Ngāue ʻi he Tui
ʻOku fakatefito ʻetau kaveinga he taʻu ní ʻi he kupuʻi lea “ʻalu ʻo [fakahoko],” ko ha lea loto-toʻa naʻe fai ʻe he palōfita faivelenga ʻi he Tohi ʻa Molomoná ko Nīfaí ʻi he 1 Nīfai 3:7. Kae mahalo ko e konga fakafiemālie taha ʻo e veesi ko ʻení ko e taimi ne akonaki ai ʻa Nīfai ʻo pehē ʻe hanga maʻu pē ʻe he ʻEikí ʻo “teuteu ha hala” ke ikunaʻi ai ʻEne ngāué.
Ko e tui ko ia ʻe teuteuʻi ʻe he ʻOtuá ha hala maʻaú ʻoku fie maʻu ki ai ha tui loloto. Ne ʻiloʻi ʻe Nīfai kapau naʻe folofola ange ʻe he ʻOtuá ke ne fai ha meʻa, ʻe toe tokoniʻi pē foki ia ʻe he ʻOtuá ke ne lavaʻi ʻa e ngāue ko iá. Pea ʻoku tau ʻiloʻi ne makatuʻunga ʻi he tui mo e loto-falala ʻa Nīfai ki he ʻEikí, naʻá ne malava ai ke toe fakafoki mai ʻa e ʻū lauʻi peleti palasá.
Pea hangē ko Nīfai, te tau lava mo kitautolu ʻo maʻu ha tui ke “ʻalu ʻo [fakahoko].” Mahalo he ʻikai te ke maʻu maʻu pē ha mahino ki he “ʻuhinga” ʻo e ngaahi fakahinohino mei he kau taki ʻo e Siasí pe mātuʻá pe ko e ngaahi ueʻi ʻa e Laumālie Māʻoniʻoní. He ʻikai ke ʻuhingamālie maʻu pē ia, pe mahalo ʻe hā ngali faingataʻa ia ke aʻusia. Ka “ʻoku ʻikai ha meʻa ʻe faingataʻa ki he ʻOtuá” (Luke 1:37). ʻI hoʻo laka atu ʻi he tuí, te ke ʻiloʻi ʻoku ʻi ai maʻu pē ha ʻuhinga mo ha palani ʻa e ʻOtuá.
He ʻikai teitei folofola atu ʻe he ʻOtuá ke ke fai ha meʻa ʻokú Ne ʻafioʻi he ʻikai te ke lavaʻi. He ʻikai ke Ne teitei ʻoatu ha ngāue he ʻikai ke ke lava ʻo ikunaʻi. Ka ʻe malava ke Ne kole atu ke ke fai ha meʻa ʻe fie maʻu ki ai ʻa e tui mālohi mo e falala ki he Laumālié ke Ne tataki koe.
Ko e kī ki hono maʻu ʻa e tui ke “ʻalu ʻo [fakahokó]” ko e fakatupulaki ʻa e loto-falalá. Ko e taimi ʻokú ke maʻu ai ʻa e loto-falala ki he ʻEikí, te ke falala te Ne tokoniʻi koe ke ke ikunaʻi ʻa e ngāue kotoa pē. Fakakaukau ki ai—ne ʻomi koe ki he māmaní ʻi he kuonga ko ʻení he ʻokú ke mateuteu mo malava ke fakahoko e ngāue ʻa e ʻEikí ʻi he taimí ni. Kuo fili koe ke ke moʻui ʻi he kuonga ko ʻení he ʻoku falala atu ʻa e ʻEikí kiate koe.
ʻOku fakaofo ʻa e ngaahi tāpuaki te ke maʻu ʻi hoʻo ngāue ʻi he tui mo e loto-falalá. Te ke ʻiloʻi ai ʻko hai koe mo hoʻo taumuʻá ʻi ha founga lelei mo pau ange; te ke fakatupulaki hoʻo falala kia Sīsū Kalaisi mo ʻEne Fakaleleí; pea te ke ʻiloʻi ai, ʻi he tokoni ʻa e ʻEikí, ʻokú ke feʻunga pē.