“Ko e Lavameʻa ʻi Hono Vahevahe ʻo e Ongoongoleleí,” Liahona, ʻOkatopa 2022.
Ko e Lavameʻa ʻi Hono Vahevahe ʻo e Ongoongoleleí
ʻE lava ke faingofua pē ʻa e ngāue fakafaifekaú ʻo hangē ko e “ʻofá, vahevahé, mo e fakaafé.”
Naʻe kaungāmeʻa ʻa ʻEti mo Kilisitina (toʻohemá) mo Peleni mo Sesikā (ʻi lotó) mo hona fāmilí ʻi he taimi ne nau hiki mai ai ki he uōtí. Naʻe papitaiso ʻa Peleni kimui ange ʻe ʻEti.
ʻI he taimi naʻe hiki mai ai ha fāmili foʻou ki honau uōtí, naʻe fakakaukau ʻa ʻEti mo Kilisitina Palaesi ke na fakamaheni kiate kinautolu. ʻI he tuku ʻa e lotú, naʻe ʻalu ʻa Kilisitina kia Peleni Vikasi ʻo ne kamataʻi ha fepōtalanoaʻaki. Ne ʻikai fuoloa kuo nau kau fakataha mo e kaumeʻa ʻo Peleni ko Sesikā ʻEsipinosá. Koeʻuhí naʻá na fakatou maʻu ha ongo foha toki fāʻeleʻi, naʻe fakafehokotaki leva ʻa Kilisitina mo Sesikā he taimi pē ko iá.
Naʻe pehē ʻe ʻEti, “Ko Pelení ko e tamasiʻi lōloa ʻa ia ʻe ʻi ai ha kakai ʻe niʻihi te nau ongoʻi teteki, ka naʻá ku ongoʻi pē ko ha tangata lelei ia. ʻOku ou manatuʻi ʻeku fakakaukau ko ha taha ʻeni ʻoku ou fuʻu fie ʻilo lahi ange ki ai.”
ʻI he fakaʻau ke toe maheni ange ʻa e fāmili Palaesí mo e fāmili ʻEsipinosá/Vikasí, naʻa nau faʻa fefakaafeʻiʻaki ke maʻu meʻatokoni efiafi. ʻI ha efiafi ʻe taha, naʻe fakamatalaʻi ai ʻe Peleni mo Sesikā ʻa e hisitōlia ʻo Peleni ʻi he ongoongoleleí. Naʻe ʻosi maʻu ʻe Peleni ʻa e ngaahi lēsoni fakafaifekaú ʻi he ngaahi taʻu siʻi kimuʻa koeʻuhí kuo ʻosi kau ʻa Sesikā ia ki he Siasí, pea neongo naʻá ne fiefia he fakataha mo e ongo ʻeletaá, ka naʻá ne fili ke ʻoua ʻe papitaiso he taimi ko iá.
ʻI he fakalotolahi ʻa Sesikā mo e fāmili Palaesí, naʻá ne fakakaukau ai ke toe feʻiloaki mo e ongo faifekaú. Naʻe lahi feʻunga ʻene fakalakalaká ʻi he ngaahi lēsoni ʻa e kau faifekaú peá ne fakakaukau ai mo Sesikā ʻoku fie maʻu ke na mali. Naʻe poupouʻi ʻe he fāmili Palaesí ʻa e fili ko ʻení pea hokohoko atu ʻenau poupouʻi ʻa Peleni ʻi heʻene feʻiloaki mo e ongo faifekaú. Naʻe mali ʻa Peleni mo Sesikā ʻi Siulai ʻo e 2019 ʻa ia naʻe fakahoko e ouaú ʻe heʻena pīsopé, ko ʻEti Palaesí.
Lolotonga e mahaki fakaʻauha COVID-19, naʻe lava ke toe fakataha e ngaahi fāmilí. Naʻe talaange ʻe Sesikā ki he kau Palaesí naʻe fakakaukau ʻa Peleni kuó ne mateuteu ke papitaiso. Naʻe fakapapauʻi ʻe he malimali ʻa Pelení ʻa e fakamatala ko ʻení.
Naʻe pehē ʻe Kilisitina, “Naʻa mau fetuʻutaki he taimi pē ko iá ki he ongo faifekau sisitaá ʻo talaange ʻoku fie papitaiso ʻa Peleni. Ko e ʻaho Pulelulú ia, pea ʻi he ʻaho Tokonakí, naʻe papitaiso ia.”
Naʻá ne hoko atu ʻo pehē, “ʻI he ʻaho hono papitaisó, naʻe fāʻofua mai ʻa Peleni kiate kimautolu. ʻOku ou manatuʻi ʻeku houngaʻia moʻoni ʻi heʻena fakaʻatā kimautolu ke mau kau atu ki he fononga ko ʻeni mo hona fāmilí.”
Hili ha taimi nounou mei hono papitaiso ʻo Pelení, naʻe fakahaaʻi ʻe Sesikā ʻene fie ʻalu ki he temipalé. Hili ʻene talanoa mo e kau taki fakauōtí mo kau ʻi he kalasi teuteu ki he temipale honau uōtí, naʻe lava ke maʻu ʻe Sesikā hono ʻenitaumení ʻi he Temipale Orlando Florida hili hono toʻo e ngaahi fakangatangata ʻo e COVID-19.
Naʻe lava foki ʻe he ongomātuʻa ʻa Sesikaá ʻo fakafoʻou ʻena lekomeni temipalé pea naʻá na ʻi he temipalé fakataha mo Sesikā. Naʻe lava foki ke maʻu ʻe he foha lahi ʻo Sesikā mo Peleni ko ʻĪlaí ʻa e Lakanga Taulaʻeiki Faka-ʻĒloné.
ʻI he kamata ako ʻa Peleni ʻa e ngaahi lēsoni maʻá e kau mēmipa foʻoú mo kau ʻi he ngāue hisitōlia fakafāmilí, naʻe lava ke ne kumi e ngaahi hingoa ʻo e kau mēmipa hono fāmilí ke ʻave ki he temipalé. Naʻe toki pekiá ni ʻa e tamai ʻa Pelení, ko ia ʻoku teuteu ʻa Peleni ke fakahoko e ngāue fakatemipale ʻa ʻene tamaí.
Naʻe teuteuʻi ʻe Sesikā ʻa e ngāue hisitōlia fakafāmilí maʻa ʻene tamai totonú mo e kau mēmipa kehe ʻo e fāmilí ke fakapapauʻi naʻa nau maʻu honau ngaahi ouau fakatemipalé. Naʻe fakafofongaʻi ʻe he foha ʻo Sesikā ko ʻĪlaí e papitaiso ʻene kui tangatá.
Naʻe fakahaaʻi ʻe he fāmili Palaesí ʻa e founga fakanatula ke vahevahe ai ʻa e ongoongoleleí. Naʻe pehē ʻe he ʻofefine ʻi he fāmili Palaesí ko ʻEpi, “Ko e fuofua kaungāmeʻa mo kinautolú ko e meʻa ia naʻá ne tokoniʻi kimautolu ke vahevahe ʻa e ongoongoleleí mo kinautolú.” ʻOku tui ki ai ʻa Kilisitina, “Naʻe faingofua ʻaupito ʻemau talanoa kiate kinautolu fekauʻaki mo e ongoongoleleí koeʻuhí he ʻoku mau ʻofa lahi ʻiate kinautolu, pea naʻe ʻikai ha meʻa te mau toe fie maʻu ka ko ʻemau sio pē ki heʻenau ofi ange ki he ʻEikí.”