Naʻe Fakaava Hoku Lotó ʻe Ha ʻOupeni Hausi ʻa e Temipalé

Ricardo Matamoros, Ahuachapán, El Salvador

‘I hono fanongonongo e ʻoupeni hausi ʻa e temipalé, naʻá ku ongoʻi hangē ne fakaafeʻi fakataautaha au ʻe he ʻEikí ke hū ki Hono falé.

Ne papitaiso au ʻi hoku taʻu 15. Naʻe ʻikai mahino ki he kakai tokolahi ʻa ʻeku tui foʻoú. Naʻe fakakata ʻaki ʻe ha niʻihi, kau ai hoku ngaahi kaungāmeʻá, ko ʻeku fili ke kau ki he Siasí. Naʻe ʻikai kau ʻeku ongomātuʻá ki he Siasí, ko ia naʻe ʻikai ke na poupouʻi au.

Ko hono olá, naʻe faingataʻa ke hokohoko atu ʻeku maʻu lotú mo hono moʻui ʻaki e ongoongoleleí. ‘I he taimi ne u taʻu 19 aí, naʻe ʻikai ke u toe ʻalu ki he lotú.

Hili ha taʻu ʻe hongofulu mei ai, naʻá ku fanongo ʻe langa ha temipale ʻi ʻEli Salavatoa. Naʻá ku ʻohovale ke fanongo ʻe langa ha fale ʻo e ʻEikí ʻi hoku fonuá! Hili ha taʻu ʻe fā mei ai, naʻe ʻosi ʻa e Temipale San Salvador El Salvador, pea naʻe fanongonongo ha ʻoupeni hausi ʻa e temipalé. ‘I heʻeku ʻilo ko ia te u maʻu e faingamālie ʻi he ʻoupeni hausí ke hū ai ʻi he temipalé, ne u ongoʻi hangē naʻe fakaafeʻi fakataautaha au ʻe he ʻEikí ke u hū ʻi Hono falé.

Ne kau e ʻaho naʻá ku hū ai ki he temipalé ko e taha ʻo e ngaahi ʻaho lelei taha ʻo ʻeku moʻuí. Lolotonga e ʻoupeni hausí, naʻá ku ako lahi ange ai ʻo kau ki he meʻa ʻoku hoko ʻi loto ʻi he ngaahi temipale kuo fakatapuí. Naʻá ku ako foki ʻo kau ki he ngaahi fuakava fakatemipale toputapu ʻoku fakahoko ʻe he niʻihi fakafoʻituituí mo e ʻOtuá.

‘I heʻeku lue ʻi he loki takitaha ʻo e temipalé, naʻá ku ongoʻi ne ʻi ai e ʻOtuá. Ne u ongoʻi nonga. Naʻe ʻomi kiate au ʻe he ʻaʻahi ki he temipalé ʻa e holi ke u foki mai ki he Siasí pea toe moʻui ʻaki e ongoongoleleí. ‘I he taimi ne u ʻilo ai te u lava ʻo kau ʻi he ngāue maʻongoʻonga ʻa e ʻOtuá, naʻá ku loto ke fakakakato e ngāue fakatemipale maʻa ʻeku ngaahi kuí pea ngāue ʻaki e lakanga fakataulaʻeikí.

Naʻe liliu au ʻe he meʻa ne u aʻusia ʻi he temipalé he ʻaho ko iá. ‘Oku ou tokoni he taimí ni ki he kau mēmipa hoku uōtí ke nau teuteu ki he temipalé mo tokoniʻi kinautolu ʻi he hisitōlia fakafāmilí ke nau lava ʻo fakahoko e ngāue fakatemipalé maʻa ʻenau ngaahi kuí.

‘Oku ʻikai teitei tōmui ke toe foki ki he Siasí. ‘Oku ʻikai teitei tōmui ke fai lelei. ʻOku ʻiate kitautolu maʻu pē ʻa e ʻEikí mo ʻEne ʻofa taʻefakangatangatá. Ko e temipalé ko ha feituʻu ia ʻokú ne fakatahaʻi kitautolu mo Ia pea fakaʻatā ke tau toe foki ʻi ha ʻaho ʻo nofo mo Ia.