Ko Ha Tali ki ha Tohi ne Teʻeki ʻAvé
Naʻá ku fakatokangaʻi e tohí ʻi heʻeku kato folofolá peá u fakaava ia. ʻOku ou fiefia lahi naʻe ʻikai ke u meili ia!
Tā fakatātaaʻi ʻe David Green
Naʻe talitali ʻe heʻeku mātuʻa leleí ki hona ʻapí ha ngaahi foha ʻe toko fā pea mo au, ko ʻena tama fefine pē ʻe tahá, ʻo fakahokohoko pē. Kuo mau vāofi maʻu pē ʻo lahi ange ʻi homau taʻu motuʻá. Kuo mau fepoupouaki pea lahi mo ha ngaahi manatumelie mahuʻinga ʻo e taimi ne mau feohi fakataha aí. Kuo mau hoko maʻu pē ko ha ngaahi kaungāmeʻa lelei!
Ko hono ʻuhinga ia naʻá ku fuʻu ongoʻi loto-mamahi ai ʻi he taimi naʻe fili ai ʻe ha taha hoku ngaahi tuongaʻané ke toʻo ʻene moʻuí. Naʻá ku hohaʻa he ʻikai lava ʻe hoku mafú ʻo kātekina e mamahí—ʻoku ʻikai ko e lea totonú ʻa e mamahí. ʻOku ʻikai ha lea ʻe mālohi feʻunga ke ne fakahaaʻi e aʻusia fakamamahi ʻo e mole ha taha ʻokú te ʻofa ai ki he taonakitá. ʻOku liliu fakafokifā ai hoʻo moʻuí.
Naʻá ku falala ki he ʻEikí ke tokoniʻi au ke u tokangaʻi hoku fāmilí mo fakahoko hoku ngaahi fatongia kehé lolotonga ʻeku fefaʻuhi mo e ngaahi fehuʻi fakatupu lotomamahi fekauʻaki mo hoku tuongaʻané mo ʻene pekiá.
ʻI heʻeku kole tokoni ki he ʻEikí, naʻá ku ongoʻi ne ueʻi au ke hiki ʻeku ngaahi fehuʻi ki he palōfitá ʻi ha tohi. Naʻá ku tui moʻoni naʻe fuʻu mamafa mo mahuʻinga ʻeku ngaahi fehuʻí pea ko ha palōfita pē te ne lava ʻo talí, ka naʻá ku ʻiloʻi mahalo naʻe ʻikai fie maʻu ke ʻave ha tohi ki he palōfitá. Naʻá ku kiʻi momou ka naʻá ku manatu ki heʻeku lava ʻo ngāue fakatatau ki heʻeku ngaahi ueʻi he kuohilí.
Naʻá ku fai pē ʻa e tohí ʻi he loʻimataʻia kia Palesiteni Lāsolo M. Nalesoni. Naʻá ku tohi fekauʻaki mo e ongo naʻá ku maʻú mo e founga ʻeku laka ki muʻá ʻo kapau pē naʻá ku ʻiloʻi ʻa e ngaahi tali ki he ngaahi fehuʻi ʻi heʻeku fakakaukaú. Naʻá ku fakaʻosi ʻeku tohí, faʻo ia ki ha sila ne fakatuʻasila kia Palesiteni Nalesoni, pea faʻo ia ki heʻeku kato folofolá.
Naʻe ngalo ʻiate au ʻa e tohí. Naʻá ku fakatokangaʻi ia ʻi heʻeku kato folofolá hili ha vahaʻataimi peá u fakaava ia. ʻI heʻeku lau ʻa e tohí, naʻá ku fakatokangaʻi ne fakafou ʻi he tuí mo ʻeku ako folofolá, lotú, ʻalu ki he temipalé, mo e faʻa kātakí, ne tataki au ʻe he Laumālie Māʻoniʻoní ki he tali ki he fehuʻi kotoa pē naʻá ku hikí! Naʻá ku ongoʻi ofi ki he Fakamoʻuí mo ʻEne ʻofá.
ʻOku ou fiefia lahi naʻe ʻikai ke u meili ʻa e tohí! Ka naʻá ku maʻu ha ngaahi aʻusia mahuʻinga naʻá ne toe akoʻi mai ʻoku ʻofeina au ʻe he ʻEikí mo e kotoa ʻEne fānau fakafoʻituituí, pea te Ne tataki mo fakahinohinoʻi kitautolu.
Naʻá ku tui ʻi ha taimi ʻe taha naʻe fuʻu faingataʻa ʻeku ngaahi fehuʻí pea ko ha palōfita pē te ne lava ʻo tali kinautolú, ka kuó u ʻiloʻi ʻiate au ʻa e moʻoni ʻo e folofola ʻa e Fakamoʻuí: “ʻE ʻikai te u tuku ke tuenoa ʻa kimoutolu: te u haʻu kiate kimoutolu (Sione 14:18).