Ko Ha Kamata Foʻou Fisifisimuʻa
Tā fakatātaaʻi ʻe Carolyn Vibbert
Ne fakangata ha vahaʻataimi ʻi heʻeku moʻuí ʻi he taimi ne u hoko ai ko ha uitou ʻi ʻOkatopa 2010. ʻI he taimi ko iá ne u hoko ai ko ha faiako ʻi he fakatonga ʻo Falaniseé. Ne hoko ha fakatuʻutāmaki ʻi he ngāué pea uesia ai ʻeku malava ke feʻaluʻakí, naʻá ku loto-mamahi ʻi he tuai ʻeku moʻui leleí mo e maʻuiví. Naʻá ku fiefia ʻi ha taʻu ʻe 11 ʻi ha ngāue fakapalōfesinale lelei. Naʻá ku saiʻia ʻaupito ʻi heʻeku ngāué. Naʻe tokolahi hoku ngaahi kaungāmeʻá. Ka naʻe ʻikai ke u kei lava ʻo feau e ngaahi tuʻutuʻuni ʻo ʻeku ngāué.
Ko hono moʻoní, ko e hili ʻeni ha taʻu ʻe 33 ʻo ʻeku tauhi e Lea ʻo e Potó, naʻá ku fifili pe ko e hā ne ʻikai ke u lava ai ʻo “lele kae ʻikai ongosia” pe “ʻalu ʻo ʻikai pongiá” (vakai, Tokāteline mo e Ngaahi Fuakava 89:20). Naʻe faifai peá u mālōlō mei he ngāué kimuʻa he taimi ne u fakatetuʻa ki aí, ʻo fakangata ai ha vahaʻataimi ʻe taha ʻi heʻeku moʻuí.
Naʻá ku lolotonga nofo fakataha mo hoku ʻofefiné ʻi he taimi naʻá ne maʻu ai ha fanongonongo mei he ngāué ke ne hiki ʻo ngāue ʻi ha feituʻu ʻe taha ʻi Pālesi. Naʻá ku fakakaukau ke u ʻalu fakataha mo ia ke kamata ha konga foʻou ʻo ʻeku moʻuí ʻi ha feituʻu foʻou.
Hili pē ha taimi nounou ʻo ʻema tūʻutá, ne uiuiʻi kimaua ke ma fakatou ngāue ʻi he Temipale Pālesí. Ne fakapapauʻi mai ʻe hoku uiuiʻi ke ngāue ʻi he temipalé naʻá ku ʻi he feituʻu totonu ʻi he taimi totonu he naʻe ʻomi au ʻe he ʻEikí ki heni. Kuó u maʻu ha fiefia lahi ʻi heʻeku ngāue maʻu pē ʻi he fale ʻo e ʻEikí, pea ʻoku fakafiefia ke u feohi mo hoku ʻofefiné ʻi he temipalé. ʻOkú ne fakafonu hoku lotó ʻaki ʻa e fiefia!
Ko e ʻaho ní, ʻoku ou sio ai ki he tāpuaki maʻongoʻonga ne ʻikai ke u fakatokangaʻi kimuʻa koeʻuhí ko e faingataʻa ne u fekuki mo iá. Ne faingataʻa e fakangatangata ʻeku fefonongaʻaki holó, taʻemalava ke fakahoko ʻa e meʻa ne u taukei aí, pea mo e fie maʻu ko ia ke u mālōlō vave mei he ngāué. Ka naʻá ku ʻiloʻi ne tokoniʻi au ʻe hotau ʻEiki ko Sīsū Kalaisí. Kuó Ne tokoniʻi au ke u fiemālie mo maʻu ʻa e nonga, ʻamanaki lelei, mo e melino ʻoku hoko he taimí ni ko ha konga lahi ʻo ʻeku moʻuí.
Ko e taimi kotoa pē ʻoku ou hū ai ʻi he matapā ʻo e temipalé, ʻoku ou ongoʻi ʻa e Laumālie Māʻoniʻoní. ʻI he ngaahi taimi faingataʻá lolotonga e taulōfuʻu mai ʻa e ngaahi ivi tākiekina ʻo e māmaní, ʻoku fakafiefia ke ʻiloʻi kuo ʻomi ʻe he ʻEikí ha ngaahi potu māʻoniʻoni maʻatautolu ʻa ia ʻoku maau mo fakaʻofoʻofa ai ʻa e meʻa kotoa pē. ʻOku ou ongoʻi houngaʻia lahi moʻoni koeʻuhí ko e kamataʻanga foʻou ko ʻeni ʻo e ngāue fakatemipalé ʻi heʻeku moʻuí. ʻOku fisifisimuʻa ia!