Naʻá Ma Fie Maʻu ha Mana hono Ua

Taniela Paini, Niu Mekisikou, USA

Naʻá ma ʻosi aʻusia ha mana ʻi he feitama hoku uaifí. Naʻá ma toe fie maʻu leva ha mana ʻe taha.

Naʻe uike 24 e feitama hoku uaifi ko Selá ʻi he kamata ke ne felangaaki lahi. Naʻá ku faingāue kiate ia peá u ʻalu leva ki he ngāué. Naʻá ku kei ʻi he ngāué ʻi heʻene tā mai ke ʻave ia ki falemahaki.

Naʻe fakahā mai heʻema aʻu ki aí, “Ko hoʻomo pēpeé ʻeni ʻoku haʻu.” Koeʻuhí naʻe uike 24 pē ʻa Sela, ko e faingamālie lelei taha pē ke moʻui ai e pēpeé ko ha tafa fakavavevave.

Naʻe talamai ʻe he toketaá, “ʻOku ʻikai fie maʻu ke foua ʻe hoʻo uaifí ha toe faingataʻa. ʻE mole pē ʻa e pēpeé ia.”

Naʻá ku talanoa mo Sela mo lotua e meʻa ne talamai ʻe he toketaá. Naʻá ma ongoʻi kapau ne ʻi ai ha faʻahinga faingamālie ke moʻui ai ʻema pēpeé, naʻe fie maʻu ke ma fakaʻaongaʻi e faingamālie ko iá. Kuó ma aʻusia ha faingataʻa ʻi he feinga ke maʻu haʻama fānaú. Ko homa foha lahi taha ko Teilá ko e ohi pē ia. ‘I he taimi naʻe feitama ai ʻa Sela ʻi ha taʻu ʻe ua hili ʻema ohi mai ʻa Teilá, naʻá ma ongoʻi ko ha mana ia. Naʻá ma fie maʻu leva ha mana hono ua he taimí ni.

Hili ha kiʻi taimi mei ai, naʻe haʻu ha mataotao peá ne talamai, “ʻOku ou tui ʻe kei taimi pē ke ʻave ho uaifí ki ha falemahaki ʻa e fānaú ʻi ʻEla Paso, Tekisisi, ʻa ia kuo fakanaunau ke tauhi ai e fanga kiʻi pēpē ʻoku fāʻeleʻi taʻehokó mo puke lahí. ʻE maʻu ai ha faingamālie ʻa e pēpeé!”

Naʻe mavahe ha meʻalele falemahaki mei heʻemau falemahaki fakalotofonuá ne heka ai ʻa Sela pea lele ki he falemahaki ʻa e fānaú ne miniti ʻe 45 hono mamaʻó. Naʻá ku muimui ofi pē ai, mo tautapa ki he ʻEikí ʻi he lotu ke fai mai ha mana. Naʻá ku palōmesi kiate Ia te u nofo ʻi he hala ʻo e ongoongoleleí pea feinga ke toe lelei ange.

Naʻá ku fakahā ʻi falemahaki ki he toketā ʻi he ʻiuniti tokangaekina makehé: “ʻOkú ma ʻilo kuó ma ʻosi maʻu ha mana ʻi he feitama hoku uaifí. ‘Okú ma ʻamanaki atu leva he taimí ni ki ha mana ʻe taha.”

Naʻe ola lelei ʻa e fāʻelé, pea naʻe moʻui ʻema pēpeé. Hili ha nofo ʻa Sana ʻi he ʻiuniti tokangaekina makehé ʻi ha māhina ʻe fā mo e konga, naʻá ma ʻomi ia ki ʻapi. Naʻá ma maʻu ha mana hono ua. Ne ʻikai fuoloa mei ai, naʻá ma toe maʻu ha mana—naʻe tāpuekina kimaua ʻe he ʻEikí ʻaki ha ongo māhanga.

ʻOku kiʻi ʻatamai vaivai ʻa Sana, pea ʻokú ne heka saliote teketeke, ka ʻokú ne fiefia maʻu pē, pea hoko ko ha kaungāmeʻa ki he tokotaha kotoa. ‘Okú ne manako ke talanoa kau ki hono ʻahó, pea ʻokú ne fiefia ʻi he moʻuí. ʻOkú ne ʻai ke ma malimali maʻu pē mo akoʻi kimaua ke ma fiefia. ʻOkú ma ʻofa mo houngaʻia ʻiate ia. ʻOku hoko moʻoni ʻa Sana ko ha tāpuaki.