ʻE founga fēfē haʻaku tokoniʻi hoku ngaahi kaungāmeʻa ʻoku ngali loto mafasiá?

Fakaafeʻi Kinautolu ke Mou Feohi

Fakaafeʻi kinautolu ke mou fakahoko ha ngaahi meʻa fakafiefia. ‘Oua ʻe loto-siʻi kapau ʻoku ʻikai ke nau tali ia ʻi he founga ʻokú ke fie maʻú. Ko e taimi ʻe niʻihi ʻe fakaivia pē kinautolu ʻi hano fakaafeʻi ki ha meʻa pe ko e ʻilo ko ia ʻokú ke fie feohi mo kinautolú.

ʻAlisa F., taʻu 16, Uāsingatoni, USA

Fakafiemālieʻi Kinautolu

‘I he taimi ʻoku ou feohi ai mo e ngaahi kaungāmeʻa ʻoku loto-mafasiá, ʻoku ʻikai ke u fakamaʻamaʻaʻi ʻenau palopalemá. Ka ʻoku ou tokoni ke fakamaʻamaʻa honau faingataʻaʻiá. ‘Oku ou feinga ke fakafiemālieʻi mo angaʻofa kiate kinautolu. ʻOku ou ʻoange ʻa e faingamālie ke nau fakamatala ai ki heʻenau ʻitá.

ʻAngipou K., taʻu 18, ʻAivolī Kousi

‘Oua Naʻa Tuku Ke ke Uesia ai

Ko e founga lelei taha ke tokoniʻi kinautolu, pea mo koé, ko hoʻo lea moʻoni. Lea ʻaki e ngaahi meʻa ʻokú ne fakafiefiaʻi koé. Kapau ʻokú ke faingataʻaʻia ʻi he feinga ke ke fiefiá, fakahā ange ʻokú ke ʻi ai ke tokoniʻi kinautolu, ka ke tokangaʻi koe. ‘Oku lelei ange ke ke SAI PĒ ʻi hano uesia foki mo koe ai.

Keila W., taʻu 16, Kenisesi, USA

Fakakaukau ki he Leleí

Te ke lava ʻo fakakaukau lelei ʻi hoʻo feohi mo e ngaahi kaungāmeʻa ʻoku ngali loto-mafasiá, ʻaki hoʻo fakakaukau ki he ngaahi meʻa lelei kuó ke aʻusiá pe ʻoku ʻamanaki ke ke aʻusia ʻi hoʻo moʻuí. Fakakaukau pē ki he ngaahi meʻa ʻokú ke houngaʻia aí, hangē ko e ngaahi aʻusia fakaolí.

Luke P., taʻu 14, Niu Mekisikou, USA

Fakamanatu Ange Kiate Kinautolu e Leleí

‘I he taimi ʻoku ʻi ai haʻaku kaungāmeʻa ʻoku loto-mafasia, ʻoku ou feinga ke talanoa kiate kinautolu fekauʻaki mo ha meʻa ʻoku nau saiʻia ai kae lava ke fakamanatu ange kiate kinautolu ha niʻihi ʻo e ngaahi meʻa lelei fekauʻaki mo honau ʻahó pe moʻuí. Ko e taimi ʻe niʻihi te u feinga ke ʻai ke nau kata pe fai ange ha kiʻi fakahīkihiki ke nau ongoʻi lelei ai, pea taimi ʻe niʻihi ʻoku ou kole ange ke nau fai ha meʻa mahuʻinga ke nau ʻilo ai ʻoku ʻi ai haʻanau taumuʻa.

Kāsoni D., taʻu 15, Tekisisi, USA