Ko ʻEku Tohi Fakamatala ʻo e Konifelenisí

Konifelenisi Lahi ʻo ʻEpeleli 2020

Ko e ngaahi fika kotoa e ʻū pēsí ʻoku maʻu mei he Liahona, ʻo Mē 2020, ʻe maʻu ʻi he ʻinitanetí he liahona.ChurchofJesusChrist.org.

Tā ‘o e Temipale Sōlekí naʻe fai ‘e Alma mo Nicole Smith; to‘omataʻu: faitaa‘i ʻe Leslie Nilsson

Ngaahi Temipale Foʻou ʻe 8 Ne Fanongonongó

• Bahía Blanca, Argentina

• Tallahassee, Florida, USA

• Lubumbashi, Democratic Republic of the Congo

• Pittsburgh, Pennsylvania, USA

• Benin City, Nigeria

• Syracuse, Utah, USA

• Dubai, United Arab Emirates

• Shanghai, People’s Republic of China

“ʻOku ʻikai ke tau omi ki he temipalé ke toitoi pe hola mei he ngaahi kovi ʻo e māmaní. Ka, ʻoku tau omi ki he temipalé ke ikunaʻi e māmani ʻo e koví.”

Naʻe pehē ʻe ‘Eletā David A. Bednar ʻo e Kōlomu ‘o e Kau ʻAposetolo ‘e Toko Hongofulu Mā Uá, “Tuku Ke Langa ʻa e Falé Ni Ki Hoku Hingoá,” 86; ko e toki tānaki atu e fakamamafá.

ʻOku Tau “Fanongo [Fēfē] Kiate Iá”?

‘Okú ke fakamatala fakanounouʻi fēfē ʻa e konifelenisi fakamāmanilahí mo hono ngaahi lea ʻoku lahi hake ʻi he 25? ʻI he lea fakaʻosi ʻa Palesiteni Lāsolo M. Nalesoní, naʻá ne fakahoko ia ʻaki e foʻi lea ʻe tolu ne tuʻutuʻuni fakalangi, ‘Fanongo Kiate Ia.’ … ʻOku mau lotua te mou kamata foʻou moʻoni ke fanongo, tokanga, mo talangofua ki he ngaahi lea ʻa e Fakamoʻuí” (“Laka Ki Muʻa ʻi he Tui,” 114).

Sio pe lau ‘ene leá mo e ngaahi lea ʻa e kau lea ko ‘ení ʻi ho‘o feinga maʻu pē ke fakaafe‘i mo fakatokangaʻi ‘a e fakahaá.

• Naʻe pehē ʻe Neil L. Andersen: “Te tau lava ʻo ʻfanongo kiate Ia’ koeʻuhí ko e tāpuaki ʻo e Fakalelei taʻemafakatataua ʻa e Fakamoʻuí. … ʻOku fakaava e ngaahi matapā ‘o e langí ʻe he tuí, talangofuá, anga fakatōkilaló mo e loto-mo‘oní” (“Ngaahi Manatu Melie Fakalaumālie Fakangalongataʻá,” 21).

• Na‘e fakamanatu mai kiate kitautolu ʻe ‘Eletā Quentin L. Cook “ʻoku lava ke ma‘u ‘a e fakahā fakatāutahá ʻe kinautolu kotoa pē ʻoku nau fekumi ʻi he loto fakatōkilalo ki he fakahinohino mei he ʻEikí,” pea naʻá ne vahevahe ʻa e ngaahi tefitoʻi moʻoni ʻe tolu ke tokoniʻi lelei ange ai kitautolu ke teuteu ke maʻu ha fakahā (vakai, “The Blessing of Continuing Revelation to Prophets and Personal Revelation to Guide Our Lives,” 98–99).

• Naʻe pehē ʻe ʻEletā Ricardo P. Giménez, “Neongo e tui ʻaupito ʻa e kakai tokolahi kia Sīsū Kalaisí, ko e fehuʻi mahu‘ingá pe ʻoku tau tui nai kiate Ia mo e pe ʻoku tau tui nai ki he ngaahi meʻa ʻokú Ne akoʻi mo kole mai ke tau faí” (“Ko Hono Maʻu ha Hūfangaʻanga mei he Ngaahi Faingataʻa ʻo e Moʻuí,” 102).

‘Oku ou Fie Hoko ko ha Konga ʻo e Meʻá ni!

Fai ‘e Lauren Soqui Bohman

‘I heʻemau nofo ʻi ‘Oamaní, ne u fakatovave mo hoku husepānití ke fakamohe ʻema fānaú ki honau mohengá kae lava ke ma sio he sēsini pongipongi ʻo e konifelenisí ʻoku fakahoko he tafaʻaki ʻe taha ʻo e māmaní. Ne ma lau e ngaahi ʻahó kae ʻoua kuo aʻu ki he konifelenisí, heʻema fakaʻānaua ki he fakahinohino mo e nonga naʻá ma ʻilo ʻe haʻu mei he Tamai Hēvaní ʻo fakafou mai Heʻene kau palōfitá mo e kau “ʻaposetoló.”

Na‘e fakahā mai ʻe Sisitā Joy D. Jones ʻoku ʻofa ʻa e ʻEikí he ngāué, ko ia ai ko e hā e lahi ʻo e ngāue ʻoku ou loto ke u fakahoko ke muimui ʻi Heʻene tā sīpingá?

Na‘e fehuʻi ʻe Palesiteni Henry B. Eyring ko e hā hotau ngafa te tau fakahoko ʻi he fehokotakiʻanga ko ʻeni ʻi he hisitōliá.

Naʻe kole mai ʻe Sisitā Bonnie H. Cordon mo ‘Eletā Jeffrey R. Holland kiate kitautolu ke tau fakakaukau ki he founga te tau fakaulo ai ʻetau māmá ke ʻuhingamālié.

Na‘á ku ongoʻi ʻa e lahi ʻo ʻeku fiemaʻu ke u hoko ko e konga ʻo e lelei ko ia ʻoku ʻunuakiʻi vave ki muʻa ʻe he ʻEikí. Naʻe ueʻi fakalaumālie au ʻe he konifelenisí ke fakafoʻou ʻeku ngaahi ngāue ke tokoniʻi ʻeku fānaú ʻi heʻenau fakalakalaka fakatāutahá, ke fekumi ke hoko ko ha kaungāmeʻa faʻa fakakaukau mo fakalaumālie moʻoni ange, ke fakahoko e ngaahi ngafa hisitōlia fakafāmilí hangē ko e fakahū e ngaahi lekōtí, mo fekumi ki he ngaahi faingamālie fakatupu fakakaukau foʻou ke tauhi ki he ʻOtuá ʻaki hono tokoniʻi ʻEne fānaú.

“Te tau lava ʻo tokoni. Te tau lava ʻo fakaulo ʻaki hotau lotó ʻetau ngaahi māmá ke lava e niʻihi kehé ʻo mamata. Te tau lava ʻo fai ha fakaafe. Te tau lava ʻo tokoniʻi ha niʻihi ʻoku nau ngaʻunu ki muʻa ʻaki ha sitepu ʻe taha ki he Fakamoʻuí, tatau ai pē pe ʻoku fēfē hono fakatuaiʻí. Te tau lava ʻo tānaki ʻa ʻIsileli.”

Bonnie H. Cordon: Palesiteni Lahi ʻo e Kau Finemuí,“Koeʻuhi Ke Nau Mamata” 80

Fakalaulauloto ki Heni …

Ngaahi Meʻafoaki ʻa e Houʻeiki Fafiné mo Tangatá

ʻE ala ‘ākilotoa kitautolu ʻe ha ngaahi pōpoaki ta‘efaitotonu fakafonua mo e “ʻuluaki-pē-aú,” ka na‘e akoʻi ‘e Sisitā Jean B. Bingham ko e houʻeiki tangatá mo fafiné kuo pau ke nau mateuteu ke muimui ‘i he sīpinga fakalangi ʻo e ngāue fakataha ‘i he uouangataha:

“ʻOku maʻu ʻe he houʻeiki fafiné ha ngaahi meʻafoaki makehe, mo fakalangi mo maʻu ha ngaahi fatongia makehe, ka ʻoku ʻikai ke nau lahi ange—pe siʻisiʻi ange—honau mahuʻingá ʻi he ngaahi meʻafoaki mo e fatongia ʻo e kakai tangatá. Naʻe faʻu mo fie maʻu kotoa ʻeni ki hono fakahoko e palani fakalangi ʻa e Tamai Hēvaní ke foaki ki Heʻene fānaú takitaha ʻa e faingamālie lelei taha ke fakahoko ʻaki e meʻa te ne malava fakalangi ke aʻusiá” (vakai, United in Accomplishing God’s Work,” 63).

‘Oku tau mateuteu nai ke fefakamahuʻinga‘iʻaki ko e ngaahi hoa-ngāue mahuʻinga ʻi he ngāue ‘o e fakamoʻuí?