ʻOku Totonu Ke u Teuteu ki he Sākalamēnití?

Fai ʻe Zoe Campbell

ʻE lava ʻe hono tuku ha taimi ke fakatokangaʻi ai e ngaahi tāpuaki maʻongoʻonga ʻo e sākalamēnití he uike takitahá ke ʻomi ha mālohi fakalaumālie mo ha ngaahi aʻusia fakaofo.

ʻOku ou manatuʻi lelei ʻeku fuofua aʻusia ʻi he sākalamēnití. Ko e fuofua taimi ia ne fakaafeʻi ai au ʻe he ongo faifekaú ke u ʻalu ki he lotú. Meʻapangó ne ʻikai ke u ʻilo ha meʻa ʻe taha fekauʻaki mo e founga ʻoku fakahoko ai e sākalamēnití pe ko e meʻa ʻokú ne fakataipé, ko ia naʻe pau ai ke fakamatalaʻi mai ʻe he tamaiki fefine ne mau tangutú ʻa e founga hono fakahokó lolotonga hono fakahoko iá.

ʻI heʻeku manatu ki he aʻusia ko ʻení, kuó u ʻiloʻi ai ne mei ala tokoni kapau ne u tomuʻa feinga ke ako ha kiʻi meʻa siʻi ʻiate au pē fekauʻaki mo e sākalamēnití, ka ne u monūʻia ʻi he loto lelei ʻa e tamaiki fefine ne mau tangutu fakataha he fuofua ʻaho ko iá ke fakamatalaʻi mai e meʻa kotoa pē he taimi pē ko iá. Talu mei ai, kuo liliu ha meʻa lahi ʻi heʻeku moʻuí—kau ai ʻeku ʻilo ki he ongoongoleleí mo e ʻuhinga ʻo e sākalamēnití.

Kuo ʻi ai foki mo ha ngaahi liliu lahi lolotonga e ngaahi konifelenisi lahi kuo maliu atú. ʻI hono tāpuni ʻe Palesiteni Lāsolo M. Nalesoni e konifelenisi lahi ʻi ʻOkatopa 2019, naʻá ne ʻomi ai ha ngaahi liliu ki he ngaahi fehuʻi ʻoku fai ʻi ha ʻinitaviu lekomeni temipalé, pea ʻi heʻene toe fakamamafaʻi mai e fehuʻi fika 8, “ʻOkú ke feinga ke tauhi e ʻaho Sāpaté ke māʻoniʻoni, ʻi ʻapi pea ʻi he lotú; kau ki hoʻo ngaahi fakatahá; teuteu mo moʻui taau ke maʻu ʻa e sākalamēnití; pea moʻui ʻo fakatatau pea mo e ngaahi fono mo e fekau ʻo e ongoongoleleí?” (tānaki atu hono fakamamafaʻí).

Ne u ofo ʻi he foʻi lea ko e teuteu.

Kuó u ʻiloʻi ko e sākalamēnití ʻoku ʻikai ko ha meʻa ia ʻokú te teuteu ki ai he ngaahi miniti siʻi pē kimuʻa pea tufa mai e maá mo e vaí. Te ke lava ʻo teuteu ki he sākalamēnití he uiké kotoa ke tokoni ke ke ongoʻi mālohi e Laumālié mo maʻu ha ongo ʻo e fakafoʻou ʻi he Sāpate kotoa pē.

Talu mei ai mo ʻeku kamata teuteu he uiké kotoa ke maʻu e sākalamēnití ʻaki hono:

Ako ʻeku folofolá ʻi he Haʻu, ʻo Muimui ʻIate Aú mo fakakaukau ki ha ngaahi meʻa te u lava ʻo vahevahe mo e niʻihi kehé pea ʻi he kalasi Lautohi Faka-Sāpate hono hokó.
Fakamāʻopoʻopo e ngaahi meʻa ʻoku ou fie maʻu ki he lotú he pō Tokonakí ki he ngaahi fakataha ʻi he pongipongí (ko e ngaahi monū ʻo e ngāue poʻulí!). ʻOku ou fakapapauʻi ʻoku faʻo ʻeku ngaahi folofolá mo ha kiʻi pepa ke hiki ai ha ngaahi fakamatala lolotonga e houalotu sākalamēnití, pea ʻoku ou lotua ke maʻu ha ngaahi tali lolotonga e lotú fekauʻaki mo e founga te u lava ʻo fakalakalaka ai he uike hoko maí.
ʻOku tokoni foki e fanongo ki he mūsika fakalotú he pongipongi Sāpaté kimuʻa peá u ʻalu ki he sākalamēnití ke u ongoʻi ai e Laumālié mo maʻu ʻa e fakakaukau totonú.
Lau e fakalea ʻo e ngaahi himi te mau hivaʻi he houalotu sākalamēnití pea kumi e ngaahi veesi folofola ʻoku felāveʻi mo iá. ʻOku tokoni ʻeni ke u ʻiloʻi kakato e pōpoaki mo e puipuituʻa ʻo e ngaahi himí mo tokoni ke u fakalaulauloto ki he ngaahi meʻá ni lolotonga e houalotú.
Fakaʻosí, ko e fakakaukau ki he ʻuhinga ʻo e sākalamēnití kimuʻa pea tufá. ʻOku ou fakamanatu loto pē ʻoku fie maʻu ke u manatuʻi maʻu pē e “ʻuhinga” ʻo e sākalamēnití pea mo hono mahuʻingá he uiké kakato—ʻa e Fakamoʻuí.

Ko e taumuʻa ʻo e sākalamēnití ke manatuʻi ʻa Sīsū Kalaisi mo ʻEne feilaulau fakalelei maʻatautolú (vakai, Mātiu 26:26–28). ʻOku fakaafeʻi foki kitautolu ʻe he sākalamēnití ke fakafoʻou ʻetau fuakava ʻi he papitaisó mo fakamālohia ʻetau tukupā ke hoko ʻo hangē ange ko Iá, ke manatuʻi Ia, pea hoko ko ha kau ākonga lelei ange. ʻOkú ne fakaʻatā foki ke tau kamataʻi e uike hokó ʻaki ha laumālie kuo fakafoʻou.

Kuó u ako lahi ange fekauʻaki mo e sākalamēnití talu mei he fuofua ʻaho ko ia ʻi he lotú. Pea kuó u ongoʻi he taimí ni ha fiefia lahi he uike kotoa pē ʻi heʻeku hū atu ki he houalotu sākalamēnití, ʻi he ʻiloʻi ko ia ʻoku ʻamanaki ke u manatuʻi e feilaulau ʻa hoku Fakamoʻuí maʻakú mo faivelenga ange ʻi hono tauhi ʻeku ngaahi fuakavá. ʻOku fakahoko ʻe he teuteú ha liliu lelei ʻi he Laumālie ʻokú te ongoʻi he toenga ʻo e houalotú. Kimuʻa peá u maʻu e sākalamēnití ʻi heʻeku moʻuí, ne u faʻa ongoʻi taumuʻa valea—ʻo hangē ne ʻi ai ha meʻa naʻe molé. Ne ʻikai ke u teitei ʻiloʻi ko e konga ne mole mei heʻeku moʻuí ko ha ouau mātuʻaki faingofua, kae mātuʻaki mālohi ʻi he taimi tatau. Ko ha ouau ʻokú ne tokoniʻi au ke fakalahi ʻeku ʻofa ki he Fakamoʻuí pea mo houngaʻia he meʻa kotoa kuó Ne fakahoko maʻakú.