Fakakomipiuta Pē: Ngaahi Tamai ʻi he Ngaahi ʻAho Kimui Ní
Ko Hono Ikunaʻi e Manavasiʻi ke Hoko ko ha Mātuʻá
Ne u maʻu ha ngaahi tāpuaki lahi ʻi he taimi ne u fili ai ke u tokanga taha ki he fiefia ʻo e tuʻunga fakaetamaí.
ʻOku nofo ʻa e tokotaha naʻá ne faʻú ʻi ʻAitahō, USA.
Naʻe ʻikai ke u ʻilo pe ko e hā e meʻa ʻoku hokó ʻi hono ui ai au ʻe Susi, ko hoku uaifí, ke u ʻalu ange ki falekaukau ʻi ha efiafi ʻe taha. Ko ha kiʻi taimi nounou pē eni ʻema malí, ne ma nofo taʻetotongi pē ʻi he fale ʻo ʻeku faʻē ʻi he fonó, pea naʻá ma fakatou ngāue ke fakahaofi ha paʻanga ki he [ako] ʻunivēsití.
Naʻá ku ʻohovale ʻi hono talamai ʻe hoku uaifí ʻokú ne feitamá. Naʻe hangē naʻe fuʻu vave ke ʻi ai u leva haʻama pēpē. Naʻá ma ongoʻi ʻoku teʻeki ai ke ma mateuteu. ʻI he momeniti ko iá, naʻá ku ʻiloʻi ʻoku fiemaʻu ke u poupouʻi mo tokoni ki hoku uaifí ke mateuteu ki hano fanauʻi mai ha pēpē. Ko ia ne u tokanga taha pē ki he ongo naʻe lelei taha he taimi ko iá: ko ʻeku fiefia ʻi heʻeku fakakaukau te u hoko ko ha tamaí.
Ko ha Liliu ʻi he Fakakaukaú
Ne u faʻa loto moʻua maʻu pē he founga ʻoku faʻa tuku mai ʻe he mītiá fekauʻaki mo e hoko ko ha tamaí—mo e tuʻunga fakalūkufua ʻo e hoko ko ha mātuʻá. Hangē ʻoku ʻikai faʻa fakatokangaʻi ʻe he ngaahi tamaí ia e ngaahi fiemaʻu mo e ongo ʻa honau malí mo e fānaú. ʻOku hā mai ia hangē ʻoku ʻikai ke nau malava ke tokangaʻi e niʻihi kehé pea mo kinautolu foki. ʻIkai ngata aí, ʻoku fakamatalaʻi ʻe he mītiá ia ʻoku ngata e ”fiefia” ia ʻo e nofo malí mo e moʻuí ʻi heʻete hoko ko ha mātuʻá. ʻOku ou faʻa fanongo ʻe ʻalu ke toe faingataʻa ange e moʻuí, ʻoku ʻikai ke ke lava ʻo mohe, pea ʻikai toe maʻu ha taimi ia maʻau, mo e ngaahi alā meʻa peheé.
ʻOku ou ʻiloʻi he taimí ni ko e ngaahi fakamatala ko ʻení ko ha ngaahi meʻangāue mālohi ia ʻa Sētane ke fakalotosiʻiʻi kitautolu ke ʻoua te tau langa hake ʻa e ngaahi fāmilí. Neongo ʻoku ʻi ai ha ngaahi faingataʻa hili hono maʻu ha fānaú, ka ʻoku ʻi ai foki mo e fiefia mo e fiemālie ʻoku ʻikai hano tatau.
Naʻá ku fakakaukau ke u tukunoaʻi e ngaahi fakamatala fakamamahi kotoa pē kuó u fanongo ai fekauʻaki mo e tuʻunga fakaetamaí. Ka naʻá ku tali lelei ʻa e meʻa kotoa pē fekauʻaki mo ia pea naʻá ku tukupā ke u ikunaʻi e ngaahi konga faingataʻá. ʻOku ʻikai faingofua e tuʻunga fakaemātuʻá ki he kakai tokolahi, pea naʻe tatau pē ia mo au. ʻOku ʻikai ke fakanatula pē hono maʻu e ngaahi ʻulungaanga fakaetamai ʻe niʻihi. Ka kimuʻa pea fāʻeleʻi ʻema pēpeé, ne u fai e meʻa naʻá ku ala lavá ke teuteuʻi au mo tokoni ki hoku uaifí ke teuteu ʻi heʻema fakahoko homa fatongia foʻou ko e mātuʻá.
Naʻá ku fekumi ʻi he folofolá ke ʻiloʻi e founga ke teuteu aí. Naʻá ku lau foki mo ha ngaahi tohi kehe fekauʻaki mo e hoko ko ha tamaí. Naʻá ku ako ki he anga hono fetongi e taipá. Naʻá ku feinga ke mahino mo ongoʻi e ngaahi mamahi ʻe foua ʻe hoku uaifí ʻi heʻene feitamá. Naʻá ku fai hoku lelei tahá ke u fakatuʻamelie maʻu pē. Naʻe tokoni ʻeku tafoki ʻo lotu ki he Tamai Hēvaní ke u ongoʻi ʻa e nonga naʻá ku fiemaʻu ke u ikunaʻi ʻaki ʻa e tailiili ke hoko ko ha mātuʻá.
Ko e ʻOfa ʻOku ʻOmi ʻe he Ngaahi Fāmilí
ʻOku ʻikai ko ha taha mata tangi au, ka ʻi heʻeku sio ki hono fua ʻe hoku uaifí ʻeku kiʻi pēpē fefiné ʻi he ʻaho naʻe fāʻeleʻi ai iá, naʻá ku tangi ʻi he fiefia. ʻI he momeniti ko iá, naʻá ku ʻiloʻi ʻokú ma maʻu e kiʻi pēpē fefine ko ʻení ʻo taʻengata, pea naʻá ku fakamālō ki he Tamai Hēvaní he ʻoku nofo malu e kiʻi taʻahine ko ʻení ʻiate kimaua.
ʻI heʻeku manatu ki he aʻusia ko iá, ne u manatuʻi ha foʻi vitiō ki he fāmilí ne u faʻa vahevahe mo kinautolu lolotonga ʻeku ngāue fakafaifekaú. ʻOku hā ʻi he foʻi vitiō, ”Tamai Fakaemāmani, Tama Hēvaníi,” ha tamai ʻoku fakahoko ʻene ngaahi ngāue fakaʻahó. Ko e meʻa naʻá ne ʻai e foʻi vitioó ke fakalaumālie kiate aú ʻa e anga e fekauʻaki ngāue fakaʻaho ʻa e fāmilí ki hotau vā fetuʻutaki mo ʻetau Tamai Hēvaní. ʻOku fakaʻosiʻaki e fakamatala ko ʻení: “Mei he ngaahi huafa fakalāngilangi mo e fakaʻapaʻapa ʻoku ʻoange maʻá e ʻOtuá, kuó Ne kole mai ke tau ui Ia ko e Tamaí.”1
Naʻe toe mahuʻinga ange kiate au ʻa e kupuʻi lea ko iá ʻi he taimi ne u hoko ai ko ha tamaí. Kimuʻá, naʻá ku fakakaukau pē ko ha vā fetuʻutaki pē ia ʻoʻoku mo e ʻOtuá; ʻOkú Ne tokanga mai mo tataki au he ʻaho kotoa pē ʻo hangē ko ʻeku Tamai ʻi Hēvaní. Ka ʻi heʻeku hoko ko ha tamaí mo ongoʻi ʻa e ʻofa taʻemafakamatalaʻi ʻoku ou maʻu ki hoku ʻofefiné, naʻá ku fakatokangaʻi lahi ange ʻa e lahi e ʻofa ʻa ʻeku Tamai Hēvaní kiate aú. Ko e ongoongoleleí ko ha sīpinga ia ki he ngaahi fāmilí, pea ʻi hono maʻu hotau fāmili tonú, ʻe lava ke toe mahino lahi ange kiate kitautolu ʻa hono ʻofaʻi kitautolu ʻe he Tamai Hēvaní.
Laka Atu Ki Muʻa
Kuo ʻosi taʻu taha hoku ʻōfefiné he ʻahó ni pea vave mo ʻene tupú. Kuó u tupulaki foki mo au ʻi heʻeku hoko ko ha tamaí, ʻi ha ngaahi founga naʻe ʻikai ke u ʻilo ʻe malava. ʻOku ou maʻu ha fiefia lahi ange ʻi heʻeku hoko ko e tamaí kae ʻikai mei haʻaku nofo tauʻatāina mo mohe fiemālié. Neongo ʻeku ongoʻi taʻemateuteu ke hoko ko ha tamaí, ka naʻe fakaivia au ʻe he ʻofa ʻa e Tamai Hēvaní ke u teuteu ki he lahi taha te u ala lavá. Kuo tokoniʻi au ʻe he ʻofa ko iá ke u loto lahi. Hangē ko e fakamatala ʻi he Luke 12:31, “Kae kumi muʻa ʻa kimoutolu ki he puleʻanga ʻo e ʻOtuá; pea ʻe fakalahi ʻaki kiate kimoutolu ʻa e ngaahi meʻá ni kotoa pē.“ Naʻá ku fuofua feinga ke fai ʻa e meʻa kotoa pē te ne teuteuʻi au ke u hoko ko ha mātuʻá, pea ne u maʻu leva ʻa e nonga mo e fiefia ʻoku haʻu fakataha mo e tuʻunga fakaetamaí. He ʻikai teitei lava ke lahi ange ʻa e koví ʻi he ngaahi lelei ʻo ha fatongia fakalangi pehē. ʻOku fakataumuʻa e tuʻunga fakaetamaí ke ʻofaʻi mo fiefia ai, pea ko e lēsoni maʻongoʻonga taha ia kuó u ako mo hokohoko atu hono ako ʻi he fatongia ko ʻeni ko ha tamaí.