Fakaʻilekitulōnika Pē
Ko Hono Akoʻi Au ʻe he Faingataʻaʻia Fakaesino Hoku ʻOfefiné fekauʻaki mo e ʻAloʻofá
ʻOku ʻafioʻi ʻe he Tamai Hēvaní ʻa e meʻa ʻoku tau fehangahangai mo iá. Pea ʻokú Ne ʻafioʻi ʻa e ngaahi tuʻunga te tau lava ʻo aʻusiá.
Toʻo mei ha fakataha lotu ʻa e ʻUnivēsiti Pilikihami ʻIongí ʻa ia naʻe fai ʻi he ʻaho 10 ʻo Siulai, 2018. Ke maʻu e leá kakato, ʻalu ki he speeches.byu.edu.
Ko hoku ʻofefine fika uá, ko Kalolaine, naʻe fāʻeleʻi tafa fakatuʻupakē ia. Naʻe mahino mei he lahi ʻo e toto ne molé, ʻa e siʻi ʻo e ʻea ʻokisikena ʻi hono ʻutó, ʻa ia ne hoko ai ha maumau lahi.
Ko e hili ʻeni ha taʻu ʻe hongofulu mā nima mei ai, ʻoku kei ʻi he māhina tolú pē ʻa e tupulaki ʻa Kalolainé. ʻOku ʻikai ke ne malava ʻo lue pe totolo pe teka. ʻOku ʻikai ke ne malava ʻo lea, pea ʻoku ʻikai ke mau fakapapauʻi ʻa ʻene tuʻunga mahinó.
Ko e ongoongo leleí pē, ʻoku ʻofeina ngofua ʻa Kalolaine. ʻOkú ne mata-malimali mo kata leʻolahi. ʻOkú ne saiʻia ʻi he fāʻofuá mo e ʻumá, havilivili mokomokó ʻi hono fofongá, pea mo e ongo ʻo e fanga foʻi laine tungotunga fakatokanga ʻi he hala lahí. ʻOkú ne faʻa lea leʻosiʻi “aah” pea mo lea leʻolahi “AAH”—ʻi he tuʻuapoó.
ʻI he taimi naʻe kei taʻu nima ai ʻa Kalolainé, naʻá ne faʻa ʻā maʻu pē ʻi he vahaʻa ʻo e 2:00 mo e 3:00 a.m. ʻi ha ngaahi pō hokohoko. ʻI ha pō ʻe taha hili ʻene faʻa ʻā taimi halá, naʻá ku tohi ʻeni:
ʻI heʻeku toki fetongi ko ʻeni hono taipá, naʻá ku hivehiva pē ha taha ʻo e ngaahi hiva ʻa e [Palaimelí] naʻe tuʻutuʻuni ʻe Lisi (ko homa ʻofefine ʻe taha) ke mau hiva ʻi he pō kotoa pē kimuʻa pea mau mohé. “ʻOku ʻomi ʻe he ʻOtuá ha ngaahi fāmili kiate kitautolu ke tau aʻusia e tuʻunga ʻokú Ne finangalo ke tau aʻusiá.” Pea naʻá ku sio kia Kalolaine pea fakafokifā pē ʻa ʻeku fakakaukau ki he ngaahi lea ʻo e hivá.
Ne foaki mai ʻe he ʻOtuá ha fāmili maʻaku—kau ai e tokotaha ʻā ko ʻeni he 2:00 a.m—ke tokoni mai ke u aʻusia e tuʻunga ʻokú Ne finangalo ke u aʻusiá. ʻOku hoko atu ʻa e tau ʻo e hivá ʻo pehē, “Ko e founga ʻeni ʻokú Ne vahevahe ai ʻEne ʻofá, he ko e fāmilí mei he ʻOtuá.”
ʻI he pō ko iá, naʻá ku ongoʻi taimi nounou ha fetuʻutaki fakalangi mo e ʻOtuá, ko ha fakamoʻoni ʻokú Ne ʻafioʻi ʻi he foʻi momeniti ko iá kiate au mo Kalolaine mo homa kiʻi fāmilí. ʻOkú Ne ʻofa ʻiate kitautolu. Pea ko Ia, ʻeku Tamaí, ʻokú Ne fakalotolahiʻi au ʻaki hono akoʻi kiate au ʻa e ʻuhinga ʻoku tau fehangahangai ai mo e ngaahi faingataʻá: “ke tokoniʻi kitautolu ke tau aʻusia ʻa e tuʻunga ʻokú Ne finangalo ke tau aʻusiá.”
ʻOku faʻa fai pē foki ʻe Kalolaine ʻene fanga foʻi “AAH” leʻolahí ʻi he lotú. ʻI he taimi ʻoku matuʻaki loto-mamahi mo leʻolahi aí, ʻe ʻave ia ʻe hoku uaifí pe ko au ki he loki talitalí, ʻa ia te ma teke holo ai ʻa Kalolaine ʻi hono sea teketeké, ke fakafiemālieʻi ia ʻi hono teke holó.
ʻI ha Sāpate ʻe taha, ne u teke mai ai ʻa Kalolaine ki he lotú ʻokú ne matuʻaki loto-mamahi, peá u fakakaukau mahalo te ma nofo pē ki he sākalamēnití. ʻI heʻeku lue holo ʻi he loki talitalí naʻe kei loto-mamahi pē ʻa Kalolaine, naʻe kamata ke u fifili pe te ma aʻu nai ki he tuku ʻa e sākalamēnití. Ne hangē ne taʻeʻaonga ʻeku ngaahi feinga kotoa pē ke fakafiemālieʻi iá.
Lolotonga ʻeni naʻe kamata mai e hiva sākalamēnití. Naʻá ku hiva ofi ki he fofonga ʻo Kalolainé. Naʻá ne fakalongolongo pea fakafanongo. Ko e hiva sākalamēniti ʻi he ʻaho ko iá ko e “Tau Lotu pea Tau Hū” (Ngaahi Himi, fika 104), ʻa ia naʻe tohi ʻo hangē pē ne hivaʻi ia ʻe he Fakamoʻuí. Ko hono moʻoní, naʻe tuku ʻeku tokangá kia Kalolaine kae ʻikai ki he himí—kae ʻoua kuo aʻu ki he veesi faá, ʻi he taimi naʻá ku hivaʻi ai e ngaahi leá ni ki hoku ʻofefiné:
Nofo Heʻene ʻofá,
Nofo ʻo taʻengatá.
Naʻá ku sio fakamamaʻu ki he kanoʻimata fakaʻofoʻofa lanu pulū ʻo Kalolainé peá u ongoʻi moʻoni ʻi hoku lotó ʻa e moʻoni ʻo e ngaahi lea ko iá. Ko Sīsū Kalaisi, ʻa e Huhuʻi ʻo māmaní, ʻokú Ne ʻofa ʻia Kalolaine ʻaki ha ʻofa ʻoku “taʻengatá.” ʻI he taimi ʻokú ne loto-mamahi pe mamahi aí, ʻi he taimi ʻoku taʻeʻilo mo taʻemalava ai heʻene mātuʻá ke fakafiemālieʻi iá, ʻoku ʻi ai ha Taha ko hono Kaungāmeʻa Taʻengata ʻokú Ne ʻafioʻi ʻa e meʻa ʻokú ne ongoʻí mo e founga ke fakafiemālieʻi ai iá.
Ne mau toki talanoa fiefia kimuí ni mo hoku fāmilí kau ki ha kaveinga mahuʻinga: ko hoku louʻulú—pe ko e ʻikai ha louʻulú he ʻoku ou tula. Naʻá ku fakamamafaʻi ai, ʻi he Toetuʻú, he ʻikai ke nau fakatokangaʻi au mo hoku louʻulu mingimingí.
Ne tuai-e-kemo ʻa e pehē mai ʻa Lisi, “ʻOku ou tui te tau fuʻu moʻua kitautolu he talanoa ʻa Kalolainé.”
Naʻa mau kakata kotoa, ka naʻá ku ofo ʻi he moʻoni mahuʻinga ne ʻomi ʻe heʻene leá: ʻOku kau ʻi he fakamoʻui ʻoku fakafou ʻi hotau Huhuʻi Maʻongoʻongá ʻa e meʻa kotoa pē, ʻo aʻu ki hoku louʻulú mo e maumau ki he ʻuto ʻo Kalolainé pea mo e meʻa kotoa pē. ʻOku fakaofo ʻa e ʻaloʻofa ʻa Sīsū Kalaisí; ʻoku ʻikai ha fakangatangata ki Hono mālohi faifakamoʻuí.
ʻOku ʻikai ke fuatautau ʻa e tuʻunga taʻengata ʻo Kalolainé ʻi hono faingataʻaʻia fakaesinó; ʻoku fakatatali mai ha kahaʻu fakaʻofoʻofa mo nāunauʻia moʻona koeʻuhí ko Sīsū Kalaisi.