Te u lava fēfē ʻo poupouʻi e palōfitá?

ʻAokosi–6 Sepitema

Ko Samuela ko e tangata Leimaná ko ha palōfita ia naʻe malanga ki he kakai Nīfaí. Naʻe fakafisingaʻi ia ʻe he tokolahi, ka naʻe fanongo ha niʻihi toko siʻi mo tui ki heʻene ngaahi akonaki ne ueʻi fakalaumālié. Lolotonga e konifelenisi lahí mo ha ngaahi taimi kehe, ʻoku tau maʻu ai e faingamālie ke fanongo mo poupouʻi ʻa Palesiteni Lāsolo M. Nalesoni, ko e palōfita ʻi hotau kuongá.

ʻI hoʻo lau fekauʻaki mo Samuela ko e tangata Leimaná, fakakaukau ki he ngaahi founga te ke lava ai ʻo poupouʻi e palōfitá he ʻahó ni ʻi he leá mo e ngāué fakatouʻosi.

Ngaahi Fakahinohino ki Hotau Kuongá

Lolotonga e kuonga ʻo Samuelá, naʻe fakaʻau ke faiangahala e kakai Nīfaí, ko ia naʻe fakaafeʻi ai ʻe Samuela e kakaí ke nau fakatomala. Naʻá ne fakamoʻoni foki ki hono ʻaloʻi ʻo Sīsū Kalaisí mo fakatokanga ki he ngaahi fakatuʻutāmaki ʻo e angahalá (vakai, Hilamani 14:11–12). Ko e hā mo ha ngaahi tefitoʻi moʻoni kehe naʻe akoʻi ʻe Samuela? Ko e hā kuo akoʻi ʻe Palesiteni Nalesoni ʻi hotau kuongá?

ʻOku ʻIkai Fekauʻaki ia mo e Manakoá

Ko e tokolahi taha ʻo e kakaí ne nau ʻita ʻi he ngaahi akonaki ʻa Samuelá, pea nau ʻohofi ia ʻaki ʻa e maka mo e ngaahi ngahau. Naʻe pehē ʻe Samuela naʻa nau loto-fiemālie pē ke muimui kiate kinautolu ne nau pehē ʻoku ʻikai ha ngaahi nunuʻa ki he faiangahalá (vakai, Hilamani 13:25–27).

Kuo pehē ʻe Palesiteni Nalesoni ʻi hotau kuongá, “ʻOku tātātaha ke manakoa e kau palōfitá.”¹ Te tau lava fēfē ʻo fakaʻehiʻehi mei hono fakaʻaongaʻi e “maka” mo e “ngaahi ngahau” ʻoku tolo ʻe he kakaí ki he kau palōfita he kuonga ní?

Te Ke Fanongo Nai?

Neongo naʻe fakafisingaʻi ʻe he kakai tokolahi ʻa Samuela, ka naʻe tali ʻe he niʻihi ʻa ʻene pōpoakí. Naʻa nau ngāue leva ʻo fakatatau ki heʻene ngaahi leá ʻaki ʻenau fakatomala pea papitaiso. Ko e hā te ke lava ʻo fai ke ʻoua naʻa ngata pē ʻi hoʻo fanongó ka ke ngāue foki ʻo fakatatau ki he ngaahi akonaki ʻa hotau kau palōfitá mo e kau ʻaposetolo ʻi he ngaahi ʻaho kimui ní?

Tā fakatātaaʻi ʻe Dan Burr