“Napalibotan Ako sa mga Tawo apan Mibati Gihapon og Kamingaw,” Liahona, Mar. 2024.
Mga Young Adult
Napalibotan Ako sa mga Tawo apan Mibati Gihapon og Kamingaw
Sa dihang mibalhin ko og layo gikan sa panimalay, ang akong koneksiyon ngadto sa langit nakatabang nako nga mabuntog ang kamingaw.
Kahibalo ba kamo niana nga pagbati diin kamo napalibotan sa mga tawo apan mibati gihapon nga hingpit nga nag-inusara?
Sukad sa pagbiya sa akong yutang natawhan sa Uganda ug mibalhin sa Dubai tungod sa trabaho, kanunay ko nga mibati og kamingaw. Didto sa akong kasilinganan sa amoa, ang mga tawo mitimbaya sa usag usa diha sa kadalanan. Kami kaila sa usag usa. Kami misuporta sa usag usa. Ako adunay daghang higala ug pamilya kinsa kauban sa akong pagtuo.
Apan dili kini parehas dinhi. Nagpuyo ko sa lahi kaayo nga kultura, sa usa ka dako nga siyudad ug napalibotan sa mga tawo kinsa busy kaayo sa trabaho. Ug bisan og ako nagtambong sa akong ward ug naninguha nga makaila sa uban nga mga young adult ug sa mga miyembro sa ward, ang among busy nga mga eskedyul sa trabaho nakapahimo niini nga hapit imposible nga magkita sa usag usa kay kapin lang sa pipila ka oras nga among gigahin sa simbahan sa matag semana.
Ang Dubai dako ug makapadani, ug ako mapasalamaton nga ania dinhi. Apan kini mahimong makapaluya kaayo, ilabi na kon gibati ninyo ang kamingaw. Ang mga tawo dinhi buhong kaayo ug ingon og ang ilang kinabuhi haruhay na. Hinoon, samtang ako nagpuyo taliwala sa tanan niining maluho nga butang ug niining matahom nga mga bilding, ako usahay maghunahuna:
Unsa may akong gihimo sa akong kinabuhi? Mao ba kini ang hustong lugar alang kanako?
Pagkakaplag nga Nahisakop Pag-usab
Si Elder D. Todd Christofferson sa Korum sa Napulog Duha ka Apostoles mipasabot nga “ang pagbati sa pagkahisakop importante sa atong pisikal, mental, ug espirituwal nga kaayohan.”1 Wala ko nakaamgo kon unsa gyod ka mahinungdanon kanang pagbati sa pagkahisakop hangtod dili na nako kini mabati—dili sa simbahan ug dili bisan asa, tinuod gyod.
Unsaon ko man kini pagkaplag karon, layo gikan sa tanan nga akong gimahal?
Paglabay sa panahon, nailhan nako og sugod “ang pagbutang ni Jesukristo diha sa sentro sa pagkasakop.”2
Bisan og ako mingawon gihapon sa akong mga higala ug pamilya, nagsugod nakong makita nga ako wala mabulag sa tanan sa akong kinabuhi sa dihang ako mibalhin—ako adunay usa ka Manluluwas gihapon ug usa ka mahigugmaong Langitnong Amahan kinsa sa kanunay gustong magpabilin nga konektado ngari kanako.
Busa misugod ko sa pagbuhat kon unsa ang akong mahimo aron makonektar sa mas maayo ngadto Kanila sa matag adlaw. Nagsugod ko sa pagpaminaw og mga podcast sa pagtuon sa Dali, Sunod Kanako kon ako mogawas aron modagan. Akong itaod ang akong mga headphone kon nagtrabaho ug maminaw sa mga kasulatan samtang nagkompleto ko sa mga buluhaton.
Ang labing importante, akong nakat-onan nga pagkatalagsaong gasa ang makahimo sa pag-ampo nga direkta ngadto sa Langitnong Amahan. Makig-istorya ko ngadto Kaniya nga mas kanunay ug mas mahunahunaon kay sa kaniadto. Kon mobati ko og kamingaw, ako mag-ampo ug mabati ang Iyang paghupay. Kon mag-type ko ug usa ka email ug maningkamot nga magpabilin nga mapailubon sa akong mga katrabaho, mag-ampo ko ug mangayo og tabang Kaniya.
Ganahan ko unsay gisulti ni Presidente Thomas S. Monson (1927–2018) mahitungod sa pag-ampo: “Niadtong … kinsa nanlimbasog sa mga hagit ug mga kalisod dako man o gamay, ang pag-ampo mao ang tighatag og espirituhanong kalig-on; kini mao ang pasaporte padulong sa kalinaw. Ang pag-ampo mao ang paagi diin kita moduol sa atong Amahan sa Langit, kinsa nahigugma kanato. Pakig-istorya ngadto Kaniya pinaagi sa pag-ampo ug dayon paminawa ang tubag. Ang mga milagro nahitabo pinaagi sa pag-ampo.”3
Pinaagi sa paggahin og panahon alang Kanila sa akong kinabuhi, ilabi na pinaagi sa sinsero nga pag-ampo, nakita na dayon nako nga bisan og wala ko napaliboti sa akong mga katawhan ug sa akong kaugalingong kultura, ako mahimo gihapon nga mapalibotan pinaagi sa Espiritu ug mobati sa gugma sa Dios.
Kita sa Kanunay Mahimong Makonektar
Ang mga butang lisod gihapon, apan ako adunay paglaom alang sa umaabot. Ug motuo na ko sa unsay gitudlo ni Brother Milton Camargo, sa Unang Magtatambag sa Kinatibuk-ang Kapangulohan sa Sunday School: “Ang Ginoo nga si Jesukristo buhi karon. Siya mahimong aktibo, matag adlaw anaa sa atong kinabuhi. Siya mao ang kasulbaran sa atong mga problema, apan kinahanglan kita nga mohangad ug motutok aron makakita Kaniya.”4
May higayon nga mingawon gihapon ko, apan kahibalo ko nga ako sa kanunay, kanunayng makahimo sa pag-ampo ngadto sa akong Langitnong Amahan ug magamit ang Pag-ula ni Jesukristo.
Magbarog man o magluhod, mag-inusara o diha sa usa ka grupo, ako makaampo.
Makaampo ako ngadto sa Langitnong Amahan.
Makapasalamat ko.
Makapangayo alang sa giya ug panalipod.
Ug pinaagi sa akong koneksiyon sa pakigsaad, ako nasayod nga ako, usa ka anak nga babaye sa usa ka mahigugmaong Langitnong Amahan, kanunayng nahisakop ngadto Kaniya. Pinaagi sa Iyang giya, ako mobati og pagkamasaligon nga ako anaa sa hustong dapit, nagbuhat kon unsa ang Iyang ipabuhat kanako.