Haʻu, ʻo Muimui ʻIate Au: Tohi ʻa Molomoná
‘Oku Tokoni Fēfē hono Fakatupulaki ha Loto Vaivaí ke Tau Maʻu e ʻIlo Fakalaumālié?
ʻAlamā 8–12 8–14 Sune
‘I he taimi naʻe malangaʻi ai ʻe ʻAlamā e ongoongoleleí ʻi ʻAmonaihaá, naʻe fakafisingaʻi ia ʻe he tokolahi taha ʻo e kakaí, ka naʻe fakafanongo ʻa ʻAmuleki peá ne tui. ʻOku fakahaaʻi mai kiate kitautolu ʻe he faikehekehe ʻo ʻAmuleki mo e toenga ʻo ʻAmonaihaá ʻa e ngaahi nunuʻa ʻo e maʻu ha loto vaivai pe loto fefeka ki he ngaahi meʻa ʻa e ʻOtuá (vakai, ʻAlamā 12:10). Te ke lava ʻo fili ke ke loto vaivai.
‘Amuleki mo e Kakai ʻo ʻAmonaihaá
Naʻe tui ʻa ʻAmuleki ko ʻAlamaá ko ha palōfita ia ʻo e ʻOtuá (vakai, ʻAlamā 8:20). ʻI he taimi ne fakahā ange ai ʻe ha ʻāngelo ke ne fakaʻatā ʻa ʻAlamā ki hono ʻapí, naʻá ne fili ke talangofua (vakai, ʻAlamā 10:8). Naʻá ne tali foki e ui ʻa e ʻOtuá ke malanga ʻaki e ongoongoleleí (vakai, ʻAlamā 8:29–30). Ka naʻe fakafisingaʻi ʻa ʻAlamā ʻe he kakai kehe ʻi he koló pea ʻikai ke nau fie tui.
Ngaahi Tāpuaki ʻo ha Loto Vaivai
Naʻe tāpuekina ʻa ʻAmuleki ʻaki e ʻilo fakalaumālié koeʻuhí naʻá ne tali e folofola ʻo e ʻOtuá. Naʻe “fakafonu [ia] ʻaki ʻa e Laumālie Māʻoniʻoní” (ʻAlamā 8:30), naʻá ne maʻu ha fakamoʻoni ki he mālohi ʻo e ʻOtuá (vakai, ʻAlamā 10:5), pea naʻá ne ʻiloʻi e ngaahi fakakaukau ʻa kinautolu ne feinga ke kākāaʻi iá (vakai, ʻAlamā 10:17). Te ke lava foki ʻo fili ke tali e folofola ʻa e ʻOtuá mo maʻu ʻEne ngaahi tāpuakí.
Ngaahi Nunuʻa ʻo e Loto Fefeká
Naʻe mole mei he kakai ʻo ʻAmonaihaá ha ngaahi tāpuaki maʻongoʻonga koeʻuhí ne nau fakafefeka honau lotó ki he ngaahi akonaki ʻa ʻAlamaá. Naʻe ʻikai haʻanau ʻilo ki he ngaahi mana ʻa e ʻOtuá (vakai, ʻAlamā 9:5), pea naʻe fakatokanga kiate kinautolu ʻe fakaʻauha kinautolu ʻe he ʻOtuá pea he ʻikai ke nau maʻu Hono puleʻangá (vakai, ʻAlamā 9:12).
Ngaahi tā fakatātā ʻa Ben Simonsen