Fānau ʻa ha Ongomātuʻa Fakalangi

Fai ʻe Sisitā Lisa L. Harkness

Tokoni ʻUluaki ʻi he Kau Palesitenisī Lahi ʻo e Palaimelí

Naʻe toʻo mei he Aubrey Eyre, “Sister Cordon and Sister Harkness Say African Women Are a Powerful Force for Change,” Church News, June 11, 2019.

Neongo ʻoku tau takitaha maʻu ha ngaahi aʻusia kehekehe ʻi heni ʻi he māmaní, ka ʻoku ʻi ai ha meʻa ʻe taha ʻoku tau faitatau kotoa ai. Ko e fānau kotoa kitautolu ʻa ha ongomātuʻa fakalangi!

Naʻá ku lea ʻi ha taimi ʻe taha ki ha kulupu ʻo e houʻeiki fafiné ʻi ʻAfilika Tonga. Naʻe kamata ke u ngūngū ki he himi “Fakamālō ki he ʻOtua.” Hili pē ha ngaahi nota siʻi, naʻe hiva leʻolahi hake ʻa e kau fafiné ni! Naʻe fakafonu hoku lotó ʻe heʻenau hivá. Naʻa mau ongoʻi kotoa e ʻofa ʻa e ʻOtuá.

Lolotonga e folau tatau pē, naʻá ku ʻaʻahi ki he Lepapulika Temokālati ʻo Kongokoú pea lea ki he houʻeiki fafiné mo e tamaiki fefiné ʻi ha fakataha lotu he ʻaho Sāpaté. Naʻa nau heka pasi mai mei he feituʻu kotoa ke nau kau ki ai. Naʻe tokolahi ʻaupito e kakaí pea naʻe pau ke mau fokotuʻutuʻu ha toe ʻotu sea ʻi he ngaahi vahaʻa seá, pea naʻe falala e kakaí he ngaahi matapā sioʻatá kae lava ʻo hao e tokotaha kotoa ki he lokí! Naʻe fakaofo moʻoni kiate au ʻa e houʻeiki fafine ko ʻení. ʻOku nau liliu honau tukui koló ʻi ha ngaahi founga mālohi. ʻOku nau vahevahe e ʻofa ʻa e ʻOtuá.

Naʻá ku feʻiloaki mo ha fānau Palaimeli tokolahi ʻi ʻAfilika. Ko hanau tokolahi ko kinautolu pē ʻi honau fāmilí ʻoku kau ki he Siasí. Ka ʻoku nau omi pē ʻiate kinautolu ki he lotú he uike takitaha. ʻOku tokoni ʻa e Palaimelí ke nau ongoʻi e ʻofa ʻa e ʻOtuá.

ʻOku omi e kakai ʻo ʻAfiliká mei ha ngaahi fonua mo e anga fakafonua kehekehe. ʻOku nau lea ʻi ha ngaahi lea fakafonua lahi. ʻOku hulu fau ʻenau tuí mo ʻenau ʻofa ki he ʻOtuá. ʻI heʻeku vakai ki honau fofongá, ʻoku ou lava ʻo ongoʻi naʻa nau ʻiloʻi ʻa e moʻoní pea maʻu ha ngaahi fakamoʻoni ki he ongoongolelei ʻo Sīsū Kalaisi kuo fakafoki maí. Naʻa nau ʻiloʻi ko e fānau kinautolu ʻo ha ongomātuʻa fakalangi.

Ko e meʻa tatau pē kiate koé. Ko ha fānau koe ʻo ha ongomātuʻa fakalangi. ʻOkú Na ʻofa ʻiate koe! ●