Ko e Lea Fakaʻosí
Founga ke Fakaʻehiʻehi mei hono Kākaaʻí
Mei ha lea ʻi he konifelenisi lahi ʻo ʻOkatopa 2019.
Lolotonga haʻamau ʻaʻahi ki he Faʻētangata Lahi ko Kolová ʻi he ngaahi taʻu kuo mahili atú, naʻe fie ʻalu homa ongo foha kei īkí ʻo vaʻinga ʻi tuʻa. Naʻe pehē ange ʻe he Faʻētangata ko Kolová kiate kinaua, “Mo tokanga—ʻoku lahi ha fanga kiʻi monumanu kinohaʻa (skunks) ʻi tuʻa.” Naʻe ʻikai fuoloa kuo hū atu ʻa e ongo tamaikí ki tuʻa ʻo vaʻinga.
ʻI heʻemau foki ki ʻapí, ne u fehuʻi ange, “Naʻá mo sio ki ha monumanu kinohaʻa?” Naʻe tali mai ʻe ha toko taha, “ʻIkai, naʻe ʻikai ke ma sio ki ai, ka naʻá ma sio ki ha kiʻi pusi ʻuliʻuli ʻoku matohi hinehina hono tuʻá!”
Naʻe ʻikai ke lavelaveʻiloa ʻe he ongo tamaikí naʻá na sio ki ha monumanu kinohaʻa. Ko ha talanoa ʻeni ki hono maʻu hala e tuʻunga totonú—ʻo e tomuʻa fakakaukau atu ki ha meʻa ʻoku kehe mei he meʻa totonú. ʻOku fefaʻuhi ha niʻihi tokolahi he ʻahó ni mo e ngaahi palopalema tatau ʻi ha tuʻunga lahi ange.
ʻOku fie maʻu ʻe Sētane, ʻa e tamai ʻo e ngaahi loí mo e tokotaha kākā lahí, ke tau fakafehuʻia e tuʻunga totonu ʻo ha meʻa, pea tau tukunoaʻi e ngaahi moʻoni taʻengatá pe fakafetongi kinautolu ʻaki ha meʻa ʻoku hā ngali fakafiefia ange. Kuó ne akoako ʻi ha taʻu ʻe lau afe, ke malava ʻo tohoakiʻi e fānau ʻa e ʻOtuá ke nau tui ʻoku lelei ʻa e koví pea kovi ʻa e leleí.
Kuo ʻomi ʻe he ʻEikí ha hala kiate kitautolu ke tau fakafisingaʻi ʻaki ai e ngaahi faingataʻá mo e ʻahiʻahí, ʻa ia ko e lahi taha ʻoku hoko ko ha nunuʻa fakahangatonu ʻo e ngaahi fakatauele kākā mo e ngaahi ʻohofi ʻa e filí.
ʻOku faingofua pē ʻa e halá. Naʻe fefolofolai ʻa e ʻOtuá mo e kau palōfita ʻi he ngaahi taʻu kuohilí, pea ʻoange kiate kinautolu ha ngaahi fekau naʻe fakataumuʻa ke tataki ʻEne fānaú ki he fiefia ʻi he moʻuí ni mo e nāunau ʻi he moʻui ka hokó. ʻOku hokohoko atu hono ʻomi ʻe he ʻOtuá ha ngaahi fekau ki hotau palōfita moʻuí he ʻahó ni.
Ko ha meʻa mahuʻinga ʻa e talangofua ki he ngaahi fekau kuo ʻomi ki hotau palōfitá, ʻo ʻikai ngata pē ʻi he fakaʻehiʻehi mei he fakatauele ʻa e tokotaha kākaá, kae pehē foki ki hono aʻusia e fiefia mo e nēkeneka ʻoku tuʻuloá.
Ka neongo ia, ʻoku feinga ʻa e filí ke kākaaʻi koe. ʻOkú ne feinga ke hā ngali siʻisiʻi e ngaahi nunuʻa fakaʻauha ʻo e faitoʻo konatapu taʻefakalaó pe inu kava mālohí peá ne fokotuʻu atu te ne ʻomi e fiefiá. ʻOkú ne ʻohifo kitautolu ki he ngaahi ʻelemēniti kovi ʻe lava ke maʻu ʻi he mītia fakasōsialé, ʻo kau ai e ngaahi fakafehoanaki ʻoku fakaʻau ke kovi angé, mo e moʻoni ʻoku filioʻí. ʻIkai ngata aí, ka ʻokú ne toe fakaʻali mai ha ngaahi fakamatala fakapoʻuli pe fakaʻauha kehe ʻi he ʻinitanetí—ʻo hangē ko e ponokalafí, ʻohofi fakahangatonu ʻo e niʻihi kehé ʻo fakafou he ʻinitanetí, pea mo e ngaahi fakamatala hala ke ne fakatupu veiveiua mo ʻai ke tau ilifia ʻi hotau lotó mo e ʻatamaí.
Fakatauange ke tau fakatokangaʻi e ngaahi kākā ʻa Sētané ʻi honau tuʻunga totonú. Kuo pau ke tau hokohoko atu ʻo faivelenga pea tōtōivi, he ko e founga pē ia ke ʻiloʻi ai e moʻoní, pea fanongo ki he leʻo ʻo e ʻEikí ʻo fakafou ʻi Heʻene kau tamaioʻeikí. ʻI heʻetau talangofua ki he ngaahi fekau ʻa e ʻEikí, ʻe tataki maʻu pē kitautolu ʻi he hala totonú pea ʻikai kākaaʻi kitautolu.