Ko e Palaní ke Fakahaofi Koe

Kimuʻa pea fanauʻi kitautolú, naʻe fakahā mai ʻe he Tamai Hēvaní ha palani ke tau hoko ai ʻo hangē ko Iá. ‘I he palani ko iá, ʻoku fakaʻatā ʻe he ngaahi fatongia ʻa Sīsū Kalaisí ke tau malava ʻo fakalakalaka taʻengata. Ko Sīsū ʻa e “halá, mo e moʻoní, pea mo e moʻuí” (Sione 14:6).

Kuo Fili

Ko Sīsū Kalaisi ʻa e fuofua laumālie ne fanauʻi ki he fāmili ʻa e Tamai Hēvaní. Naʻe fili ʻa Sīsū “talu mei he kamataʻangá” (Mōsese 4:2) ke hoko ko hotau Fakamoʻuí. ‘I he taimi naʻe fakahā mai ai ʻe he Tamaí ʻa ʻEne palani ki hotau hakeakiʻí, naʻe angatuʻu ʻa Sētane mo ʻene kau muimuí, ka naʻe faivelenga pē ʻa Sīsū. Naʻe kapusi hifo ʻa Sētane ʻi he mālohi ʻo Sīsū Kalaisí.

Vakai foki, Sione 17:5, 24; Mōsaia 18:13; ʻEta 3:14; Mōsese 4:3; ʻĒpalahame 3:24–27.

Tupuʻangá

Naʻe fakatupu ʻe Sīsū Kalaisi ʻa e māmani fakaʻofoʻofá ni maʻatautolu, ʻi he malumalu ʻo e fakahinohino ʻa ʻEne Tamaí. “Naʻe ngaohi ʻe ia ʻa e meʻa kotoa pē; pea naʻe ʻikai ha meʻa ʻe ngaohi kae ʻiate ia pē” (Sione 1:3).

Vakai foki, Kolose 1:16–18; Mōsaia 4:2; 3 Nīfai 9:15; Tokāteline mo e Ngaahi Fuakava 14:9; Mōsese 2:26–27.

Fa‘ifaʻitakiʻanga

Ko e konga ʻo e palani ʻa e Tamai Hēvaní, naʻe ʻaloʻi ʻa Sīsū Kalaisi ʻi he māmaní pea maʻu ha sino fakamatelie. Naʻá Ne “toʻo kiate ia ʻa e tatau mo e tamaioʻeiki” pea “fakamoʻulaloaʻi ia” (Filipai 2:7–8) kae lava ke mahino kiate Ia ʻa e founga ke tokoniʻi kitautolu ʻi heʻetau fononga fakamatelié. ‘Oku ʻomi ʻe Heʻene moʻuí mo e ngaahi akonakí ha sīpinga haohaoa ʻo e founga ke tau moʻui aí. ‘I heʻetau muimui kiate Iá, te tau lava ʻo hoko ʻo tatau mo e ʻOtuá pea toe foki kiate Ia ʻi ha ʻaho.

Vakai foki, 1 Pita 2:21; 2 Nīfai 31:16; 3 Nīfai 18:16.