Ko e hā e ʻUhinga ʻOku Tau ʻi Heni Aí?
Ne ma mālōlō mei heʻema ngāueʻangá, fakatau atu e meʻa kotoa pē, pea fakamāvae mo e fāmilí mo e ngaahi kaungāmeʻá ka mau hiki ki ha feituʻu ne teʻeki ʻaupito ke mau ʻalu ki ai kimuʻa.
Tā fakatātaaʻi ʻe Shauna Mooney Kawasaki
Ne u ngāue ʻaho, kae ngāue poʻuli hoku uaifi ko ʻĒlení. Ne tātātaha ke ma fesiofaki. Ne ʻikai ke ma fakahoko ʻa e efiafi fakafāmili ʻi ʻapí pe ko e lotu fakafāmilí. Ne ma ō ki he houalotu sākalamēnití, ka naʻe ʻikai ke ma līʻoa ki he ongoongoleleí.
Ne kamata ke ma ongoʻi e tuenoa [fakalaumālie] ne maʻu mei he tokanga ki he ngaahi meʻa ʻo e māmaní kae ʻikai ko e ngaahi meʻa ʻa e ʻEikí. Naʻa ma ongoʻi ne finangalo e Tamai Hēvaní ke ma moʻui mateaki ange.
Ko ia ne ma ʻalu leva ki he Temipale Santiago Chile ke maʻu ha fakahinohino ki he founga ke ma fakalakalaka aí. Naʻá ma fakatou maʻu ai ha ueʻi fakalaumālie ne fie maʻu ke mau hiki mo homa ongo ʻofefine īkí mei Sanitiako ki he feituʻu fakatokelau ʻo e kauʻāfonua ʻo Kokuimipoú.
Ne teʻeki ʻaupito ke ma ʻalu ki ai kimuʻa, pea naʻe ʻikai ke ma ʻilo ha meʻa fekauʻaki mo e feituʻú. Ka naʻá ma mālōlō mei heʻema ngāueʻangá, fakatau atu ʻa e meʻa kotoa pē, pea fakamāvae mo e fāmilí, ngaahi kaungāmeʻá pea mo ʻeku ako ʻunivēsití.
Ne ʻikai ke ma maheni mo ha taha ʻi Kokuimipou, pea naʻe ʻikai haʻama paʻanga. Naʻá ku maʻu ha ngāue, ka naʻe mālō pē ʻene lava ʻo totongi ʻa e falé. Ne ma fehuʻi, “Ko e hā ʻoku tau ʻi heni aí?”
Naʻe fifili ʻa ʻĒleni pe ʻoku ʻi ai nai ha meʻa ʻe lava ke ne fai ke tokoni ki hono totongi ʻo e ngaahi moʻuá. ʻI ha ʻaho ʻe taha naʻá ne tuitui ai ha meʻa ʻufiʻufi sea ki ha taha ʻo ʻemau ʻū sea motuʻá. Naʻá ne pehē, “Te u tuʻuaki fakatau atu eni ke sio angé pe ʻe fakatau ʻe ha taha.” Naʻe fakatau ia ʻe ha tokotaha. Ne fakalotolahi ia kia ʻĒleni ke ne ako lahi ange ki hono ʻaofi e naunau falé. Naʻá ne kamata tuʻuaki leva, pea naʻe kamata ke ne maʻu ha ngāue.
ʻI he 2016, naʻe ui au ke u hoko ko ha pīsope ki homau uooti foʻoú. Koeʻuhí ko ʻeku ngāué, ko e hoko atu ʻeku ako ʻi he ʻunivēsití, pea mo hoku uiuiʻí, naʻe toe tātātaha ke u fesiofaki mo hoku fāmilí.
Ne pehē mai ʻe ʻĒleni, “ʻOku ʻikai ke ngāue lelei ʻeni. Ko e hā ʻoku ʻikai te ke ngāue ai pē mo aú? Te u akoʻi atu ʻa e foungá. Te ke ʻi ʻapi, pea ʻe faingofua ange ia ki hoʻo uiuiʻí.”
Naʻá ku hohaʻa ki he nofo mei heʻeku ngāué, ka naʻe fokotuʻu mai ʻe ʻĒleni ke ma lotu ki he Tamai Hēvaní ʻo pehē: “Ko ʻema pisinisí ʻeni. Te ma ngāueʻi fakataha ia. Kātaki ʻo tokoni mai ke mahino kiate kimaua ʻa e founga ʻe lava ke ma ngāueʻi ai ia lolotonga e hoko ʻa Kelekōlio ko ha pīsopé.”
Naʻe tali mai ʻe he Tamai Hevaní. ʻI he taimi ní, hili ha ngaahi taʻu ʻo e tātātaha e fesiofakí, ʻokú ma feinga ke feangai mo e feohi fakataha maʻu peé. Ko e taimi ʻe niʻihi ʻoku fakakata mai ʻa ʻĒleni ʻo pehē, “Meʻa ní ʻoku ʻikai ke ʻi ai haʻo ngaahi ʻinitaviu fakapīsope ke fai? Toki foki mai hili ha houa ʻe fā!”
Kuó ma ako ke maʻu ʻa e tuí pea mo moʻui ʻaki mo e fāmilí ʻa e ongoongoleleí, pea kuo faitāpuekina kimautolu ʻi heni ʻi Kokuimipou. Ne mau hiki ki ha kolo ne ʻikai haʻamau ʻilo ki ai ke tokoniʻi ha kakai ne teʻeki ke mau fetaulaki, pea kuo mau mātā ha ngaahi mana ne ʻikai haʻamau ʻamanaki ki ai.