Fakaava ʻa e Mālohi ʻo e Tohi ʻa Molomoná
ʻOku nofo ʻa e tokotaha naʻá ne faʻú ʻi ʻAlesona, USA.
Lolotonga ʻeku kei ngāue fakafaifekau ʻi Filipainí, naʻá ku akoʻi ai mo hoku hoá ha lēsoni mātuʻaki mālohi fekauʻaki mo e mahuʻinga ʻo hono ako fakaʻaho ʻo e Tohi ʻa Molomoná. ʻI he fakaʻosinga ʻo e lēsoní, naʻe fakahoko ai ʻe hoku hoá ha taha ʻo e ngaahi fakamoʻoni mālohi taha ʻo e ako folofolá kuó u fanongo aí. Naʻá ne fakamoʻoniʻi naʻe tānaki ʻe hono lau ʻo e Tohi ʻa Molomoná ha mālohi foʻou ki heʻene moʻuí naʻe ʻikai faʻa lava ke ne mafakamatalaʻi.
Naʻe hā mahino naʻe liliu ʻe heʻene aʻusia ʻi he Tohi ʻa Molomoná ʻene moʻuí, pea naʻá ku fie maʻu ia maʻaku.
Naʻá ku fakakaukau ʻi he pō ko iá te u toe lau e Tohi ʻa Molomoná. Mei he kamataʻangá.
Naʻá ku fakamoleki ha taimi lahi ʻi heʻeku lotu ʻo fakamatala ki he ʻOtuá ʻeku fakaʻamu ke aʻusia ʻa e ului mo e mālohi ʻoku maʻu mei he Laumalie Māʻoniʻoní.
Ko e tali naʻá ku maʻú ko e: Laukonga. Laukonga pē.
Pea ko e meʻa ia naʻá ku faí. Ne u kamata lau ia mo ha loto-vekeveke foʻou. Naʻá ku tokanga makehe ange ki he veesi, vahe, mo e peesi takitaha. ʻI heʻeku laú, ne u ʻilo ha ngaahi veesi naʻá ne tali ʻeku ngaahi fehuʻí, fakafiemālieʻi ʻeku ngaahi hohaʻá, pea tokoni ke fakamaʻamaʻa e kavenga ʻanautolu ne u akoʻí.
Fakafuofua ki ha māhina ʻe taha mei ai, naʻá ku fakatokangaʻi ha meʻa ne liliu ʻiate au. Naʻe tupulaki ʻeku malava ko ia ke ʻofa ki he niʻihi kehé; naʻe lahi ange ʻeku fakatuʻamelie ki he kahaʻú; ne u malava ke ngāue mālohi mo fuoloa ange he ʻaho takitaha; pea naʻe kamata ke u ongoʻi ha fiefia lahi.
ʻI ha ʻaho ʻe taha lolotonga ʻeku akó ne u maʻu ai ha kupuʻi lea ʻa Palesiteni ʻEselā Tafu Penisoni (1899–1994) palesiteni mālōlō ʻo e Siasí: “ʻOku ʻi ai ha mālohi ʻi he [Tohi ʻa Molomoná] ʻa ia ʻe kamata ke tafe atu ki hoʻo moʻuí ʻi he momeniti pē te ke kamata ai hano ako fakamātoato ʻo e tohí. … ʻI he taimi ʻokú ke kamata ai ke fiekaia mo fieinua ki he ngaahi folofola ko iá, te ke maʻu ʻa e moʻuí ʻo mātuʻaki lahi ʻaupito.”1
ʻI he hokohoko atu ʻeku akó, naʻe kamata ke mahino kiate au ʻene ʻuhingá. Naʻá ku maʻu ʻa e moʻuí ʻo mātuʻaki lahi ʻaupito.
ʻI heʻeku toe manatu ki aí, ʻoku ou tui ko e taha ʻo e ngaahi ʻuhinga naʻe vahe ai au ke u ngāue mo hoku hoa ko iá ke u ʻi ai he pō ko iá ke fanongo ki heʻene vahevahe ʻene fakamoʻoní. Ne u ongoʻi hangē ne toe tāliuliunga mai e ngaahi tafaʻaki lelei ʻo e moʻuí—ʻa e ʻofá, ʻamanaki leleí, falalá, ngāue mālohí, loto-fakapapaú, mo e fiefiá.
Naʻe ʻi ai ha maama foʻou ʻi heʻeku moʻuí, pea naʻá ku ʻiloʻi naʻe moʻoni ia.