Ko e Fili ke Papitaisó

Naʻe fokotuʻu ‘a e kaveinga ʻi he makasini ko ʻení kimuʻa [teʻeki ke hoko mai e] mahaki fakaʻauha ko e COVID-19. ʻE ʻi ai e ngaahi fakamatala fakaikiiki ʻe niʻihi ʻe ʻikai ala fakaʻaongaʻi he taimí ni. Kātaki ʻo filioʻi ʻa e ngaahi fokotuʻú ki hano fiemaʻu ʻo fakatatau ki he ngaahi fakahinohino ʻa e Siasí mo e puleʻangá he taimi ní.

Naʻá ku feinga kimuí ni mai mo hoku husepānití ke fakapapauʻi pe naʻe mateuteu homa foha taʻu fitú ke papitaiso. ʻOkú ne faingataʻaʻia fakaesino (autism), ko ia naʻe ʻikai ke ma fakapapauʻi pe naʻá ne maʻu e mahino feʻunga ke ʻekeʻi meiate ia e fili ko ʻení. Te ke lava ʻo lau ʻi he peesi 18 fekauʻaki mo e ngaahi meʻa lahi ne ma fakakaukauʻi ʻi heʻema feinga ke fai e fili ʻoku tonú.

ʻI heʻeku hoko ko ha mataotao faingataʻaʻia fakaesino ʻa e Siasí, ʻoku ou ʻilo ‘oku loto-holi ʻa e tokolahi ʻo e kakai fakaʻofoʻofa ʻoku faingataʻaʻia fakaesinó ke ongoʻi ʻoku talitali lelei kinautolu ʻi he lotú. Ki hotau ngaahi tuongaʻane mo e tuofāfine kotoa ʻoku faingataʻaʻia fakaesinó pea mo honau ngaahi fāmilí, ʻokú ma pehē atu: ʻOku mau ʻofa mo fie maʻu kimoutolu, pea loto ke ako e founga ke lelei ange ai hono tokangaekina kimoutolú.

ʻOku tokoni ha ngaahi fakamatala ʻi he makasini ko ʻení ke mahino kiate kitautolu e faingataʻaʻia fakaesinó pea mo e founga te tau lava ai ʻo talitali lelei ange ai kinautolu ʻi hotau ngaahi uōtí mo e tukui koló:

• Peesi 28: ʻOku hanga ʻe ʻEletā Paula B. Paipa ʻo e Kau Fitungofulú mo hono uaifi ko Melisá, ʻa ia ʻoku ʻi ai haʻana tama ʻoku faingataʻaʻia fakaesino, ʻo ʻomi ha ʻamanaki lelei mo e fakalotolahi ki he ngaahi mātuʻá.

• Peesi 21: Te ke lava ʻo maʻu ʻi he fakaʻosinga ʻo ʻeku fakamatalá ha ngaahi fakakaukau ki he founga ke tokangaekina lelei ange ai e kau mēmipa ʻoku faingataʻaʻia fakaesinó ʻi he ngaahi lēsoni mo e ngaahi uiuiʻi ʻi he Siasí.

• Peesi K16: ʻE lava ʻe he mātuʻá ʻo fakaʻaongaʻi e talanoa ko ʻeni ʻi he Kaumeʻá ke tokoni ki heʻenau fānaú ke nau vakai ki ha sīpinga ʻo e hoko ko ha kaungāmeʻa ki ha taha ʻoku faingataʻaʻia fakaesinó.

ʻI hoʻo lau e makasini ko ʻení, manatuʻi “ʻoku mahuʻinga lahi ʻa e ngaahi laumālié ʻi he ʻao ʻo e ʻOtuá” (Tokāteline mo e Ngaahi Fuakava 18:10). Te tau lava ʻo tokoni ke tanumaki ha ngaahi ʻātakai ʻo e ʻofa mo e talitali lelei ʻi ʻapi mo e Siasí, kae lava ʻa kinautolu kotoa ʻoku fie haʻu pea hoko ʻo hangē ko Sīsuú ʻo maʻu e faingamālie ko iá.

ʻI he ʻofa lahi atu,

Katie Edna Steed

Mataotao ki he Faingataʻaʻia Fakaesino, Potungāue ki he Lakanga Fakataulaʻeikí mo e Fāmilí