundasōn eo an, im jān lo̧n̄iin ro karejera, ro jemām̧i, em̧ōj Aō kean̄ kake, em̧ool āinwōt naaj jilkinļo̧k m̧aanļo̧k ilo laļ in, n̄an jem̧ļo̧k ko an.

31 Im ke Inok eaar ron̄ naan kein, eaar badikdik make n̄an laļ, im̧aan Irooj, im eaar kōnono im̧aan Irooj, im ba: Etke iaar lo jouj ilo Mejam̧, im n̄aij juon ļaddik wōt, im aolep armej rej dike eō; bwe n̄aij rum̧wij ilo kōnono; ekōjkan n̄aij karejeram̧?

32 Im Irooj eaar ba n̄an Inok: Kwōn ilo̧k im kōm̧m̧an āinwōt Iaar jiron̄ eok, im ejjeļo̧k armej enaaj wākare eok. Kwōn kōpeļļo̧k lo̧n̄iūm, im enaaj obrak, im Inaaj lewōj n̄an eok ekkōnono, bwe aolep kanniōk ej ilo Peiū, im Inaaj kōm̧m̧an āinwōt an em̧m̧an n̄an Eō.

33 Kwōn ba n̄an armej rein: Kom̧in kāālet rainin, n̄an jerbal n̄an Irooj Anij eo eaar kōm̧anm̧an kom̧.

34 Lo Aō Jetōb ej pād ioom, kōn menin aolep naan ko am Inaaj kajejjeti; im toļ ko renaaj ko im̧aam, im reba ko renaaj oktak jān aer to̧o̧rļo̧k; im kwo naaj jokwe ilo N̄a, im N̄a ilo kwe; kōn menin etetal Ippa.

35 Im Irooj eaar ekkōnono n̄an Inok, im ba n̄an e: Kwōn kapit māj ko mejam̧ kōn kle, im kwaļi, im kwo naaj lo. Im eaar kōm̧m̧an āinwōt.

36 Im eaar lo jetōb ro Anij eaar kōm̧anm̧an er; im eaar lo barāinwōt men ko me rekar jab kanemarmej n̄an mejān kanniōk; im jān iien eo m̧aanļo̧k eaar itok ennaan eo ijo ettoļo̧k ilo āneo: Juon rilolo em̧ōj an Irooj kōjerkak tok n̄an armej ro An.

37 Im ālikin men kein Inok eaar ilo̧k ilo āneo, ilubwiljin armej ro, im jutak ioon bat ko im jikin ko reutiej, im kar kūr kōn juon ainikien eļļaaj, im kam̧ool ņae jerbal ko aer; im aolep armej ro rekar ļōkatip kōnke e.

38 Im rekar maattok n̄an ron̄jake e, ioon jikin ko reutiej, im ba n̄an rilale em̧ nuknuk ko: Kom̧in pād ijin im kōjparok em̧ nuknuk kein, ke kōmij ilo̧k ijjuweo n̄an lo rilolo eo, bwe ej kanaan, im ewōr juon men eruwamāejet ilo āneo; juon em̧m̧aan eawiia ekar itok ilubwiljid.

39 Im ālikin men kein ke rekar ron̄jake e, ejjeļo̧k armej eaar likūt pein ioon; bwe mijak eaar itok ioon aolepān ro rekar ron̄jake e; bwe eaar etetal ippān Anij.

40 Im eaar wōr juon armej eaar itok n̄an e, eo etan ar Maija, im eaar ba n̄an e: Kwōn ba n̄an kōm ilo alikkar wōn kwe, im jān ia kwaar itok?

41 Im eaar ba n̄an er: Iaar itok jān āneen Keinan, āneo āneen ro jema, juon āneen wānōk n̄an rainin. Im jema eaar katakin eō ilo aolep iaļ ko an Anij.

42 Im ālikin men kein, ke iaar ito-itak jān āneen Keinan, iturinļo̧k lo̧jet n̄an rear, iaar lo juon visōn; im lo, iaar loi lan̄ ko, im Irooj eaar ekkōnono ippa, im letok n̄an eō kien; kōn menin, kōn un in, n̄an kōjparok kien eo, ij ekkōnono naan kein.

43 Im Inok eaar wōnm̧aanļo̧k wōt ilo ekkōnono eo an, im ba: Irooj eo me eaar ekkōnono ippa, ejja in wōt ej Anij in lan̄, im E ej aō Anij, im ami Anij, im kom̧ ij ro jeiū im jatū, im etke kom̧ ij pepe ippemi make, im kaarmejjete Anij in lan̄?

44 Im lan̄ ko Eaar kōm̧m̧ani; im laļ ej An eran ne; im foundasōn eo an ej An. Lo, E eo ar erļo̧ke, im juon bwij in armej raņ Eaar bōktok er ioon mejān laļ.

45 Im mej ar itok ioon ro jemād; mekarta jejeļā er, im jab maron̄ kariabe, im em̧ool eo m̧oktata in aolep jejeļā, em̧ool Adam.

46 Bwe juon bok in keememej eo jaar jeje ilubwiljid, ekkar n̄an jon̄ok eo kar letok in addiin Anij; im kar letok e ilo kajin eo ad make.

47 Im ke Inok eaar ekkōnono naan ko an Anij, armej ro raar wūdiddid, im kar jab maron̄ jutak wōt im̧aan mejān.

48 Im eaar ba n̄an er: Kōnke Adam eaar wōtlo̧k, kōj jej pād; im jān wōtlo̧k eo an eaar itok mej; im kōj em̧ōj kōm̧m̧an bwe jen ribōk jān būrom̧ōj im en̄taan.

49 Lo Setan eaar itok ilubwiljin ro nejin armej raņ, im ej kapo er n̄an kabun̄-jar n̄an e; im armej raņ rekar erom rim̧ōm̧ an kanniōk, rijuwaļōn̄ļōn̄, im rianōk devil, im rekar m̧wijkōk jān im̧aan mejān Anij.

50 A Anij eaar kōjjeļāik ro jemād bwe aolep armej reaikuj ukeļo̧k.

51 Im Eaar kūr ioon jemād Adam kōn ainikien make, im ba: N̄a Anij; Iaar kōm̧anm̧an laļ, im armej raņ m̧okta jān aer kar pād ilo kanniōk.

52 Im Eaar barāinwōt ba n̄an e: Eļan̄n̄e kwo naaj oktaktok n̄an Eō, im eo̧ron̄ ainikiō, im tōmak, im ukeļo̧k jān aolep bōd ko am, im peptaij, em̧ool ilo dān, ilo etan Nejū Iaar Make Keotake, eo eobrak kōn jouj im m̧ool, eo ej Jisōs Kraist, āt eo wōt me naaj leļo̧k ium̧win lan̄, eo jān e lo̧mo̧o̧r enaaj itok n̄an ro nejin armej raņ, kwo naaj bōk mennin letok eo an Jetōb Kwōjarjar, im kajjitōk aolep men ko ilo etan, im jabdewōt kwo naaj kajjitōk, naaj lewōj e n̄an eok.

53 Im jemād Adam eaar ekkōnono n̄an Irooj, im ba: Etke armej raņ reaikuj ukeļo̧k im peptaij ilo dān? Im Irooj eaar ba n̄an Adam: Lo Iaar jeorļo̧k am bōd ilo Jikin Kallib in Iden.

54 Jān men in eaar itok ennaan eo ijoko rettoļo̧k ilubwiljin armej ro, bwe eo Nejin Anij eaar pinmuur kōn bōd eo m̧oktata, eo jān e jero̧wiwi ko an ro jemād im jined rejjab maron̄ uwaak kaki ioon bōran ro nejier, bwe rōdipiio jān foundasōn eo an laļ.

55 Im Irooj eaar ekkōnono n̄an Adam, im ba: Toun wōt an ro nejimi ļotak tok ilo jero̧wiwi, em̧ool āindein n̄e rej jinoin eddekļo̧k, burueer etta kōn jero̧wiwi, im rej edjon̄e meo̧ eo, bwe ren maron̄ jeļā wōņāān men eo em̧m̧an.

56 Im em̧ōj leļo̧k n̄an er n̄an jeļā em̧m̧an jān nana; kōn menin rej ripinej jenkwaer make, im em̧ōj Aō lewōj n̄an kom̧ bar juon kien im naan in jiron̄.

57 Kōn menin katakin e n̄an ro nejim, bwe aolep armej raņ, ijoko jabdewōt, reaikuj ukeļo̧k, ak reban maron̄ ilo jabdewōt wāween jolōte aelōn̄ in Anij, bwe ejjeļo̧k men ettoon emaron̄ jokwe ijo, ak jokwe ilo im̧aan Mejān; bwe, ilo kajin eo an Adam, Armej in Kwōjarjar ej Etan, im etan eo Nejin Eaar Make Keotake ej eo Nejin Armej, em̧ool Jisōs Kraist, juon Riekajet ejim̧we, eo Enaaj itok ilo ioļapļap in iien.

58 Kōn menin Ij lewōj n̄an eok juon kien, n̄an katakin men kein ilo ejjeļo̧k idadik n̄an ro nejimi, im ba:

59 Bwe jān wōt bōd eaar itok wōtlo̧k eo, wōtlo̧k eo me ej bōktok mej, im toun wōt ami kar ļotak tok ilo laļ in jān dān, im bōtōktōk, im jetōb, eo Iaar kōm̧anm̧ane, im āindein erom jān būn̄al juon rimour, em̧ool āindein kom̧ aikuj bar ļotaktok ilo aelōn̄ in lan̄, jān dān, im jān Jetōb, im karreo jān bōtōktōkin Nejū Iaar Make Keotake; bwe kom̧in maron̄ kokwōjarjar jān aolep jero̧wiwi, im m̧ōņōņō ilo naan ko an mour indeeo ilo laļ in, im mour indeeo ilo laļ eo ej itok, em̧ool aiboojoj indeeo;

60 Bwe jān wōt dān eo kom̧ ij kōjparok kien eo; jān Jetōb kom̧ ij jejjet, im jān bōtōktōk eo kom̧ ij ekwōjarjar;

61 Kōn menin em̧ōj lewōj e n̄an pād ilo kwe; ļo̧o̧k in lan̄ eo; Rikaenōm̧m̧an eo; mennin kaenōm̧m̧an ko an aiboojoj indeeo; m̧ool in aolep men ko otemjeļo̧k; men eo ej ļijur aolep men otemjeļo̧k, eo me ej kōmour aolep men otemjeļo̧k; eo ejeļā aolep men otemjeļo̧k, im ewōr ippān aolep kajoor ekkar n̄an mālōtlōt, tūriam̧o, m̧ool, jim̧we, im ekajet.

62 Im kiiō, lo, Ij ba n̄an eok: En̄in ej karōk in lo̧mo̧o̧r eo n̄an aolep armej, kōn bōtōktōkin Nejū Iaar Make Keotake, eo enaaj itok ilo ioļapļap in iien.

63 Im lo, aolep men otemjeļo̧k ewōr jekjekier, im aolep men otemjeļo̧k rej ejaak im kōm̧anm̧an n̄an kam̧ool kōn Eō, jim̧or men ko me rej ilo kanniōk, im men ko me rej ilo jetōb; men ko me rej ilo lan̄ ko ilōn̄, im men ko me rej pād ioon laļ, im men ko me rej ilo laļ, im men ko me rej pād ium̧win laļ, jim̧or ilōn̄ im ium̧win: aolep men ko otemjeļo̧k rej kam̧ool kōn Eō.

64 Im ālikin men kein, ke Irooj ar dedeļo̧k an ekkōnono ippān Adam, jemād, Adam ar kūr n̄an Irooj, im Jetōb eo an Irooj eaar bōkļo̧k e, im kar bōklaļļo̧k e ilo dān eo, im kar likūt e ium̧win dān eo, im kar katotok e jān dān eo.

65 Im āindein eaar peptaij, im Jetōb eo an Anij eaar wōtlo̧kļo̧k ioon, im āindein eaar ļotak jān Jetōb eo, im kar ļijur armej ilo ilowa ilo e.

66 Im eaar ron̄ juon ainikien jān lan̄, ej ba: Kwe em̧ōj am peptaij kōn kijeek, im kōn Jetōb Kwōjarjar. En̄in ej ļo̧o̧k eo an Jemān, im an Nejin, jān iien in m̧aanļo̧k im indeeo;

67 Im kwe kwōj iļo̧kan koņ eo an E eo ekar ejjeļo̧k jinoin raan ko ak jem̧ļo̧kin iiō ko, jān aolep indeeo n̄an aolep indeeo.

68 Lo, kwe kwōj juon ilo N̄a, juon nejin Anij; im āindein aolep remaron̄ erom ro nejū m̧aan. Amen.