Konga ʻo ha Fāmili Taʻengata

ʻI heʻeku ngaahi aʻusia fakatāutahá mo ʻeku ngāue ʻi he Kau Palesitenisī Lahi ʻo e Fineʻofá, kuó u mātātonu ʻoku ʻikai moʻui e kakai tokolahi ʻi he māmaní ʻi ha ngaahi tūkunga fakafāmili haohaoa. Ko hono moʻoní, ʻoku ʻikai ke u tui ʻoku haohaoa e tūkunga fakafāmili ʻa ha taha! Naʻe fakataumuʻa ʻa e fakamatala ʻi he “Ko e Fāmilí: Ko ha Fanongonongo ki Māmani” ke fakamanatu mai kiate kitautolu e fāmili taʻengata ʻofá ʻa ia ʻoku tau kau ki aí. ʻOkú ne akoʻi mai ʻoku tau kau kotoa ʻi he fāmili ʻo e ʻOtuá mo fakamanatu mai neongo pe ko e hā hotau tūkunga fakafāmili ʻi he māmaní, ʻoku ʻātakaiʻi kitautolu ʻe he ngaahi tuongaʻane mo e tuofāfine.

• Koeʻuhí ʻoku ʻikai ko ha kakai haohaoa kotoa kitautolu, mahalo he ʻikai teitei haohaoa hotau tūkunga fakafāmilí ʻi he moʻuí ni. Ka ʻe lava ʻe hotau Fakamoʻuí ʻo ʻomi e fakamoʻuí. ʻOku ou vahevahe ʻi he peesi 26, ʻa e founga naʻe ʻomi ai ʻe he ngāue fakatemipalé ʻa e fakamoʻui ʻa e ʻOtuá ki hoku fāmilí ʻi he ongo tafaʻaki fakatouʻosi ʻo e veilí.

• ʻE lava ʻe he ako lahi ange ki he ngaahi tefitoʻi moʻoni ʻi he fanongonongó ʻo tokoni ke fakamālohia hoʻo tuí mo kinautolu ʻoku mou feohí, neongo pe ko e hā hoʻo ngaahi tūkunga fakafāmilí. ʻE lava ʻe he fakamatala ʻoku kamata ʻi he peesi 12 ʻo ueʻi ha ngaahi fakakaukau ʻiate koe ki hono fakaʻaongaʻi e ngaahi akonakí ni ʻi hoʻo moʻuí.

ʻOku ʻofa ʻetau ongomātuʻa fakalangí ʻiate kitautolu ko ʻena fānaú, pea ʻoku ʻi ai ha palani ʻetau Tamai Hēvaní maʻatautolu takitaha. ʻOku ʻuhinga ia ʻoku ʻi ai ʻEne palani maʻau. Kātaki ʻo hokohoko atu hoʻo ngaʻunu kiate Ia ʻi he tuí. Tokoniʻi e kau mēmipa ho fāmili taʻengatá ʻi he hala ke foki kiate Iá. Te Ne ʻoatu e ʻamanaki lelei mo e fakamoʻui ʻi hoʻo fonongá. Pea te tau takitaha maʻu ʻa e faingamālie ke foki ki ha ʻapi fakalangi haohaoa mo taʻengata ʻi ha ʻaho.

ʻOfa ke faitāpuekina mo fakamālohia koe ʻe he ʻOtuá.

Sisitā Reyna I. Aburto

Tokoni Ua ʻi he Kau Palesitenisī Lahi ʻo e Fineʻofá