Ngaahi Moʻoni ʻe Fā fekauʻaki mo e ʻOfá mo e Nofo-malí

Kimuʻa pea mali ʻa Sisitā Uenitī W. Nalesoni mo Palesiteni Lāsolo M. Nalesoní, naʻá ne hoko ko ha palōfesa ʻi he faifaleʻi ki he nofo-malí mo e fāmilí ʻi ha taʻu ʻe 25. ʻI ha fakataha lotu fakamāmani lahi maʻá e kakai lalahi kei talavoú, naʻá ne vahevahe ai ʻa e ngaahi moʻoni ʻe fā ko ʻení:

1. “Ko e ngaahi moʻoni kotoa pē ʻo kau ki he ʻofá mo e nofomalí, ʻoku ʻomi ia ʻe he Laumālie Māʻoniʻoní mei heʻetau Tamai Hēvaní.”

2. “Ko e haohaoa fakatāutahá ʻa e kī ki he ʻofa moʻoní. Ko e maʻa ange ko ia hoʻo ngaahi fakakaukaú, ongó, ngaahi leá mo e ngāué, ko e lahi ange ia ho faingamālie ke maʻu mo fakahā ʻa e ʻofa moʻoní.”

3. “ʻI he taha ʻo e konga mahuʻinga ʻo hono fakahaaʻi ʻa ʻena feʻofaʻakí, ʻoku fie maʻu ʻe he ʻEikí ke maʻu ʻe he husepānití mo e uaifí ʻa e fiefia mo hono fakaofo ʻo e feohi fafale ʻi he nofomalí.”

4. “ʻOku totonu ke kau ʻa e Laumālie Māʻoniʻoní ʻi he feohi fafale totonu ko ia ʻo e nofomalí. He ʻikai ke maʻu e faʻahinga aʻusia fafale ko ʻení ʻi tuʻa ʻi he nofomalí he ʻoku ʻikai ke ʻi ai ʻa e Laumālié.”

Te ke lava ʻo lau pe sio ʻi he lea fakataha lotu fakamāmani lahi ʻa Sisitā Nalesoni ko e “ʻOfá mo e Nofomalí” ʻi he ChurchofJesusChrist.org/go/8205. ʻOku hā foki ʻi he pulusinga ko ʻení ha ngaahi fakamatala kehekehe fekauʻaki mo e fakakaukau ʻa e ongoongoleleí ki he tōʻonga fakasekisualé: maʻá e mātuʻá (vakai, peesi 18), maʻa é kakai lalahi kei talavoú (vakai, peesi 42), pea maʻá e toʻu tupú (vakai, peesi 52).