Ngaahi Lea ʻa e Palōfitá maʻá e Tokotaha Kotoa
Katalina Fekisoni, Penisilivēnia, USA
Naʻe ʻikai ke u ʻamanaki ke sio ki ha kupuʻi lea mei he palōfita ʻa e ʻOtuá ʻi he ngaahi holisi ʻo e akó.
Tā fakatātaaʻi ʻe Merrilee Liddiard
Naʻá ku ʻā pongipongi hake ʻi ha pongipongi ʻe taha ke teuteu ki he ngāué. Neongo ko e angamahení ke u saiʻia ʻi heʻeku ngāue ko e faiakó, ka naʻá ku ʻita peá u fie toe foki pē ki he mohengá ʻo fakakaukau kuo taimi ke toe mohe.
‘I heʻeku aʻu atu ki he ako māʻolungá, naʻá ku feinga ke mateuteu hoku ʻatamaí ki he ngāué. Naʻá ku ʻiloʻi naʻe fie maʻu ke u akoʻi ha kalasi fika, ka naʻe mafasia hoku lotó mo e fakakaukaú fakatouʻosi. Naʻe kovi kotoa e ngaahi ongo naʻá ku maʻú.
Naʻá ku fakakaukau ke u ʻalu ki he falemālōloó kimuʻa pea kamata e kalasí. Ko e taimi ʻe niʻihi ʻe fakapipiki ʻe ha taha ha ʻū laʻipepa ʻi he falemālōloó mo ha fakamatala maʻá e kau akó mo e kau ngāué. Naʻe maʻu ʻeku tokangá ʻe ha laʻipepa ʻe taha. Naʻe ʻi ai ha kupuʻi lea fakaʻofoʻofa naʻe pehē, “Kapau ʻokú ke fie foaki ha maama ki he niʻihi kehé, kuo pau ke ke malama koe.”1 Naʻá ku ʻohovale ke vakai ko ha kupuʻi lea ʻeni meia Palesiteni Tōmasi S. Monisoni (1927–2018).
Naʻe ʻikai ke u ʻamanaki ke sio ki ha kupuʻi lea mei he palōfita ʻa e ʻOtuá ʻi he ngaahi holisi ʻo e akó. ‘Oku ou nofo ʻi ha kiʻi kolo siʻisiʻi ʻi Penisilivēnia, USA, pea ʻoku ou ʻiloʻi ʻoku ou kau ʻi he niʻihi toko siʻi pe ko au toko taha pē ʻa e mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimuí Ní ʻi he ʻapiakó. Naʻá ku ʻilo ne u kau ʻi he niʻihi toko siʻi ʻe mahino ki ai e mahuʻinga ʻo e ngaahi lea ʻa Palesiteni Monisoní—ko ha tangata ne u hikinimaʻi ʻi ha ngaahi taʻu lahi ke hoko ko e palōfitá. Naʻá ku ongoʻi naʻe fakataumuʻa e pōpoakí ni kiate au. Naʻá ne fakamolū hoku lotó mo fakafiefiaʻi ange au. Naʻe fonu hoku lotó ʻi he houngaʻia ʻi heʻeku fakamoʻoní, pea mo e ʻofa ʻa e Tamai Hēvaní naʻá ne ʻākilotoa aú.
Naʻá ku fie toʻo hifo e laʻipepá mei he holisí pea faʻo ia ʻi hoku kató he ʻahó kakato ke langaki hake au, ka naʻe ʻi ai ha meʻa ne vave ʻeku fakatokangaʻí. Ko Palesiteni Monisoní naʻe ʻikai ko e palōfita pē ia kiate au mo e kau mēmipa kehe ʻo e Siasí—ko e palōfita ia ki he māmaní. Ko ʻene ngaahi leá, hangē ko e ngaahi lea ʻa Palesiteni Lāsolo M. Nalesoni ʻi he ʻaho ní, ʻoku ʻomi ia maʻá e tokotaha kotoa. ʻOku tokoniʻi mo hiki hake ʻe he ngaahi lea ʻa ha palōfitá, ʻa kinautolu kotoa pē te nau fanongo ki aí. Naʻá ku faitaaʻi e kupuʻi leá ʻaki ʻeku telefoní pea tuku pē ʻa e laʻipepá ki ha taha kehe te ne ala fie maʻu iá.
‘Oku ou fakamālō ʻi hono ʻomi ʻe he Tamai Hēvaní ʻa e pōpoakí ni. ‘Oku ou fie foaki ʻa e māmá ki he niʻihi kehé. Fakafou ʻi he talangofuá mo ha vāofi mo hotau Fakamoʻuí, te u lava ʻo malama ʻo aʻu ki he ngaahi ʻaho ʻe fakatupu ai ʻe he fakapoʻulí ke u hē mei hoku halá.