Fakakomipiuta Pē
Ko e Fiefia mo e Meʻaʻofa ʻo e Fakatomalá—Ngaahi Pōpoaki Fakamuimuitaha mei he Kau Palōfitá mo e Kau ʻAposetoló
Vakai ki he meʻa ne toki akoʻi kimuí ni ʻe he kau palōfita moʻuí ʻi he mītia fakasōsialé fekauʻaki mo e fakatomalá.
Naʻe fakaafeʻi kitautolu ʻe Palesiteni Lāsolo M. Nalesoni ʻi he konifelenisi lahi ʻo ʻEpeleli 2022 ke tau “ʻiloʻi e fiefia ʻo e fakatomala fakaʻahó.”1 Naʻá ne toe pehē:
“Ko e fakatomalá ʻa e kī ki he fakalakalaká. ʻOku ʻai kitautolu ʻe he tui haohaoá ke tau laka atu ki muʻa ʻi he hala ʻo e fuakavá.
“Kātaki ʻoua ʻe manavasiʻi pe fakatoloi e fakatomalá. ʻOku fiefia ʻa Sētane ia ʻi hoʻo mamahí. Fakangata ia ke taʻofi. Kapusi hono ivi tākiekiná ki tuʻa mei hoʻo moʻuí! Kamata ke ke aʻusia he ʻahó ni ʻa e fiefia ʻi hono siʻaki ʻa e tangata fakaekakanó. ʻOku ʻofeina maʻu pē kitautolu ʻe he Fakamoʻuí kae tautefito ki he taimi ʻoku tau fakatomala aí.”2
Kuo lea ʻa e kau mēmipa ʻo e Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ʻi he konifelenisi lahí ki he fiefia ʻo e fakatomalá. Kuo nau vahevahe foki ha ngaahi pōpoaki fekauʻaki mo e tefito ko ʻení ʻi he mītia fakasōsialé, kau ai e ngaahi meʻá ni:
Fakatomalá mo e Fakafiemālié ʻo fakafou ʻia Kalaisi
“ʻOku ʻi ai e ngaahi ongo fakaeloto ʻa e ʻOtuá. ʻOkú Ne tokangaʻi kitautolu ʻaki e ʻofa kotoa ʻa ha mātuʻa ʻofa. ʻOku ou fakakaukauloto atu ki he fiefia naʻá Ne ongoʻi ʻi Heʻene ʻafioʻi ʻe iku maʻu ʻe [Hono ʻAlo ʻOfaʻangá] ha ikuna nāunauʻia ʻi he angahalá mo e maté—ʻo fakaava e ngaahi matapā ʻo e ngaahi faingamālie fakalangí kae lava ke tau toe nofo mo kinautolu ʻoku tau ʻofa aí.
“Ka ʻoku ou tui foki naʻe mele ʻEne fiefiá ʻi he ʻilo haohaoa ki he meʻa ʻoku tatali mai ki Hono ʻAlo ʻOfaʻangá. … ʻE foua ʻe he ʻAlo tatau pē ko ʻení ha mamahi kuo teʻeki, pea he ʻikai pē ke toe aʻusia ia ʻe ha taha.
“Ka koeʻuhí ʻoku ʻofa lahi ʻetau Tamai Hēvaní ʻiate kitautolu, naʻá Ne fakaʻatā ai e ngaahi meʻa fakafiefia mo fakamamahí ni ke nau fakahoko honau hala totonú. Koeʻuhí naʻe fiemaʻu ke fakahaofi ʻa e māmaní, pea koeʻuhí ʻoku tau fiemaʻu ʻa e fakahaofí, naʻá Ne fekauʻi mai ai ha Fakamoʻui.
“… Tau tali muʻa ʻa e meʻaʻofa haohaoa mo mahuʻinga ʻa e ʻOtuá. Tau tuku ʻetau ngaahi kavengá mo e angahalá ʻi he toʻukupu kelekele ʻo e Fakamoʻuí pea aʻusia ʻa e fiefia ʻoku maʻu mei he fakatomalá mo e liliú. Tau muimui muʻa ʻia Sīsū Kalaisi ʻo faʻifaʻitaki ki Heʻene moʻuí.“
Palesiteni Russell M. Nelson, Facebook, Dec, 24, 2021, facebook.com/russell.m.nelson.
Ko e Ongo ʻOku Maʻu ʻe he ʻOtuá ʻi Heʻetau Fai ha Ngaahi Fehalaakí
“Naʻe fehuʻi mai ʻe ha tokotaha kei talavou kiate au, ʻPalesiteni Pālati, ko e hā e ongo ʻoku maʻu ʻe he ʻOtuá kiate au ʻi he taimi ʻoku ou fai ai ha ngaahi fehalaakí?ʻ Mahalo kuó ke fifili foki mo koe ki he meʻá ni.
“ʻOku ʻofa ʻa e ʻOtuá ʻi Heʻene fānaú kotoa, pea ʻoku mahino kiate Ia ko e moʻuí ko ha aʻusia ia maʻatautolu hono kotoa. ʻOku ʻikai ke tau haohaoa. Te tau fai ha ngaahi fehalaaki. Kuó Ne foaki mai Hono ʻAlo ko Sīsū Kalaisí ke tokoniʻi kitautolu ke tau liliu mo ikunaʻi e moʻui fakamatelié.
“Ko hono aofangatukú, ʻoku totonu ke tau ako ke moʻui ʻi he founga ʻokú Ne finangalo ke tau moʻui aí, ka neongo pe ko e hā e vave ʻoku tau liliu mo fakalakalaka aí, ʻoku ʻikai lava ke liliu ʻEne ʻofa kiate kitautolú koeʻuhí ko ʻEne fānau kitautolu.
ʻOku lava ke tokoniʻi kitautolu ʻe he ʻEiki ko Sīsū Kalaisí ʻo fakaleleiʻi ha meʻa pē ʻe fiemaʻu ke fakaleleiʻi ʻi heʻetau moʻuí ʻo fakafou Heʻene feilaulau fakaleleí.“
Palesiteni M. Russell Ballard, Facebook, Sept. 16, 2021, facebook.com/mrussell.ballard.
Ngaahi Mana ʻo e Fakatomalá mo e Fakamolemolé
“ʻOku totonu ke tau feinga ke maʻu ha lelei ʻi he vakai ki he meʻa kuo hoko kimuʻá. ʻOku ou kōlenga atu ke mou manatuʻi ko e kuohilí ke ako mei ai, kae ʻoua ʻe nofo ai. ʻOku tau vakai ki muí ke ʻekea e malala ulo ʻo e meʻa ne tau fouá kae ʻikai ko e efuefú.
“Pea ko e taimi kuo tau ʻilo ai ʻa e meʻa naʻe fiemaʻu ke tau ako mo ʻomi ʻa e lelei taha ne tau aʻusiá, tau sio leva ki muʻa mo manatuʻi ko e tuí ʻoku tuhu maʻu pē ki he kahaʻú. Ko e tuí ʻoku fekauʻaki maʻu pē mo e ngaahi tāpuaki mo e moʻoni pea mo e ngaahi meʻa ʻoku teʻeki ke hoko ʻi heʻetau moʻuí.
“Mahalo ʻe fifili hamou niʻihi—tautautefito ki heʻetau moʻui ʻi he moveuveu fakaʻaho ʻo e māmaní he ʻahó ni—ʻʻOku ʻi ai nai ha kahaʻu maʻaku?ʻ Ko e hā haʻaku meʻa ʻe maʻu mei he taʻu foʻoú? Te u malu nai? ʻE lelei nai e moʻuí? ʻE lava nai ke u falala ki he ʻEikí pea mo e kahaʻú?
“Kātaki ʻo manatuʻi ʻeni: ʻoku falala ʻa e tuí ʻoku maʻu ʻe he ʻOtuá ha ngaahi meʻa maʻongoʻonga maʻatautolu takitaha pea ko Kalaisi moʻoni pē ʻa e ʻtaulaʻeiki lahi ʻo e ngaahi meʻa lelei ʻe hokóʻ (Hepelū 9:11).
“Tukutaha hoʻo tokangá ki hoʻo ngaahi fakaʻānauá, neongo pe ko e hā hono mamaʻó. Moʻui ʻi ha tuʻunga te ke lava ai ʻo mamata ʻi he ngaahi mana ʻo e fakatomalá mo e fakamolemolé, ʻo e falala mo e ʻofa fakalangi ko ē te ne liliu hoʻo moʻui he ʻaho ní, ʻapongiponngi, pea taʻengatá Ko ha tukupā ia ʻo e Taʻu Foʻoú ʻoku ou kole atu ke mou tauhi.“
ʻEletā Jeffrey R. Holland, Facebook, Feb. 28, 2022, facebook.com/jeffreyr.holland.
Ko Ha Meʻafoaki Fakamaʻa
“ʻOku liliu fakaʻaufuli ʻe he Fakalelei taʻefakangatangata ʻa e Fakamoʻuí ʻa e anga ʻo ʻetau vakai ki heʻetau ngaahi maumaufonó mo e tōnounoú. Te tau lava ʻo ako mei ai mo ongoʻi ha ʻamanaki lelei, kae ʻikai nofotaha ai mo ongoʻi he ʻikai toe lava ʻo huhuʻi mei ai pe siva e ʻamanakí. ʻOku fakaʻatā ʻe he meʻaʻofa faifakamaʻa ʻo e fakatomalá ke tau liʻaki ʻetau ngaahi angahalá pea hoko ko ha fakatupu foʻou.“
ʻEletā Dieter F. Uchtdorf, Facebook, June 5, 2021, facebook.com/dieterf.uchtdorf.
Ko ha Liliu ʻo e Lotó
“ʻOku liliu hotau lotó ʻe he ngaahi moʻoni ʻoku tau ako ʻi he temipalé fekauʻaki mo e ʻOtuá mo Sīsū Kalaisí—pea mo e ngaahi palōmesi ʻoku tau fai ke ʻofa mo tokoní. ʻOku siʻisiʻi ange ʻetau tokanga ki he meʻa ʻoku tau fiemaʻú kae lahi ange ki hono fakafenāpasi hotau lotó ki he finangalo ʻo e ʻOtuá. … Ko e tefitoʻi fatongia ʻo e fale ʻo e ʻEikí ke tau liliu pea hoko ko ha kakai foʻou ʻia Kalaisi.
“ʻOku faʻa fai e liliu ʻa e māmaní mei tuʻa ki loto. ʻOku tui ha tokolahi ko e founga lelei taha ki hono liliu ha tahá ko e liliu hono tūkungá.
“Neongo ia, ʻoku faʻa ngāue ʻa e ʻOtuá mei loto ki tuʻa. Kapau te tau fakaʻatā Ia, ʻe lava ke liliu ʻe he ʻOtuá hotau lotó—pea ʻoku tāpuekina kitautolu ʻaki ha ivi mo ha ivi ke liliu hotau tūkungá.
“ʻOku hanga ʻe he meʻa ʻoku tau ako mo palōmesi ʻi he ngaahi temipale māʻoniʻoní ʻo liliu kitautolu mei loto ki tuʻa, ʻo malava ai ke tau hoko ko ha kau ākonga mateaki ange ʻa Sīsū Kalaisi.“
ʻEletā David A. Bednar, Facebook, Apr. 19, 2022, facebook.com/davida.bednar.
Ko Hono ʻIloʻi ʻo e ʻEikí
“Mahalo ʻe tui hamou niʻihi ko Sīsū Kalaisí ko e ʻAlo Ia ʻo e ʻOtuá pea naʻá Ne fai ha feilaulau fakalelei taʻe-fakangatangata mo taʻengata. Ka te ke lava foki ʻo tui ʻoku ngāue pē ʻEne Fakaleleí maʻá e taha kotoa pē—tukukehe koe. ʻOkú ke fakaʻaongaʻi hoʻo tui ki he Fakamoʻuí pea ʻikai tui te ke lava ʻo maʻu kotoa ʻEne ngaahi tāpuaki pe ʻaonga ia ki hoʻo moʻuí. ʻOku ou fakaafeʻi atu ke ʻoua naʻa ngata pē heʻetau ʻilo ki he ʻEikí ka tau ʻiloʻi lelei Ia.
“Ne enginaki mai e Fakamoʻuí ke tau hangē pē ko Iá. ʻOku tau ʻiloʻi e ʻEikí ʻi heʻetau feinga ke hangē ko Iá ʻo fakafou ʻi he mālohi ʻo ʻEne Fakaleleí. ʻOku tau ʻilo e ʻEikí ʻi heʻetau tokoni kiate Ia mo ngāue ʻi Hono puleʻangá. ʻOku tau ʻilo kanokato e ʻEikí ʻo ʻikai ngata pē heʻetau tui kiate Iá, ka ʻoku tau tui foki kiate Ia mo ʻEne ngaahi fakapapaú.
“ʻOku hanga ʻe he tui kiate Iá—ʻa hono tali moʻoni Hono iví mo e talaʻofá—ʻo fakaafeʻi mai e fakakaukaú, nongá mo e fiefiá ki heʻetau moʻuí. Ko ʻEne Fakaleleí ʻoku fakafoʻituitui; ʻoku fakatāutaha ia. Pea ʻoku ʻatautolu kotoa ia.“
ʻEletā David A. Bednar, Facebook, Mar. 14, 2021, facebook.com/davida.bednar.
Fatongia Fakatāutahá
“Naʻe ʻikai toʻo ʻe he Fakamoʻuí hotau fatongia fakatāutaha ki heʻetau moʻuí ʻi heʻene totongi e moʻua ʻo ʻetau ngaahi angahalá. Kuo fakahā fakamāmani lahi ʻi he folofolá talu mei he kamataʻangá ʻa e mahuʻinga ʻo e ngāué, faʻa ngāué, ngāue ʻaki hotau iví, fakaleleiʻi hotau ngaahi talēnití, mo hono tokonaki maʻá e ngaahi fāmilí.
“Ko ʻeku tukupā kiate kimoutolú ke mou vakavakaiʻi hoʻomou ngaahi taumuʻá pea fakapapauʻi pe ko e fē ʻa e fatongia te mou lava ʻo fakahoko ai homou ngaahi fatongia fakafāmilí, tauhi kimoutolu ʻi homou hala ʻo e fuakavá, pea tuku ke mou maʻu ʻa e fiefia ʻoku finangalo ʻa e ʻEikí ke mou maʻú. Manatuʻi, ʻoku fakaʻatā koe ʻe hoʻo fokotuʻu ha taumuʻá ke ke fakahaofi ho taimí mo hoʻo ngāué ʻaki haʻo palani kimuʻa pea ʻoua naʻa mole ʻa e ngaahi fiemaʻu mahuʻingá mo e ngaahi taimi ʻoku ngata ki aí.
“ʻOku ʻikai fiemaʻu ke ke ilifia neongo e ngaahi fakatuʻutāmaki mo e ngaahi faingataʻa te ke fehangahangai mo iá. ʻE tāpuakiʻi mo maluʻi koe ʻi he taimi te ke fekumi ai ki ha ngaahi taumuʻa māʻoniʻoni mo mahuʻingá; palani mo ngāue fakamātoato mo vilitaki; pea falala mo tokanga taha ki he tuí, fakatomalá, ngaahi ouau fakamoʻuí, mo e feilaulau fakalelei ʻa e Fakamoʻuí ʻi hoʻo kātaki ki he ngataʻangá. ʻE tokoni hoʻo tokanga taha ki he temipalé ke ke aʻusia ai e ngaahi taumuʻa ko ʻení.
“ʻOku ou fakamoʻoni ki he fakalangi ʻo Sīsū Kalaisí. ʻOku ʻikai fiemaʻu ke tau manavahē koeʻuhí ko Ia, he ʻoku kakato ʻetau fiefiá ʻiate Ia.“
ʻEletā Quentin L. Cook, Facebook, Tīsema 8, 2021, facebook.com/quentin.lcook.
Lotu Faitotonu Mo Fakataautaha Fakamātoato
“Kuó u ʻilo ʻi heʻeku moʻuí, ʻi he taimi ʻoku fokotuʻu mai ai ʻe ha taha ʻoku ou ʻofa ai pe ko ha kaungāmeʻa ha ngaahi meʻa ʻoku fiemaʻu ke u liliu, neongo kapau ʻoku nau moʻoni, ka ʻoku faʻa ʻasi hake ʻa e tangata fakakakanó ʻiate au ʻo pehē, ʻʻOku ʻikai ke ke sio koe ki ai mei he anga ʻo ʻeku vakaí,ʻ pe ʻKo hai te ke fakamāuʻí?ʻ Pe mahalo te u fakakaukau, ʻMahalo ʻoku totonu ke ke ngāueʻi pē ʻe koe.ʻ Neongo ia, ʻi he taimi ʻoku ou tūʻulutui ai ʻi he loto fakatōkilalo ʻi he ʻao ʻo ʻeku Tamai Hēvaní, ʻo fehuʻi ʻi he loto fakamātoato moʻoni, ʻʻE Tamai, ko e hā ʻoku fiemaʻu ke u liliú?ʻ Ko fē tafaʻaki ʻoku fiemaʻu ke u fakatomalaʻí? Ko e hā ʻeku fehalaakí? ʻOku ou ongoʻi ha nonga ʻiate au, pea ʻi he taimi totonú, ʻoku ou fanongo kiate Ia. Pea ʻoku hū ki hoku lotó ʻa ʻEne moʻoní, ʻa ʻEne moʻoni taʻengatá.
“ʻOku hanga ʻe he lotu fakamātoato ʻi he ngaahi momeniti lōngonoa ko iá, ʻo fakaava e matapā ki he fakahā mei heʻetau Tamai Hēvaní. ʻOku tau fanongo kiate Ia. ʻOku folofola e ʻOtuá kiate kitautolu. ʻI heʻeku feinga ke fakafanongo ki he ngaahi ueʻi fakalongolongo ʻa e Laumālié mo palōmesi ki heʻeku Tamai Hēvaní te u tokanga ange ki he ngaahi meʻa ʻoku ou lava ʻo fakaleleiʻí pea hangē ʻokú ne ʻomi ha malava lahi ange ke u fanongo kiate Ia.
“ʻOku tātātaha ke hoko ʻa e liliu moʻoní ʻi ha ʻaho. ʻOku ou ʻilo kuo teʻeki hoko ia kiate au. Ka ʻi he fakalau atu ʻa e taimí, ʻoku tau hoko ʻo lelei ange ʻi he tuʻunga ne tau ʻi aí. ʻI heʻetau fanongo kiate Ia mo ngāue ʻo fakatatau ki he fakahinohino fakalaumālie ʻoku tau maʻu meiate Iá, ʻokú Ne lilingi hifo ʻa Hono laumālié mo Hono finangaló maʻatautolú. ʻOku ʻikai ha meʻa ʻe toe lelei ange ai—ongoʻi ʻEne hōifuá, ongoʻi Hono Laumālié. ʻOku fakapapauʻi mai ʻe he Laumālie Māʻoniʻoní ʻa e ʻofa ʻa ʻetau Tamai Hēvaní ʻiate kitautolú. Pea ʻoku ou ʻiloʻi ʻi he meʻa ʻoku hoko mai kiate aú, ʻokú Ne fakapapauʻi mai kiate au ʻoku aʻu ki he fanga kiʻi sitepu iiki ko ʻeni ʻo e fakalakalaká ʻoku nau tokoniʻi au ke u toe ofi ange kiate Ia.“
ʻEletā Neil L. Andersen, “How I Hear Him,” Dec. 27, 2021, facebook.com/neill.andersen.
ʻAki e Loto Moʻoni
“Naʻe fehuʻi mai kimuí ni ʻe ha faifekau, ʻKo e kau mālualoi nai kitautolu kapau ʻoku ʻikai ke tau tauhi kotoa e ngaahi fekau ʻoku tau akoʻi ki he kakaí?ʻ Ko ha fehuʻi mahuʻinga ʻeni! Ne u fakakaukau ke u vahevahe heni ʻeku talí. ʻOku ou ʻilo ʻoku ʻikai fiemaʻu ia ke u haohaoa kae toki ui au ke u hoko ko ha mēmipa ʻo e Kōlomu ʻo e Kau ʻAposetolo ʻe Toko Hongofulu Mā Uá. ʻOku ou ʻiloʻi lelei ange ʻi ha toe taha ʻoku ʻikai ke u haohaoa. ʻOku fiemaʻu nai ke tau haohaoa ka tau toki tauhi ki he ʻEikí? ʻIkai ʻaupito. ʻOku ʻikai fekauʻaki ia mo ia.
“ʻOku ʻi ai ha fuʻu faikehekehe lahi ʻi he angatuʻú mo e vaivaí. Ko ia ai ko e mālualoí ʻa hoʻo akoʻi ha fekau ʻoku ʻikai ke ke taumuʻa ke tauhi. ʻOku hoko ia ko e mālualoi. Ka ʻi hono akoʻi e ngaahi fekaú pea tūkia mo fakatomalá—ʻoku ʻikai ko ha mālualoi ia, he ʻokú ke fakataumuʻa ke tauhi e fekaú. ʻI heʻetau fai e ngaahi meʻá ʻi he loto moʻoní, ʻoku ʻuhinga ia ʻoku tau taumuʻa ke tauhi e ngaahi fekaú. Ko ia ʻoku ʻikai ha meʻa ia ʻe mālualoi fekauʻaki mo hono akoʻi ʻo e hala ʻo e fuakavá pe akoʻi fekauʻaki mo e ngaahi fekau ʻa e ʻOtuá ʻi he taimi ʻokú ke fakataumuʻa ai ke tauhi kotoa kinautolú. ʻOkú ke ʻiloʻi pea te ke lava ʻo fakamoʻoniʻi ʻe maʻu e ngaahi tāpuakí ʻi hono tauhi e ngaahi fekau ko iá.
“ʻI he Tohi ʻa Molomoná ʻoku pehē ʻe, Molonai 6:8 , ‘Ka ʻi heʻenau faʻa fakatomala mo kole ha fakamolemole, ʻi he loto-moʻoní, naʻe fakamolemoleʻi ʻa kinautolu.’ ʻOku hoko ko e mālualoí kapau te tau fai ha fehalaaki pea ʻikai fakatomala mo ʻikai ke tau loto ke fakatomala. Ko e angatonú ko e fenāpasi kakato ʻetau ngāué mo ʻetau tuí—ko e founga ʻoku tau feinga fakahoko ʻaki ʻetau moʻuí. Ka ʻoku ngali mālualoi nai kapau he ʻikai ke tau lava ʻo fai maʻu pē ia? ʻIkai, ko e taumuʻa kakato ia ʻo e fakatomalá, ʻikai ko ia? Te tau lava ʻo fakatomala mei he ngaahi meʻa ne tau ngāue lelei ke fakahokó ka naʻe ʻikai pē ke tau lava. ʻOku moʻoni e Fakatomalá, Tuʻunga ʻi he Fakalelei ʻa Sīsū Kalaisí.”
ʻEletā Dale G. Renlund, Facebook, Feb. 15, 2022, facebook.com/DaleGRenlund.
Ko e Angaʻofa mo e Mālohi Taʻe-Mafakatataua ʻo e ʻOtuá
“Siʻoku kaungāmeʻa, ʻoku ou fakamoʻoni atu ʻi heʻetau fakatomala fakamātoato mei heʻetau ngaahi angahalá, ʻoku tau fakaʻatā ai e feilaulau fakalelei ʻa Kalaisí ke hoko ko e konga ʻaonga taha ia ʻi heʻetau moʻuí. Ko e meʻafoaki ʻo e fakatomalá ko hano fakahaaʻi ia ʻo e angaʻofa ʻa e ʻOtuá ki Heʻene fānaú, pea ko hano fakatātaaʻi ia ʻa Hono mālohi taʻe-mafakatataua ke tokoniʻi kitautolu ke tau ikunaʻi e ngaahi angahala kuo tau feiá.“
ʻÉletā Ulisses Soares, Facebook, June 2, 2021, facebook.com/soares.u.