Ko Hono Maʻu ha Fakamoʻoni ʻi he funga ʻo e Māmaní
ʻOku nofo e tokotaha naʻá ne fai e talanoá ʻi ʻIutā, USA
Ko e talanoa ʻeni ki he founga naʻá ku kau ai ki he Siasí mo e hoko hoku fāmilí ʻo mālohi ʻi he ongoongoleleí.
Tā fakatātaaʻi ʻe Pauline Grayson
Naʻe fanauʻi au ʻi Sipeini peá u nofo ai ʻi ha taʻu ʻe valu. Naʻe ʻikai ke mau faʻa ō ki he lotú, ko ia naʻe ʻikai ke papitaiso au ʻi hoku taʻu valú, ka naʻá ku fie maʻu moʻoni ia. Ne u fehuʻi ʻi ha ʻaho ʻe taha ki heʻeku ongomātuʻá e ʻuhinga naʻe ʻikai ke mau toe ō ai ki he lotú mo e ʻuhinga ne ʻikai papitaiso ai aú.
ʻI heʻeku fakamatala ange kiate kinaua ʻeku loto-holi ke papitaisó, naʻe ongo ia ki hona lotó, pea kamata ke mau toe ō ki he lotú. Naʻe ongo lelei ia. Naʻe hoko ʻeku faʻeé ko ha faʻifaʻitakiʻanga lelei mo ha tataki fakalaumālie kiate au. Naʻá ne maʻu ha fakamoʻoni mālohi peá ne faʻa lau e folofolá.
Ne mau hiki kimui ange ki Venesuela, ko e feituʻu ia ne haʻu mei ai ʻeku tamaí. Naʻa mau nofo ai ʻi ha taʻu ʻe ua, pea koeʻuhí ko e ngaahi tuʻunga faingataʻa fakaʻekonōmiká, naʻa mau fehangahangai ai mo ha ngaahi faingataʻa lahi. Ka naʻe ʻi ai foki mo ha ngaahi meʻa lelei ai. Naʻá ku saiʻia ʻi he meʻakaí, pea naʻe ʻi ai hoku fāmili ne nau loto-vēkeveke ke mau feʻiloaki. Ko ha kakai anga-fakatōkilalo moʻoni kinautolu, pea naʻa mau ō fakataha kotoa ki he lotú mo ongoʻi e Laumālié.
Neongo ne mau ō ki he lotú peá u lava ʻo ongoʻi e Laumālié, naʻá ku ʻiloʻi naʻe ʻi ai ha meʻa ne ʻikai ke u maʻu mo hoku fāmilí. Naʻá ku ongoʻi moʻoni naʻe fie maʻu ke silaʻi kimautolu ko ha fāmili taʻengata. ʻI ha pongipongi Sāpate ʻe taha, naʻe fakaafeʻi ʻe he pīsopé ʻa e tokotaha kotoa ʻi he haʻofangá ke lau e Tohi ʻa Molomoná kimuʻa ʻi he fakaʻosinga ʻo e taʻú. Naʻá ku ʻiloʻi ʻe tokoni ʻeni kiate au mo ʻeku ongomātuʻá ke mau moʻui kakato ange ʻaki e ongoongolelei ʻo e ʻEikí. Ne haʻu māmālie pē ʻi heʻemau lau e Tohi ʻa Molomoná, ʻa e kamata ke ʻomi ʻe he Fakamoʻuí ha ʻilo mo ha ngaahi tāpuaki lahi ange, pea ne mau hokohoko atu ke lau maʻu pē e folofolá.
Ne ʻikai fuoloa kuó u papitaiso. Naʻá ku lava ʻo ongoʻi moʻoni e Laumālié ʻi heʻeku moʻuí, pea pehē foki ki heʻeku ongomātuʻá. Naʻe kamata ke tupulaki ange ʻeku fakamoʻoní. Ne mau hiki ki Fololita, USA, pea naʻe pau ke mau toe fai ha ngaahi liliu mo ha ngaahi feilaulau lahi, ʻo hangē pē ko ʻemau mavahe mei Sipeiní. Ka naʻe fakaʻau ke tupulaki ʻo mālohi ange ʻemau ngaahi fakamoʻoní. Ne mau ō ki he lotú he uike kotoa mo hokohoko atu hono lau e folofolá.
Hili ha feinga lahi mo ha lau folofola lahi, lotu, mo e fili ki he totonú, naʻa mau loto ke silaʻi kimautolu ko ha fāmili taʻengata. Naʻa mau talanoa ki heʻemau pīsopé, pea neongo naʻe kiʻi taimi lōloa, ka naʻe faifai pea hokosia e ʻahó. Ne mau fiefia ʻaupito ke hū ʻi he temipalé.
Naʻá ku lava ʻo fai ha ngaahi papitaiso lolotonga ʻeku tatali ki heʻeku ongomātuʻá ke fakakakato e ngāue fakatemipalé maʻanauá. Ne u ongoʻi hangē hano teu ke toe papitaiso aú. Naʻá ku fiefia ʻaupito ʻi heʻeku lava ʻo tokoniʻi e kakai ʻi he tafaʻaki ʻe taha ʻo e veilí. Ko e taimi ní ʻoku ou ʻalu mo hoku fāmilí ki he temipalé ʻi he uike kotoa. ʻOku ou fakahoko maʻu pē ha ngaahi papitaiso he ʻoku ou saiʻia he tokoni aí. ʻOku ou fiefia ʻaupito ʻi heʻeku lava ʻo sila ʻi he temipalé ki heʻeku ongomātuʻá ki ʻitānití pea maʻu ʻa e faingamālie ke nofo mo kinaua ʻo taʻengata.