Kakai Lalahi Kei Talavoú
Fekumi ki ha Malí—mo e ʻAloʻofa ʻa e Fakamoʻuí
Laʻitā mei he Getty Images
ʻOku talaʻofa mai ʻe he ʻEikí “ʻoku feʻunga [ʻEne] ʻaloʻofa ki he angamaluú” (ʻEta 12:26). ʻOku totonu ke ʻomi ʻe he ngaahi leá ni kiate kitautolu kotoa ko e kau taautaha kei talavoú ha ʻamanaki lelei mo e fiemālie, tautautefito ki hono kumi ha hoa taʻengatá. ʻOku faʻa fekumi loto tauʻatāina e kau ākonga falalaʻanga ʻo Kalaisí ki ha hoa ʻofaʻanga, pea iku pē ki heʻenau loto-mamahi he siva e ʻamanakí pe ko e ʻulungaanga kovi ʻa kinautolu ʻoku nau teití. ʻE lava ke ʻomi ʻe he fekumi ko ʻení ʻa e tailiilí, ʻitá, loto-mamahí, mo e loto-mafasiá, tautautefito kapau ʻoku hokohoko atu ʻi ha ngaahi taʻu lahi ʻo fakalaka ʻi he ʻaho naʻá ke ʻamanaki ke mali aí!
Kae hangē ko ia ʻokú ke ʻiló, ko e ngaahi ongo fakaeloto ko ʻení naʻe ikai ko e meʻa ia ne taumuʻa ʻa e Otuá ke tau ongoʻi maʻu pē ʻi heʻetau muimui ki Heʻene fekau ke mali pea ohi hake ha ngaahi fāmili angatonu mo fiefiá. Ko hono moʻoní, ʻoku finangalo e ʻOtuá ke tau ongoʻi fiefia lolotonga e fekumi ko iá!
ʻI he fakakaukau ki he meʻá ni, ʻoku fakataumuʻa e ngaahi fakamatala ʻi he konga ko ʻení ke tokoni atu ke mole ʻa e loto-mafasiá ʻi hoʻo kumi ho hoa taʻengatá. Te ke maʻu ai ha ngaahi talanoa ki he founga ke fakalakalaka ʻi he moʻuí neongo pe ko e hā ho tuʻunga fakamalí mo e faleʻi te ne lava ʻo tokoniʻi koe ke ke teuteu ki ha nofo-mali ʻoku ʻofa, fakatupulaki, mo mālohi hono fakavaʻé.
ʻI hoʻo fekumi ki he taha te mo fefoakiʻaki homo lotó, tuku ha kiʻi taimi ke lau e ngaahi fakamatala ko ʻení. ʻOku ou palōmesi ʻe fakamaama ʻe ha taha ho lotó mo tokoniʻi koe ke ke falala ʻoku feʻunga moʻoni e ʻaloʻofa ʻa e Fakamoʻuí maʻau.
Fakaʻapaʻapa atu,
Lenitoni Hoasi