Toe Kiʻi Lelei Ange he ʻAho Kotoa Pē
Fai ʻe Sisitā Joy D. Jones
Palesiteni Lahi ʻo e Palaimelí
ʻI heʻeku kei siʻí, naʻá ku tā ʻa e vaioliní. Naʻá ku loto ke ongo mālie ia. Naʻá ku loto ke tā ia ki heʻeku ongomātuʻá pea ke na pehē mai, “Hauē, Soi, mālie ʻaupito!” Ka naʻe ʻikai ongo mālie ia. Naʻe ngaiʻi ia!
Ko e taimi naʻe ʻikai ke u akoako aí, ʻe pehē mai heʻeku faiakó “Soi, naʻá ke akoako he uiké ni?” Naʻá ne ʻai au ke u fakaʻamu ke akoako koeʻuhí ke u lava ʻo tā lelei ange ia he uike ka hoko maí.
ʻI heʻeku toe fakakaukau atu ki aí, ko ha aʻusia lelei ʻeku tā vaioliní koeʻuhí naʻe faingataʻa. Neongo naʻe ʻikai ke u faʻa saiʻia maʻu pē ke akoako, ka naʻá ku ako ha meʻa lahi mei hono fokotuʻu ha taumuʻa ke ako ha kiʻi meʻa siʻi he ʻaho kotoa peé.
Ko e meʻa ia ʻoku ou fakaʻamu te mou fakahokó. Feinga ke toe lelei ange ʻi he ʻaho kotoa pē. ʻOku ʻikai ʻamanaki e Tamai Hēvaní ke ke fakahoko fakaʻangataha ʻa e meʻa kotoa pē. Ko e moʻuí ʻoku fekauʻaki ia mo e akó kae pehē ki he tupulaki māmālie peé. ʻOkú Ne finangalo ke ke feinga pē. Pea ʻokú Ne finangalo ke ke fiefia ʻi hoʻo tupulakí!
Ko e taimi ʻe niʻihi ʻoku tau fakamaauʻi fefeka kitautolu. ʻOku tau pehē, “Kuó u tōnounou. He ʻikai te u lavaʻi ia,” pea tau foʻi leva. Ka ʻoku folofola mai e Fakamoʻuí, “Feinga pē. ʻOku ou ʻi heni ke tokoniʻi koe!” Koeʻuhí ko Sīsū Kalaisi, he ʻikai ke tau tuenoa. Te tau lava ʻo tuʻu hake pea toe feinga pē ʻi Heʻene tokoní. Ko e taumuʻa ia ʻo e moʻuí ni.
Kapau naʻe ʻi ai ha meʻa pē ʻe taha te u fakaʻamu ke mou lava ʻo ʻiloʻi ʻi homou lotó, ko e ʻofa ʻa e Tamai Hēvaní ʻiate kimoutolú. Mahalo ʻoku mou fehangahangai mo ha ngaahi meʻa faingataʻa, ka kuo teuteuʻi kimoutolu ke mou omi ki he māmaní ʻi he taimi ko ʻení. Mou faifeinga pē pea hokohoko atu hono vahevahe hoʻomou māmá. ʻE tāpuekina mo tataki kimoutolu ʻe he Tamai Hēvaní ʻi hoʻomou muimui ʻi he hala ʻo e fuakavá.