Lotu ʻa Kelí
Naʻe lue ʻa Keli mo ʻene faʻeé ki he falelotú pea sio takai holo. Naʻe fakaʻofoʻofa e sēlue ʻa e ʻulu pāmé ʻi tuʻá. Naʻe pehē ʻe he fakaʻilonga ʻi he falé, “Ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.” ‘I ha lea fakafonua kehekehe ʻe tolu—faka-Malei, faka-Siaina, mo e faka-Pilitānia!
Naʻe ʻikai lahi e ʻilo ʻa Keli kia Sīsū Kalaisí. Pea naʻe teʻeki ke ne ʻalu ki he lotú kimuʻa. Naʻe lotu heni ʻa Lī Lini, ko e kaungāmeʻa ʻene faʻeé. Naʻá ne fakaafeʻi ʻa Keli mo ʻene faʻeé ke nau ō.
ʻI heʻenau hū ki lotó, naʻe malimali ʻa e kakaí mo fakalea ange. Naʻe angalelei ʻaupito ʻa e tokotaha kotoa. Naʻe muimu ʻa Keli mo e Fineʻeikí ʻia Lī Lini ki ha loki lahi he fungavaka ʻi ʻolungá. Naʻe talaange ʻe Lī Lini naʻe ui ia ko ha falelotu.
Naʻe tangutu ʻa Keli ʻi he tafaʻaki ʻo e Fineʻeikí mo Lī Liní, ʻi ha ʻotu sea, pea ne ʻikai fuoloa kuo kamata e lotú. Naʻá ne fakafanongo ki he hivá. Naʻá ne saiʻia ʻi he ongo naʻá ne maʻú, neongo naʻe ʻikai ke ne ʻilo e fakaleá.
‘I he fakaʻosinga ʻo e fakatahaʻangá, naʻe tuʻu hake ha fefine ke lotu. Naʻe sio takai ʻa Keli ki he kūnima ʻa e tokotaha kotoa pea kuikui honau matá. Naʻá ne ongoʻi lelei moʻoni ʻi loto. Ko e hā nai ia? Naʻe kehe ia mei ha toe faʻahinga meʻa naʻá ne ongoʻi kimuʻa!
ʻI heʻena mavahe kimui ange mei he lotú, naʻe talaange ʻe Keli ki he Fineʻeikí ʻa e ongo naʻá ne maʻu lolotonga e lotú.
Naʻe pehē ʻe he Fineʻeikí, “Siʻi, naʻe ʻikai ke u ongoʻi ʻe au ha meʻa makehe.”
Ka naʻe fakakaukau pē ʻa Keli ki he meʻa naʻá ne ongoʻi ʻi he lotú. Naʻá ne saiʻia ʻi he lotú. Pea naʻá ne saiʻia he fanongo kau kia Sīsuú.
“ʻE lava e kau faifekaú ʻo akoʻi au?” Ko e fehuʻi ange ia ʻa Keli ki he Fineʻeikí. “ʻOku ou fie ako lahi ange.”
Naʻe pehē ʻe he Fineʻeikí, “Kapau ko e meʻa ia ʻokú ke loto ke faí, ʻoku sai pē ia.”
Naʻe akoʻi ʻe he ongo faifekaú ʻa Keli ʻi he founga ʻo e lotú mo lau e folofolá. Naʻá na akoʻi ia fekauʻaki mo Sīsū pea mo ʻEne ʻofa ʻiate kitautolú. Naʻe saiʻia ʻa Keli ʻi he meʻa naʻá ne akó.
ʻI ha ʻaho ʻe taha naʻe fai ange ʻe he ongo faifekaú ha tukupā makehe.
Naʻe fehuʻi ange ʻe ʻEletā Paaka “Te ke feinga nai ke lotu he lolotonga ʻo e uiké?”
Ne aʻu mai ki he taimí ni, naʻe lotu pē ʻa Keli mo e ongo faifekaú. Ka naʻá ne loto ke ʻahiʻahi ia ʻiate ia pē. Naʻá ne ʻiloʻi naʻe fanongo mai maʻu pē ʻa e Tamai Hēvaní, pea naʻá Ne finangalo ke fanongo meiate ia.
Naʻá ne palōmesi ange, “Te u fai ia.”
Ko e ʻaho hono hokó ʻi he akó ko ha ʻaho makehe ia. Naʻe ʻamanaki ke hiva ʻa Keli ʻi ha feʻauhi! Naʻá ne ako ha foʻi hiva faka-Siaina foʻou fakaʻofoʻofa. Ko e ngāue lahi hono ako kotoa e nota mo e ngaahi tō ʻo e hivá! Naʻá ne fakaangaanga mo toutou fakaangaanga.
Ko e taimi leva ʻeni ke hiva aí, naʻe tailiili ʻa Keli. Naʻá ne toʻo hake e tā ʻo Sīsū naʻá ne faʻo he kato hono teunga akó ʻi he pongipongi ko iá. Naʻá ne fakakaukau ke lotu, ʻo hangē ko ia ne fakahinohinoʻi ange ki ai ʻe he ongo faifekaú. Naʻá ne lotu ʻo pehē, “Tamai Hēvani, fakamolemole muʻa ʻo tokoni mai ke mole ʻeku tailiilí. ʻI he huafa ʻo Sīsū Kalaisí, ʻemeni.”
Naʻe hū atu leva ʻa Keli ki he siteisí. Naʻá ne sio fakamamaʻu ki he mātangá mo e kau fakamāú. Naʻá ne fakakaukau ki he tā ʻo Sīsū ʻi hono kató peá ne kiʻi ongoʻi fiemālie ange. Naʻá ne mihiʻi ʻene mānavá pea kamata ke hiva.
Naʻá ne hivaʻi kotoa e ngaahi leá ʻo hangē pē ko ʻene akó. ‘I heʻene hivaʻi e nota fakaʻosí peá ne punoú, naʻe ʻiloʻi ʻe Keli naʻe fanongo mai e Tamai Hēvaní ki heʻene lotú pea tokoniʻi ia.
Naʻe lue ʻa Keli mei he siteisí mo malimali pē. Naʻe ʻikai ke ne faʻa tatali ke tala ki he ongo faifekaú e meʻa naʻe hokó! Naʻá ne ʻiloʻi naʻe fie maʻu ke ne lotu maʻu ai pē ʻi he ʻaho kotoa pē. ●
Tā fakatātaaʻi ʻe Tammie Lyon