Fakaʻilekitulōnika Pē: Kakai Lalahi Kei Talavoú
Foki ki he Halá hili ʻEku Feitama ne ʻIkai Palaní
Naʻá ku tokotaha pea toe feitama. Ka naʻá ku fakatokangaʻi naʻá ku fie maʻu ha moʻui kehe. Naʻá ku fie maʻu ke u moʻui maʻa Kalaisi pea taau ke maʻu ʻa e ngaahi tāpuaki ʻo e temipalé.
Naʻá ku fili ke u nofo ofi pē ki ʻapi ki he ʻunivēsití. Ne u fiefia ke vaʻinga ʻi he tuʻunga hoko ʻo e sipoti naʻá ku manako aí ʻi he ʻiloʻi ʻe mamata mai ʻa hoku fāmilí mo poupouʻi au. Naʻá ku haʻu mei ha fāmili fakaʻofoʻofa, pea naʻe akoʻi kimautolu ʻe heʻemau ongomātuʻá ʻa e ngaahi tuʻunga ʻulungaanga mahuʻinga mo e ngaahi tuʻunga moʻui ʻo e ongoongolelei ʻo Sīsū Kalaisí.
Ka ʻi heʻeku hoko ko ha tokotaha ako mo sipoti taʻu 20 vaʻinga soka pea moʻui ʻi he “moʻui faka-ʻunivēsití,” naʻá ku liʻaki ai ʻa e ngaahi tefitoʻi moʻoni ko ia naʻe akoʻi kiate aú. Naʻá ku ʻalu ki he kalasí mo vaʻinga soka ʻi he lolotonga ʻa e uiké pea paati ʻi he fakaʻosinga ʻo e uiké, ʻo tui kuó u maʻu ʻa e fiefia moʻoní. He toki meʻa hala moʻoni ia! Ka koe meʻa ia ʻoku fai ʻe Sētané—ʻokú ne ʻai ʻa e meʻa halá ke manakoa ke hili ha taimi siʻi kuo hā lelei ia.
ʻI hoku taʻu tolu ʻi he ʻunivēsiti, ne ʻikai ke toe lava ke mapuleʻi ʻa ʻeku moʻuí. Naʻá ku fakahoko ha ngaahi fili fakavalevale peá u ʻiloʻi ai ʻoku ou feitama. Naʻe liliu kakato ʻeku fakakaukau fekauʻaki mo e moʻuí. Ne ʻikai ke toe ʻuhinga pē ia kiate au, ka naʻe toe kau ki ai mo e pēpē ʻi hoku manavá. Naʻe lea hangatonu mai ʻa e ngaahi lea ʻi he ʻAlamā 36:17–21 ki hoku lotó koeʻuhí naʻá ku ongoʻi ha mamahi fakaʻotua mo e tautea lahi ko ʻeku ngaah filí, ʻo tatau mo ia ne ongoʻi ʻe ʻAlamaá.
ʻE lava ke faingataʻa pea fonu ʻahiʻahi ʻa e hala ʻo e fakatomalá. Naʻe faingataʻa kiate au ke u pehē naʻá ku hala pea ne u fakahoko ha fehālaaki. Ko e taha ʻo e ngaahi momeniti fakailifia taha ʻo ʻeku moʻuí ʻa e fehangahangai ko ia mo hoku ngaahi ʻofaʻangá pea fakahā kiate kinautolu ʻoku ou feitama. Naʻá ku talanoa foki mo ʻeku pīsopé pea pau ke u fehangahangai mo ha fakataha alēlea fakatonutonu, ʻa ia ne iku ai ʻo ʻikai ke u lava ʻo maʻu ʻa e sakalamēnití ʻi ha kiʻi vahaʻa taimi fuoloa. Naʻá ku fie hola pea fakakaukau ʻoku ʻikai ko e meʻa moʻoni eni. Ka naʻe moʻoni ia. Ko e moʻui foʻou moʻoni ʻeni ne u ʻi aí. Naʻá ku hanganaki atu ki ha halafononga faingataʻa ʻo tatau ai pē pe ko e hā.
Ne loto mamahi ʻa hoku fāmilí ʻi heʻeku ngaahi filí, ka naʻa nau ʻofa ʻiate au pea fie maʻu ʻa e lelei tahá maʻaku, ʻo hangē pē ko ʻetau Tamai Hēvaní. Naʻá ku faʻa fehuʻi ʻi he taimi lahi pe ʻe anga fēfē Haʻane fakamolemoleʻi au hili ʻa e tā tuʻo lahi ʻa ʻeku ngaahi tō nounoú. Ko e tali naʻá ku maʻú ʻi he taimi kotoa pē, koeʻuhí ʻokú Ne ʻofa ʻiate au pea fie maʻu ke u toe foki hake kiate Ia. Ne u ʻiloʻi naʻá ku fakamamahiʻi ʻa ʻeku ongomātuʻa fakamāmaní, ka naʻe toe fakamamahi ange ʻa ʻeku fakakaukau ki he lahi ʻo ʻeku fakamamahiʻi ʻa ʻeku Tamai ʻi he Langí.
Ka, naʻá ku kei ongoʻi tuēnoa pē mo hē holo ʻi he ngaahi ʻuluaki māhina ʻo ʻeku feitamá, ʻo ʻikai fakapapauʻi ʻa e hoko atú. ʻI he kamata ke u lotu fakamaatoato ange ki he Tamai Hēvaní ki ha tākiekina mo ha tokoni, ne u ʻiloʻi ai ne ʻikai pē ke u tuēnoa. Naʻá Ne ʻi ai maʻu pē ʻo tatali mai ke u fekumi ange kiate Ia. Naʻe ʻi ai ha fuʻu liliu lahi ʻo hoku lotó. Naʻá ku fie maʻu ha moʻui ʻoku makehé. Ne u fie maʻu ke u moʻui maʻa Kalaisi. Na’.a ku fie maʻu ke taau ke toe maʻu ʻa e sakalamēnití. Naʻá ku fie maʻu ke u taau ke mali ʻi he temipale ha ʻaho, ʻa ia ko ha meʻa naʻá ku fakakaukau ʻoku taukakapa makatuʻunga ʻi heʻeku ngaahi fehālaakí.
Ne u ʻiloʻi he taimi ko ia ʻa e mo’oni ‘o e mālohi ʻo Sīsū Kalaisí ko hoku Fakamoʻuí. Naʻá ku mamata ki he ngaahi ʻaloʻofa ongongofua mei he ʻEikí lolotonga ʻa e ngaahi māhina nounou ʻe hiva ko iá. Naʻá ku maʻu ha tui lahi ange ʻi ha toe taimi kimuʻa ʻi heʻeku moʻuí. Ko e tui ia kia Sīsū Kalaisi naʻá ku malava ai ʻo fili ke ohi atu ʻa ʻeku pēpē fefine fakaʻofoʻofá. Naʻe lahi fau ʻa e mamahi ʻi hono tuku atu ke ohi ʻeku tama fefiné. Ka naʻe lahi ange ʻa e fiefia naʻá ku ongoʻi ʻi hono tokoniʻi ha ʻofefine ʻe taha ʻo e ʻOtuá ke aʻu ki hono fāmili taʻengatá. Naʻá ku hoko ʻo toe lelei ange mei he aʻusia ko iá, ʻa ia te tau malava kotoa ʻo maʻu kapau te tau ongoʻi fakaʻiseʻisa moʻoni pea fakatomala—ʻo fakaʻatā e ʻEikí ke Ne toe fakakakato kitautolu.
Talu mei ai mo hono tāpuekina au ʻi he ʻaho kotoa pē.
Mou ʻilo, ne ohi mai foki mo au ʻi heʻeku kei pēpeé, pea hili ha māhina ʻe ono hono tuku atu ʻeku tama fefiné ke ohí, ne u maʻu pea toe fetaulaki mo e faʻē naʻá ne fāʻeleʻi aú. Ko ha mana ia. Hili ha taimi nounou mei ai, naʻá ku fetaulaki mo hoku husepāniti ʻi he kahaʻú ʻa ia ne u iku ʻo mali mo ia ʻi he temipalé. ʻOku ou hoko he taimí ni ko e faʻē ki ha fānau fakaʻofoʻofa ʻe toko fā.
Ne hoko ʻeku feitama ne ʻikai palaní mo hono tuku atu ʻa e ʻuluaki fua ʻo hoku manavá ke ohí ke ne liliu ʻeku moʻui ʻo taʻe ngata. Kuó u ako lahi fekauʻaki mo au pea mo e ʻofa ʻoku maʻu ʻe he ʻOtuá mo Sīsū Kalaisi kiate au pea mo kitautolu takitaha. Kuó u maʻu ʻi he loto mamahí, ongoʻi mamahí, ngaahi loʻimatá, ngaahi lotu liló, mo e ngaahi lotu kuo talí, ʻa e ʻamanakí leleí, ʻofá, faʻa fakamolemolé, mo e ʻofa mamahí. Kuó u ʻiloʻi ko e tuku atu ʻo e fānaú ke ohí ʻoku fakafekauʻaki ia mo e ʻofá. Kuó u ʻilo ke fakamahuʻingaʻi ʻa hono maʻu ʻo e sakalamēnití. Kuó u ʻiloʻi ne ʻikai ke u hē lahi—naʻá ku fie maʻu pē ke toe foki ki he hala naʻá ku mavahe mei aí. ʻI heʻeku fakatomala moʻoni mei heʻeku ngaahi angahalá pea ako ke fakafalala pea maʻu ha tui kia Kalaisí, naʻá Ne fakafoki mai au ki Heʻene tākangá pea tāpuekina lahi fau ʻeku moʻuí. ʻOku moʻoni ʻa e Fakalelei ʻa Sīsū Kalaisí pea ʻoku feʻunga ʻa ʻEne ʻaloʻofá maʻatautolu kotoa (vakai ʻEta 12:27).