សម្រាប់តែឌីជីថលប៉ុណ្ណោះ ៖ យុវមជ្ឈិមវ័យ

របៀបដើម្បីនៅលើ ប៉ុន្តែមិននៅក្នុងបណ្ដាញសង្គម

ដោយ ហ្វេស ហ្វើរហ្គ័សុន

នេះគឺជារបៀបមួយចំនួនតូចដែលខ្ញុំបានរៀន ដើម្បីប្រើប្រាស់បណ្ដាញសង្គមជាឧបករណ៍មួយសម្រាប់សេចក្ដីល្អ ។

ខ្ញុំគិតថា ពេលខ្លះយើងទាំងអស់គ្នាអាចជាប់នៅក្នុងបណ្ដាញសង្គម មិនថាវាជាការសុបិនអំពីផ្ទះដ៏ស្អាតបំផុតក្នុងអនាគត ការរកមើលរបៀបដែលយើងអាចធ្វើឲ្យការតុបតែងមុខរបស់យើងមើលទៅឥតខ្ចោះ ឬការប្រាថ្នាថាយើងបានទៅដំណើរកម្សាន្តដែលមិត្តរួមការងារចាស់របស់យើងបានទៅ ។ ខណៈដែលបណ្ដាញសង្គមអាចត្រូវបានប្រើប្រាស់សម្រាប់គោលបំណងល្អៗជាច្រើន វាក៏អាចធ្វើឲ្យយើងឈឺចាប់ ដោយការបំផ្លាញទំនុកចិត្តរបស់យើង ការធ្វើឲ្យការរំពឹងទុករបស់យើងខ្ពស់ជ្រុលបន្តិច និងការបង្កើនភាពច្រណែនដែលយើងមានចំពោះអ្នកដទៃទៀត ។

ក្នុងនាមជា blogger ម្នាក់ ខ្ញុំបានឃើញថា ខ្លួនខ្ញុំងាយទទួលរងផលប៉ះពាល់ពីផលពិបាកនៃបណ្ដាញសង្គមដែលធ្វើឲ្យខូចខាតទាំងនេះ ។ ខ្ញុំបានរៀនពីរបៀបនានាដែលខ្ញុំអាចនៅលើបណ្ដាញសង្គម ប៉ុន្តែមិនធ្វើឲ្យវាស្ថិតនៅក្នុងការផ្ដោតនៃជីវិតពីមួយថ្ងៃទៅមួយថ្ងៃរបស់ខ្ញុំ ។ នេះគឺជារបៀបមួយចំនួនដែលខ្ញុំធ្វើ ដែលជួយខ្ញុំឲ្យប្រើប្រាស់បណ្ដាញសង្គមជាឧបករណ៍មួយសម្រាប់សេចក្ដីល្អ ៖

ដាក់កំណត់រយៈពេលដែលអ្នកនឹងចំណាយនៅលើបណ្ដាញសង្គមរាល់ថ្ងៃ ។ បើមិនដូច្នោះទេ នាទីអាចក្លាយទៅជារាប់ម៉ោង ។
មានគោលបំណងមួយពេលចូលប្រើបណ្ដាញសង្គម ។ បើអ្នកនៅលើបណ្ដាញសង្គមដោយគ្មានគោលបំណងមួយនៅក្នុងចិត្តទេ ( ឧទាហរណ៍ ពេលអ្នកចូលប្រើដោយគ្រាន់តែដើម្បីមានអ្វីធ្វើ ព្រោះអ្នកធុញ ) នោះជាពេលដែលអ្នកទំនងជានឹងខ្ជះខ្ជាយពេលវេលាច្រើនបំផុត ។
ចូរចងចាំពីរូបភាពដែលធំជាង ។ មនុស្សជាច្រើននៅលើបណ្ដាញសង្គម គ្រាន់តែបង្ហាញផ្នែកល្អៗនៃជីវិតរបស់ពួកគេប៉ុណ្ណោះ ហើយវាអាចធ្វើឲ្យវាមើលទៅដូចជាអ្វីទាំងអស់ដែលពួកគេដកពិសោធន៍ គឺពន្លឺព្រះអាទិត្យ និងឥន្ទធនូរហូតតែម្ដង ។ ប៉ុន្តែអ្នកពុំបានឃើញអ្វីគ្រប់យ៉ាងនោះទេ ។ ខាងក្រោយឆាក ជីវិតរបស់ពួកគេប្រហែលជាច្របូកច្របល់ដូចជាជីវិតរបស់អ្នកដែរ ។ កុំប្រៀបធៀបខ្លួនឯងទៅនឹងមនុស្សដទៃទៀត ។ អ្នកមានគ្រប់គ្រាន់ហើយ ហើយអ្នកមានគុណសម្បត្តិគ្រប់គ្រាន់ ។ អែលឌើរ ហ្គែរី អ៊ី ស្ទីវ៉ែនសុន ក្នុងកូរ៉ុមនៃពួកសាវកដប់ពីរនាក់បានរំឭកយើងថា « ការប្រៀបធៀបរូបភាពជីវិតដែលហាក់ដូចជាធម្មតាៗរបស់យើងផ្ទាល់ ទៅនឹងជីវិតរបស់អ្នកដទៃទៀតដែលបានកែច្នៃយ៉ាងល្អ នឹងឥតខ្ចោះដូចដែលបានបង្ហាញនៅក្នុងប្រព័ន្ធផ្សព្វផ្សាយសង្គម អាចធ្វើឲ្យយើងមានអារម្មណ៍បាក់ទឹកចិត្ត ច្រណែន និងបរាជ័យ » ។^១
សូមកុំទាញខ្លួនឯងចូលក្នុងភាពអវិជ្ជមាន ។ ប្រសិនបើមានអ្វីដែលតែងតែទាញអារម្មណ៍អ្នកឲ្យធ្លាក់ចុះឥតឈប់ឈរ នោះសូម unlike, unfollow ឬ unfriend ។ បណ្ដាញសង្គមមិនគួរធ្វើឲ្យអ្នកមានអារម្មណ៍ធ្លាក់ទឹកចិត្តនោះទេ ។ សូម Follow, friend និង like មនុស្ស និងអ្វីដែលនឹងជួយអ្នក និងជីវិតអ្នកឲ្យប្រសើរឡើង ។
សូមព្យាយាមស្រឡាញ់ លើកទឹកចិត្ត និងបំផុសអ្នកដទៃទៀត ។ ជាជាងឲ្យការប្រើបណ្ដាញសង្គមដើម្បីធ្វើឲ្យខ្លួនឯងមើលទៅល្អ សូមព្យាយាមបង្ហោះអ្វីដែលជួយអ្នកដទៃទៀតមានអារម្មណ៍ថាមានគេស្រឡាញ់ និងសំខាន់ ។ ចែកចាយសេចក្ដីល្អ ។ ត្រូវដឹងពីមនុស្សដែលមើលទៅដូចជាពួកគេត្រូវការមិត្តភក្ដិ ហើយឈោងទៅជួយពួកគេដើម្បីចែកចាយសារលើកស្ទួយមួយ !

អែលឌើរ ស្ទីវ៉ែនសុន ក៏បានមានប្រសាសន៍ផងដែរថា « ដូចដែលស៊ីស្ទើរ ប៊ូននី អិល អូស្ការសិន បានរំឭកយើង…ភាពជោគជ័យក្នុងជីវិតពុំមែនកំណត់លើចំនួន Like ដែលយើងទទួលបាន ឬចំនួនមិត្តភក្ដិ ឬអ្នក Follow នៅលើបណ្ដាញសង្គមដែលយើងមាននោះឡើយ ។ ទោះយ៉ាងណា វាពិតជាមានអត្ថន័យក្នុងការទំនាក់ទំនងជាមួយអ្នកផ្សេងទៀត ហើយបន្ថែមពន្លឺទៅដល់ជីវិតពួកគេ » ។^២

នោះគួរតែជាគោលដៅខ្ពស់បំផុតរបស់យើង ពេលប្រើប្រាស់បណ្ដាញសង្គម ។

ចូរចាំថា ពេលយើងមើលបណ្ដាញសង្គមតាមរយៈកែវភ្នែកដំណឹងល្អ ហើយព្យាយាមប្រើវានៅក្នុងរបៀបវិជ្ជមាន នោះយើងនឹងមិនជាប់នៅក្នុងគំនិតនៃការប្រៀបធៀប ឬខកចិត្តនោះទេ ។ ផ្ទុយទៅវិញ យើងនឹងចេញពីបណ្ដាញសង្គម ដោយមានអារម្មណ៍លើកស្ទួយ និងជំរុញឲ្យធ្វើល្អ ។

ស្វែងរកបន្ថែមទៀត

អ្នកអាចស្វែងរកអត្ថបទបន្ថែមទៀតអំពីការវិនិច្ឆ័យ និងបណ្ដាញសង្គម នៅក្នុងវគ្គយុវមជ្ឈិមវ័យក្នុង លីអាហូណា ខែ ធ្នូ ឆ្នាំ ២០២០ ។

សូមមើលយុវមជ្ឈិមវ័យប្រចាំសប្តាហ៍ ដែលមាននៅក្នុងវគ្គយុវមជ្ឈិមវ័យនៃកម្មវិធីបណ្ណាល័យដំណឹងល្អ សម្រាប់មាតិកាបំផុសគំនិតថ្មីៗសម្រាប់យុវមជ្ឈិមវ័យរៀងរាល់សប្តាហ៍ ។