Ko e hā e tuʻunga ʻo e Siasí ʻi he lau lanú?
ʻOku mau tui ko e ʻOtuá ʻa e Tamai ʻo e faʻahinga kotoa pē ʻo e tangatá pea “ʻoku ʻikai te ne taʻofi ha tokotaha ʻoku haʻu kiate ia, ʻuliʻuli pe hinehina [fakatouʻosi] … ; pea ʻoku tatau ʻa e kakai fulipē ʻi he ʻao ʻo e ʻOtuá” (2 Nīfai 26:33). Koeʻuhí ʻoku tatau ʻa e kakai kotoa pē ʻi he ʻao ʻo e ʻOtuá, ʻoku mau tui he ʻikai lava ha tokotaha ʻo lau ʻokú ne māʻolunga ange ʻi ha taha kehe koeʻuhí ko honau matakalí pe puipuituʻá. ‘Ikai ngata aí, ʻoku mau tui ko e angahala ia ke siolalo, tukuhifo, pe fakafaikehekeheʻi e niʻihi kehé koeʻuhí ko honau matakalí.
Kuo fakahalaiaʻi ʻe he kau palōfita mo e kau ʻaposetolo ʻo onopōní ʻa e lau lanú ʻi he ngaahi lea mālohi tahá. Hangē ko ʻení:
-
Palesiteni Gordon B. Hinckley (1910–2008): “He ʻikai lava ke pehē ʻe ha tangata ko e ākonga moʻoni ia ʻa Kalaisi, kapau ʻokú ne fai ha ngaahi lea ʻo tukuhifo ki ha taha ʻi ha matakali kehe. Pe ko haʻane fakakaukau ʻokú ne faaitaha mo e ngaahi akonaki ʻa e Siasi ʻo Kalaisí.”1
-
Palesiteni M. Russell Ballard, Palesiteni Leʻoleʻo ʻo e Kōlomu ʻo e Kau ʻAposetolo ʻe Toko Hongofulu Mā Uá: “ʻOku fie maʻu ke tau talitali lelei e fānau ʻa e ʻOtuá ʻi he manavaʻofa, pea siʻaki ʻa e loto fakamāú, laulanú, filifilimānakó, mo e fakavahavahaʻá.”2
-
Palesiteni Dallin H. Oaks, Tokoni ʻUluaki ʻi he Kau Palesitenisī ʻUluakí: “ʻOku tau maheni ʻaki he ʻahó ni e tupu e tāufehiʻá mei he lau lanú, pea ʻoku fie maʻu ke tau fakatomala kotoa mei ai.”3