Fakakomipiuta Pē
Ko Hono Fakahaofi Kitautolu ʻe he Tamai Hēvaní mo Sīsū Kalaisi mei Hotau Ngaahi Faingataʻá
ʻE lava ke fakatauʻatāinaʻi kitautolu ʻe he Tamai Hēvaní mo Sīsū Kalaisi mei ha faʻahinga kavenga pē ʻokú ne fakamafasiaʻi kitautolu.
Ne akoʻi ʻe Nīfai “ʻoku ʻi he kakai kotoa pē kuo fili ʻe he ʻEikí ʻa ʻene ngaahi ʻaloʻofa ongoongofuá, koeʻuhi ko ʻenau tuí, ke fakaiviʻi ʻa kinautolu ʻo aʻu ki heʻenau maʻu ʻa e mālohi ʻo e fakahaofí“ (1 Nīfai 1:20).
ʻE lava ʻe he fakahaofi ko iá ʻo fakatauʻatāinaʻi kitautolu mei he faʻahinga kavenga kotoa pē. Naʻe akoʻi ʻe ʻEletā L. Tomu Peuli (1922–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e ngaahi sīpinga kehekehe ʻo e fakahaofí ʻoku maʻu ʻi he Tohi ʻa Molomoná:
“Ko e konga lahi e ngaahi talanoa ʻo e Tohi ʻa Molomoná ʻoku fekauʻaki ia mo e fakatauʻatāiná pe fakahaofí. Ko e mavahe ko ia ʻa Līhai mo hono fāmilí ki he toafá naʻe fekauʻaki ia mo hono fakahaofi ia mei hono fakaʻauha ʻo Selusalemá. Ko e talanoa ʻo e kau Sēletí, ko ha talanoa ia ʻo e fakatauʻatāiná kae pehē ki he talanoa ki he kau Mūlekí. Naʻe fakatauʻatāinaʻi ʻa ʻAlamā ko e Siʻí mei he angahalá. Naʻe fakahaofi e kau tau kei talavoú ʻa Hilamaní ʻi he taú. Naʻe fakatauʻatāinaʻi ʻa Nīfai mo Līhai mei he fale fakapōpulá. ʻOku hāsino pē ʻa e kaveinga ʻo e fakatauʻatāiná ʻi he Tohi ʻa Molomoná kotoa.” Ko e hā ha ngaahi sīpinga kehe ʻo e fakahaofí te ke lava ʻo fakakaukau ki aí mei he ngaahi folofolá?
Hangē ko e niʻihi fakafoʻituituí mo e ngaahi sosaieti ʻi he Tohi ʻa Molomoná, ʻoku tau fiemaʻu kotoa ha fakahaofi fakalangi ʻi heʻetau moʻuí. ʻOku ʻoatu ʻi lalo ha ngaahi sīpinga ʻo ha ngaahi fehokotakiʻanga ki he ngaahi aʻusia ʻa ha niʻihi kehe kuo nau ongoʻi ʻa e fakahaofi mālohi te tau lava ʻo maʻu mei he Tamai Hēvaní mo Sīsū Kalaisi. ʻI hoʻo vakai ki heʻenau ngaahi talanoá, fakakaukau ki he ngaahi kavenga ʻokú ne fakamafasiaʻi koé, pea lotua ha ueʻi fakalaumālie ke ke ʻiloʻi e meʻa ʻoku finangalo e Tamai Hēvaní ke ke fai ʻi hoʻo moʻuí ke aʻusia e fakahaofi ʻokú Ne foaki mai mo Sīsū Kalaisi kiate kitautolu ʻi he meʻa kotoa pē.
Fakahaofi mei he Molé mo e Taimi Faingataʻá
-
ʻOku vahevahe ʻe Lesieli Laitiholo mei heʻene ʻAta ʻo e Tuí, e founga ʻoku fakahaaʻi ai ʻehe tui ki he Tamai Hēvaní mo Sīsū Kalaisí mo e ʻilo e founga ke tengihia ai ʻi he founga ʻoku finangalo e ʻOtuá ke tau tengihia aí ke tokoniʻi ai hono fāmilí hili e mole honau ʻapí ʻi ha vela.
-
ʻOku vahevahe ʻe ha taha fakafoʻituitui ʻi he “Ko ha Tauhiʻanga ʻo e Fakamoʻoní,“ ʻa e anga e tokoni ʻi ha taimi lahi ʻa e fanga kiʻi fakamoʻoni kia Kalaisí hili hono ʻiloʻi e moʻui angahala ʻa ʻenau tamaí.
-
ʻOku talanoa ʻa Kulisitofā Tiiva “ʻI he Poto ʻo Ia ʻokú Ne ʻAfioʻi ʻa e Meʻa Kotoa Peé,“ ki he anga hono ʻomi ʻe he ngaahi folofola ʻa Kalaisí e melinó kiate ia mo hono kaungāmeʻá hili e mālōlō lōua ʻena tamaí.
-
ʻOku fakamatalaʻi ʻe Siliva Kōneti ʻi he “Ko ha Vahe Foʻou Fakaʻofoʻofa“ ki hono fakamālohia ia ʻi heʻene ʻunu ke ofi ange ki he Tamai Hēvaní mo Sīsū Kalaisi ʻi he temipalé hili ʻene hoko ko ha uitou pea liʻaki ʻene ngāué koeʻuhí ko ha fakatuʻutāmaki ʻo fakangatangata ai ʻene ngaue holó.
-
ʻOku talanoa ʻa ʻElisapeti ʻĒleni ʻi he “An Unsent Answered Letter,“ ki he anga hono tali ʻe he ʻEikí ʻene fehuʻi kotoa pē ʻi heʻene fefaʻuhi mo e mate taonakita hono tuongaʻané.
-
ʻOku vahevahe ʻe Sōnia N. ʻi he “ʻOku ʻAfioʻi ʻe,Sīsū Kalaisi ʻa e Mamahi ʻOku Tau Ongoʻi mei he Tāufehiʻá,“ ʻa e anga hono tokoniʻi ia heʻene tafoki ki he Fakamoʻuí mo ʻEne sīpingá ke ne ikunaʻi ai e loto mamahi he ngaahi taʻu lahi ʻo e tāufehiʻá.
Fakahaofi mei he Angahalá
-
ʻI he “ʻOku Taʻotaʻofi Nai Koe ʻe Ho Kuohilí?” ʻOku vahevahe ʻe Sefi Peiti ʻa e founga naʻe tokoniʻi ai ia ʻe heʻene loto moʻoni ke tukupā ke liliú lolotonga hono fakafoʻou ʻene ngaahi fuakava sākalamēnití he uike takitaha ke ne ikunaʻi ai e ngaahi angahala naʻá ne taʻofi ia ʻi ha ngaahi taʻu lahí.
-
ʻOku fakamatalaʻi ʻe Lisiate ʻOsilā, ko ha pīsope kimuʻa ʻo ha uooti ʻo e kau taautaha lalahi kei talavoú ʻi he “Founga ʻOku Fakaʻaongaʻi ai e Mālohi Faifakamoʻuí ke Fakatomala mei he Angahala Fakasekisualé,“ ʻa e anga ʻene mamata ki hono tokoniʻi ʻe he mālohi ʻo Sīsū Kalaisí mo ʻEne Fakaleleí e kakai lalahi kei talavoú ke nau ikunaʻi e ngaahi nunuʻa ʻo e angahala fakasekisualé.
Fakahaofi mei ha Ngaahi Tūkunga Taʻeʻamanekina
-
ʻOku talanoa ʻa Sefilī S. Makelani ʻi he “Meʻa Ne Akoʻi Au ʻe he Faingataʻaʻia Fakaesino Hoku ʻŌfefiné fekauʻaki mo e ʻAloʻofá,“ ki he anga ʻene ʻilo e ngaahi founga ʻe lava ke fakamoʻui ai hotau loto mamahí ʻe he ʻaloʻofa ʻa e Fakamoʻuí. Lau fekauʻaki mo ha aʻusia tatau ʻa ha ongo tautehina ʻi he “Founga ʻOku Kaunga Ai e ʻAloʻofa ʻa e Fakamoʻúi kiate Au mo ha Mēmipa Hoku Fāmilí ʻoku Faingataʻaʻia Fakaesino“ fai ʻe Bruna F. Gonçalves.
-
ʻOku fakamatalaʻi ʻe Seila Luisi Leone ʻi he “Ko Hano Aʻusia e Mālohi ʻo Kalaisí ʻe ha Taha ʻOku Tuʻusi Ha Konga Hono Sinó ka ʻOku Manako pē ʻi Hono Tataú,“ ʻa e anga hono tokoniʻi kitautolu ʻe he ngaahi faingataʻa ʻoku tau fehangahangai mo ia ʻi he moʻuí ke tau haʻu ai kia Kalaisi ʻo maʻu ha nonga ʻiate Ia.
-
ʻOku fakamatalaʻi ʻe Lōkani Sitila ʻi he “Laka Kimuʻa Hili ʻEku Vetemali Hono Uá,“ ʻa e anga hono tokoniʻi ia ʻe he fanga kiʻi meʻa faingofuá, mo tataki ia ʻe he Fakamoʻuí, ke laka ki muʻa ʻi he taimi naʻe ʻikai ke ne ʻilo ai ʻa e meʻa ke faí.
-
ʻOku fakamatalaʻi ʻe Kilisitā Lousa Mōteniseni ʻi he “ʻOkú ke ʻOfa, ʻOkú Ne Fakahaofi,“ ʻa e anga hono tokoniʻi ia ʻe Kalaisi ke liliu hono lotó ʻi he taimi naʻá ne lotua ai ke liliu e loto ʻo ʻene fānaú hili ʻenau mavahe mei he Siasí. ʻʻOku vahevahe ʻeʻAnisa Toki Mataisini ʻi he“Founga Ne Liliu Ai Hoku Lotó ʻi he Mavahe Hoku Tuongaʻané Mei he Siasí,“ ha aʻusia tatau ʻi hono vā fetuʻutaki mo hono tuongaʻané.
-
ʻʻOku fakamatalaʻi ʻe ʻEniselā ʻEnitulia Fenanitesi Liosi ʻi he “Ko ʻEtau Tapatolu Haohaoa ʻo e ʻAmanaki Leleí mo e Fakamoʻuí,“ ʻa e founga ne ʻomi ai ʻe he tuí, lotú, ʻaukaí, mo e mālohi ʻo e lakanga fakataulaʻeikí ʻa e ngaahi mana ki hono fāmilí ʻi he mālohi ʻo e ʻOtuá.
Fakahaofi mei he Loto-Mafasiá, Tuenoá, mo e Loto-mamahí
-
ʻI he “Ne Iku ki heʻeku Fakahaaʻi Ne u Loto Taʻotaʻomia. Naʻe fakamatalaʻi ʻe Nifai Tangalini ʻi he “Ko Hono Haofakiʻi Au ʻe Kalaisi mei he Fakapoʻulí,“ ki he anga ʻene maʻu ha ʻamanaki lelei mo e fakamoʻui mei he fuʻu loto taʻotaʻomiá ʻi heʻene kole tokoni ki he Tamai Hēvaní, Sīsū Kalaisi, mo kinautolu ne nau feohí.
-
ʻOku vahevahe ʻe ʻElati Makōmeki ʻi he “Naʻe Tuʻu e ʻEikí ʻi Hoku Tafaʻakí,“ ʻa e anga hono fakahaofi ia ʻe he Tamai Hēvaní mei he taʻelatá ʻo fakafou ʻi he tokoni ʻa kinautolu ʻoku nau feohí lolotonga e mamaʻo hono husepānití ʻi ha taʻu ʻe taha ʻi he ngāue fakakautaú.
-
ʻOku fakamatalaʻi ʻe ha tokotaha lahi taautaha ʻi he “ʻOku Fakamanatu Mai ʻe heʻeku kei Taautahá ke u Falala ki he PalaniKakato ʻa e ʻOtuá Maʻakú,“ ʻa e founga naʻá ne ikunaʻi ai e loto mamahi ʻo e teʻeki ai ke malí ʻi he fekumi ki he finangalo ʻo e ʻOtuá maʻaná mo falala ki Heʻene palaní mo e fakahinohinó.
-
ʻOku talanoa ʻa Valetaine Kāsia Peniteila Pamosi Tā Siliva ʻi he “Ko e Anga Hono Tokoniʻi Au ʻe he Tohi ʻa Molomoná mei he Liʻekina Fakasōsialé,“ kau ki he mālohi naʻá ne maʻu mei hono lau e lea ʻa e ʻOtuá mei he folofolá lolotonga e vahaʻataimi ʻo e liʻekina fakasōsialé.
-
ʻOku vahevahe ʻe Mākisi Kalānite ʻi he “Ko Hono Maʻu ha Tokoni Fakalaumālie hili e Kau Toko Taha ki he Siasí,“ ʻa e anga hono foaki maʻu pē ʻe he Tamai Hēvaní kiate ia ha taha ke ne maʻu ai ha mālohí.
Fakahaofi mei he Haʻi ʻo e Māmaní
-
ʻI he “Ko e hā e ʻUhinga ʻOku Tau ʻi Heni Aí?” ʻOku vahevahe ʻe Kelekōlio Liviela e founga naʻe ueʻi ai ia mo hono uaifí ʻe he ʻEikí ke na hiki ki ha feituʻu foʻou ke tokoniʻi kinaua ke na toe tokanga ange ki he ngaahi meʻa ʻa e ʻOtuá pea ʻunu ke ofi ange kiate Ia ko ha fāmili.
-
ʻOku vahevahe ʻe Kālosi Felila ʻi he “Kātaki ʻo Foki Mai,“ ʻa ʻene foki ʻo mālohi ʻi he ongoongolelei ʻo Sīsū Kalaisí he ko e meʻa tofu pē ia naʻá ne fiemaʻu ke tāpuakiʻi ʻaki hono fāmilí ʻi he taimi naʻa nau ongoʻi mafasia aí.