Digital Lamang: Mga Pagtulon-an sa mga Lider sa Simbahan gikan sa Social Media
Napanalanginan pinaagi sa Pag-ula ni Jesukristo
Tan-awa kon unsa ang bag-ohay lang nga gitudlo sa mga propeta, apostoles, ug ubang mga lider sa Simbahan diha sa social media kabahin sa Pag-ula ni Jesukristo.
Kristo Nag-ampo didto sa Tanaman sa Getsemani, ni Hermann Clementz
Ang Alma 7:11–14 nagpahinumdom kanato nga tungod sa Pag-ula ni Jesukristo, kita mahimong malimpyohan gikan sa atong mga sala kon kita maghinulsol, ug kita makadawat og kalig-on gikan ni Jesukristo sa pagtabang kanato nga malahutay ang atong mga kasakit ug mga balatian.
Si Presidente Russell M. Nelson mipahinumdom kanato nga pinaagi kini ni Jesukristo Mismo nga kining katubsanan moabot: “Dili kompletong doktrina,” siya miingon, “kon maghisgot sa maulaong sakripisyo sa Ginoo gamit ang minubong mga pulong, sama sa ‘ang Pag-ula’ o ‘ang makaabag nga gahom sa Pag-ula’ o ‘ang paggamit sa Pag-ula’ o ‘gipalig-on pinaagi sa Pag-ula.’ Kining mga ekspresyon kuyaw nga makapatipas sa pagtuo pinaagi sa pagtratar sa panghitabo nga daw kini dunay kaugalingong kinabuhi ug mga kapabilidad nga dili konektado sa atong Langitnong Amahan ug sa Iyang Anak, si Jesukristo.
“Ubos sa mahinungdanon ug mahangturon nga plano sa Amahan, ang Manluluwas maoy nag-antos. Ang Manluluwas ang mibugto sa mga higot sa kamatayon. Ang Manluluwas ang miantus sa bugti sa atong mga sala ug kalapasan ug mopapas niini kon kita maghinulsol. Ang Manluluwas ang motubos kanato gikan sa pisikal ug espirituwal nga kamatayon.
“Walay hanap nga binuhat nga gitawag og ‘ang Pag-ula’ diin mahimo kitang makapangayo og tabang, pagkaayo, kapasayloan, o gahom. Si Jesukristo mao ang tinubdan. Ang sagradong mga termino sama sa Pag-ula ug Pagkabanhaw naghulagway sa gibuhat sa Manluluwas, sumala sa plano sa Amahan, aron magpakabuhi kita nga may paglaom niining kinabuhia ug makaangkon og kinabuhing dayon sa kalibotan nga moabot. Ang maulaong sakripisyo sa Manluluwas—ang labing importanteng buhat sa tibuok tawhanong kasaysayan—labing masabtan ug mapasalamatan kon piho ug klaro natong ikonektar Kaniya.”1
Sa unsa pa kaha nga paagi kita mapanalanginan pinaagi ni Jesukristo ug sa Iyang maulaon nga sakripisyo? Tan-awa kon unsa ang gipakigbahin sa mga lider sa Simbahan mahitungod niini nga hilisgotan diha sa social media sa mga kinutlo sa ubos. Makabasa pa kamo og dugang diha sa mga pakigpulong sa kinatibuk-ang komperensiya mahitungod sa Pag-ula ni Jesukristo.
Unsa kaha Kon Ako Magpadayon sa Paghimo sa Samang mga Sala?
“Ako bag-ohay lang nga gipangutana sa usa ka batan-on nga miyembro sa Ang Simbahan ni Jesukristo sa mga Santos sa Ulahing mga Adlaw kon unsa kaha ang gihunahuna sa Manluluwas bahin kanato kon kita magpadayon nga makabuhat sa samang mga sala.
“Akong gipakigbahin nga ako nagtuo nga ang Manluluwas nag-isip kanatong managsama sa tanang anak sa atong Langitnong Amahan, ug nga wala kana makapakunhod sa Iyang gugma ug sa gugma sa atong Langitnong Amahan alang kanato.
“Mahimo kitang malimpyohan gikan sa atong mga sala pinaagi sa paghinulsol, ug usa kini ka hingpit nga kalipay, dili palas-anon. Kon kita maghinulsol, ang atong Manluluwas mahinangpon sa pagdawat sa tanang kalalakin-an ug kababayen-an aron matagamtam ang labing dakong mga panalangin nga ang Dios aduna alang sa Iyang mga anak.”
Presidente Dallin H. Oaks, Facebook, Hulyo 20, 2023, facebook.com/dallin.h.oaks.
Ang Atong Kinaiyahan Kinahanglan Gayod nga Mausab
“Aron sa pagsunod ni Jesukristo nagpasabot sa pag-usab sa atong kinaiyahan pinaagi sa Pag-ula ni Jesukristo. Kana maoy bugtong paagi nga kita makatukod diha sa lig-on nga sukaranan ug lig-ong mobarog atol sa umaabot nga mga unos sa tintasyon ug mga pagsulay.
“Aron masinati kining kausaban kita kinahanglan mahisama sa usa ka bata—usa ka gamay nga bata.
“Alang sa uban, kana dili sayon nga dawaton. Kadaghanan kanato gusto nga mahimong kusgan. Tingali atong gikonsiderar nga ang pagkahimong sama sa usa ka bata huyang. Apan ang pagkahimong sama sa usa ka bata dili ang pagbinata.
“Kini ang mahimong sama sa Manluluwas, kinsa nag-ampo ngadto sa Iyang Amahan alang sa kalig-on aron makatuman sa kabubut-on sa Iyang Amahan ug mag-ula alang sa mga sala sa tanang anak sa Iyang Amahan ug dayon mibuhat niini. Ang atong mga kinaiya kinahanglan nga mausab aron mahisama sa usa ka bata aron makabaton sa kalig-on nga kinahanglan anaa kita aron lig-on nga makabarog ug magmalinawon atol sa mga panahon sa kalisod.
“Kana nga kausaban mopasarang kanato aron makatagamtam sa mga gasa nga moabot pinaagi sa Espiritu Santo. Ang pagbaton sa pakig-uban sa Espiritu mohupay, mogiya, ug molig-on kanato.”
Presidente Henry B. Eyring, Facebook, Hunyo 14, 2022, facebook.com/henry.b.eyring.
Sa mga Panahon sa Kalisod, Hunahunaa ang Getsemani
“Ayaw gayod hikalimti ang kabahin sa Getsemani. Kon ikaw adunay mga panahon sa kalisod—ug labing seguro nga ikaw makabaton—lingkod sa makadiyot ug hunahunaa ang Getsemani. Hunahunaa ang Manluluwas ug kon unsa ang andam Niyang gibuhat alang kanimo ug kanako. Ako mosaad nga kon imo kanang buhaton, ang imong mga palas-anon matangtang, ug imong mabati ang impluwensiya ug gahom sa Ginoong si Jesukristo sa imong kinabuhi. Siya misaad sa pagtabang kanimo.”
Presidente M. Russell Ballard (1928–2023), Facebook, Mayo 3, 2023, facebook.com/mrussell.ballard.
Kita Makabangon Pag-usab
“Kini usa ka bidyo sa akong apo sa tuhod nga nagkat-on sa paglakaw. Kanato nga sa makausa nga anaa diha sa iyang kahimtang usahay mapandol ug madagma sa dili pa gayod kita makamao kon unsaon sa paglakaw.
“Apan, kadaghanan nato, kon kita madagma, ang mga mapinanggaong mga ginikanan anaa aron modasig kanato sa pagpadayon sa pagkat-on tungod kay sila gusto nga kita molambo ug mamahimong mga tawo nga sila nasayod kon kinsa kita mamahimo. Sa sama nga paagi, ang atong maluluy-on nga Amahan sa Langit nasayod nga kita mapakyas og labaw pa sa kausa.
“Ang atong mga kasaypanan ug mga pagkulang usahay makaingon sa atong pagmahay o kasakit. Kini kabahin sa atong mortal nga kasinatian—kasagaran ang mga sangpotanan sa atong mga pagpili. Apan kon kita mobalibad nga ang atong pagkulang mopawala sa atong kadasig, kini nga mga sayop mahimong usa ka talagsaong magtutudlo. Ang kapakyas sa pagsunod sa labing maayo nga bersiyon sa atong kaugalingon dili usa ka timailhan sa pagkadepektuso—kini usa ka timailhan sa pagkahimong kabahin sa tawhanong pamilya. Ang kapakyasan mao ang bugti nga kinahanglan natong ibayad aron mas mamaayo.
“Oo, makahimo kita og kasaypanan. Apan kon kita madagma, kita makabangon pag-usab, tungod kay kita nasayod nga ang Dios anaa aron sa pagtabang kanato, bisan asa ug bisan kanus-a man kana mahitabo. Siya ang atong tigtambag, atong magtutudlo, atong tig-ayo, atong kalig-on, atong Manluluwas.
“Busa, bisan asa man kamo sa kinabuhi, ayaw pag-undang. Ayaw gayod pagpakawala sa paglaom! Saligi nga, ikaw wala gayod nag-inusara. Ang Dios nagauban kaninyo. Si Jesukristo mao ang inyong kalig-on. Akong nahibaloan sa akong kinabuhi nga adunay daghang bag-ong sinugdanan, gani ang matag adlaw bag-ong mga sinugdanan. Ang ebanghelyo ni Jesukristo, ang sakripisyo ni Jesukristo, ug ang atong kaandam sa pag-adto sa dalan sa paghinulsol ug kapasayloan moabli ngadto niining bag-ong mga sinugdanan.
“Tungod sa Pag-ula ni Jesukristo, ang atong mga kasaypayan magtabang kanato nga makakat-on ug molambo ngadto sa mas maayo nga bersiyon sa atong mga kaugalingon.”
Elder Dieter F. Uchtdorf, Facebook, Peb. 27, 2023, facebook.com/dieterf.uchtdorf.
Si Jesukristo Angayan sa Atong Pagdayeg ug Mahangtoron nga Pasalamat
“Isip usa ka disipulo ni Jesukristo, ako mohatag og pagsaksi Kaniya. Siya ang akong Ginoo ug Manluluwas. Siya mibuntog sa sala ug kamatayon. Pinaagi Kaniya, matag usa kanato makahimo sa ingon.
“Mga pagbati sa pagpasalamat alang sa Manluluwas mipuno kanako karon samtang kita mikonsiderar sa Iyang sakripisyo sa duha ka espesiyal nga lokasyon. Kami mibisita sa Lubnganan sa Tanaman—usa ka karaan nga lubnganan nga ikatandi ngadto sa lokasyon diin ang lawas ni Kristo posibleng gipahiluna pagkahuman sa Iyang paglansang.
“Kami mibisita usab sa dapit nga gikonsiderar sa pipila nga ang Tanaman sa Getsemani. Samtang kami nanglakaw taliwala sa mga gatosan nga panuigon sa mga punoan sa kahoy nga oliba, kami naminaw ngadto sa mga bersikulo sa kasulatan nga naghulagway sa maligdong nga sakripisyo sa Manluluwas alang kanato diha sa tanaman ug diha sa krus.
“Ang tumang kasakit ni Jesukristo didto sa Tanaman sa Getsemani ug sa Krus angayan sa atong hingpit nga pagrespeto ug hingpit nga balaanong pagtahod. Sa samang paagi, ang maanindot nga paghitabo nga mitumaw sa ikatulo nga adlaw human sa Iyang pagpalansang sa krus angayan sa kahingangha ug sa mahangtoron nga pagpasalamat sulod sa atong mga kasingkasing ug mga hunahuna.
“Isip usa ka disipulo ni Kristo, Ako napanalanginan sa pagpahayag sa akong pagpapamatuod nga Siya buhi!
“Ang mga pulong sa himno nga ‘Siya Nabanhaw’ mosantop sa hunahuna:
“Siya Nabanhaw! Siya Nabanhaw!
“‘Sa kalipay isangyaw.
“‘Kalibotan malipayon;
“‘Nabuntog kamatayon.
“‘Kay katawhan gawasnon.
“‘Kristo ang madaugon!”
Elder Dieter F. Uchtdorf, Facebook, Abr. 23, 2023, facebook.com/dieterf.uchtdorf.
Ikonsiderar ang Simbolismo sa Pug-anan sa Lana
“Ang among bag-ohay lang nga pagbisita sa Getsemani nakapahimo kanako sa pagpamalandong sa sakripisyo sa Manluluwas alang sa matag usa kanato. Mahimong nasayod ka na nga sa Hebreohanon, ang ‘geth’ nagpasabot sa ‘pug-anan’ ug ang ‘shemen’ napasabot sa ‘lana.’ Ang Getsemani mao gayod ang lugar nga pug-anan sa lana.
“Kini nga paghulagway nahimong tinuod kaayo ngari kanako sa dihang nakabaton ako og oportunidad sa pagsaksi ug sa pagpatuyok sa karaan nga pug-anan sa oliba diha sa BYU Jerusalem Center.
“Atol sa kinabuhi sa Manluluwas, ang lana gihimo pinaagi sa pagpaligid sa usa ka dakong bato ibabaw sa mga oliba. Ang nadugmok nga mga oliba dayon dat-ogan sa bug-at nga mga kahoy aron mopagawas og lunsay nga lana. Sa pagseguro nga ang matag posible nga tulo sa lana mapuga, usa ka dakong bato ibutang dayon diha sa ibabaw sa kahoy, magdugmok sa nahabilin.
“Ikonsiderar ang simbolismo niining proseso samtang kamo maghunahuna sa kasinatian ni Jesukristo didto sa Getsemani, diin ang ‘dugo [migawas] gikan sa matag lungag sa panit’ (Mosiah 3:7) samtang ang Manluluwas miantos sa dili matukib nga paagi samtang Siya miluhod diha sa tumang pag-ampo ug mihalad sa Iyang kaugalingon nga usa ka pagtubos sa atong mga sala.
“Tungod sa hingpit nga gugma, Iyang gihatag ang tanan aron makadawat unta kita sa tanan. Ang Iyang labing halangdon nga sakripisyo magpahinumdom kanato sa malukpanon nga utang sa pagpasalamat nga atong utang sa kabubut-on alang sa Iyang balaan nga gasa.”
Elder Dieter F. Uchtdorf, Facebook, Abr. 24, 2023, facebook.com/dieterf.uchtdorf.
Dili na Kamo Kinahanglang Magpaabot
“Tingali kamo napakyas na sa pagkab-ot sa mga tumong ug mga resolusyon nga inyong gitakda alang sa bag-ong tuig. Palihog hinumdomi, kamo dili kinahanglan magpaabot pa hangtod sa Enero 1 [sa sunod tuig] aron mosulay pag-usab. Tungod ni Jesukristo, kamo makasugod pag-usab karon ug sa matag-adlaw.
“Pagkamapasalamaton ko alang sa gasa sa paghinulsol nga gihatag ngari kanato pinaagi sa Pag-ula ni Jesukristo.
“Ang han-ay nga pagkasunodsunod sa pagkadisipulo yano ug prangka: mopakita og hugot nga pagtuo diha sa Manluluwas, maghinulsol, modawat og mahinungdanon nga mga pakigsaad ug mga ordinansa, magbag-o, maningkamot nga padayong magbaton og kapasayloan sa mga sala, ug mopadayon nga magmatinud-anon diha sa dalan sa pakigsaad.”
Elder David A. Bednar, Facebook, Ene. 19, 2023, facebook.com/davida.bednar.
Tan-aw Una ngadto sa Atong Manunubos
“Ang Paghinulsol nagkinahanglan sa Manunubos. Ang pagpalayo gikan sa daotan dili makahatag og espirituhanon nga pagkaayo nga dili modangop ngadto Kaniya.
“Si Ezra Taft Benson (1899–1994), presidente sa Ang Simbahan ni Jesukristo sa mga Santos sa Ulahing mga Adlaw, nagtudlo nga ang paghinulsol tinuod nga makapausab sa kinaiya ug pamatasan, apan ang yano nga pag-usab sa mga kinaiya ug pamatasan dili paghinulsol.
“Si Presidente Benson miingon, ‘Ang hugot nga pagtuo diha ni Ginoong Jesukristo mao ang pundasyon diin ang sinsero ug makahuloganon nga paghinulsol kinahanglan matukod. Kon kita tinuod gayod nga nagtinguha sa pagsalikway sa sala, kinahanglan una kitang motan-aw ngadto Kaniya kinsa ang Tagsulat sa atong kaluwasan.’”
Elder David A. Bednar, Facebook, Sep. 8, 2023, facebook.com/davida.bednar.
“Katuyoan” ug “Kasingkasing” Konektado ngadto sa Paghinulsol
“Ang Basahon ni Mormon: Laing Tugon ni Jesukristo nagtudlo, ‘Tuo nga kamo kinahanglan gayod maghinulsol sa inyong mga sala ug mobiya [niini], ug magpaubos sa inyong mga kaugalingon sa atubangan sa Dios; ug [mohangyo] sa kinasingkasing nga siya mopasaylo kaninyo; ug karon, kon kamo motuo sa tanan niini nga mga butang tan-awa nga kamo mobuhat [niini]” (Mosiah 4:10).
“Gikan niini nga kasulatan ug sa uban pa, atong makat-onan nga ang mga pulong ‘katuyoan’ ug ‘kasingkasing’ konektado ngadto sa proseso sa paghinulsol. Samtang kita mosalig ug modangop ngadto sa Ginoo, kita kinahanglan gayod nga magmatinuoron sa atong kaugalingon. Ug kita kinahanglan adunay tinuod nga katuyoan ug magmatinuoron diha Kaniya kansang kapasayloan atong gitinguha. Tiunay nga pagkompisal ngadto sa Dios, ug kon gikinahanglan ngadto sa mga lider sa pagkapari, kinahanglan hingpit ug kompleto.”
Elder David A. Bednar, Facebook, Sep. 9, 2023, facebook.com/davida.bednar.
Kita Mamahimong Hingpit diha ni Kristo
“Atol sa among pagbisita ngadto sa Pacific Area, si Kathy ug ako migahin og panahon sa Australian nga estado sa Tasmania. Samtang anaa didto, kami mibisita sa usa ka kanhi kolonya sa silot sa Port Arthur, usa ka pinuy-anan nga gigamit nga puy-an sa mga binilanggo niadtong ika-19 nga Siglo (daghan gikan sa U.K). Karon, ang Port Arthur usa ka makasaysayanon nga dapit nga may daghang mga bisita. Ang kanhi prisohan nga luna nagpakita og gipanindotan nga mga tanaman, labong nga kalasangan, ug pipila ka dalaygon nga arkitektura.
“Nagkadaiyang mga porma sa pagsilot ug rehabilitasyon ang gisulayan sa Port Arthur nga adunay mas dako o mas minos nga kalamposan atol sa dul-an 50 ka tuig nga kasaysayan niini. Pinaagi sa pagtandi, dili ko kapugong sa paghunahuna sa walay kinutoban ug malukpanong naabtan sa Pag-ula ni Jesukristo. Ang grasya ni Kristo makapausab kanato. Uban sa Iyang tabang, makahimo kita sa pagbuntog sa bisan unsang babag o kasaypanan. Kita dili kinahanglan nga mahimong usa ka binilanggo sa kamatayon o sala—hinoon, kita mahimong mahingpit diha Kaniya.”
Elder D. Todd Christofferson, Facebook, Hunyo 11, 2023, facebook.com/dtodd.christofferson.
Ang Maulaon nga Sakripisyo ni Jesukristo Gipadangat ngadto sa Tanan
“Ako mopamatuod nga si Jesukristo buhi ug ang Iyang hingpit nga gugma, gipahayag pinaagi sa Iyang maulaong sakripisyo, gipadangat ngadto sa tanang nagtinguha sa paglakaw uban Kaniya ug sa pagtagamtam sa Iyang kalinaw niini nga kalibotan ug sa kalibotan nga moabot.”
Elder Ulisses Soares, Facebook, Abr. 8, 2023, facebook.com/soares.u.
Si Jesukristo Nagtanyag og Kahupayan sa Atong mga Palas-anon
“Kitang tanan makasinati sa mga palas-anon sa mortalidad. Kita makasinati og balatian, mawad-an sa minahal, kasubo, kasagmuyo, ug kalisdanan—apan kon atong ipahiuyon ang atong mga kasingkasing ug mga hunahuna diha ni Jesukristo, Siya mosuporta kanato. Siya motanyag og kahupayan.”
Presidente Camille N. Johnson, Facebook, Hunyo 2, 2023, facebook.com/RSGeneralPresident.
Walay Usa nga Dili Makab-ot sa Makatubos nga Gahom ni Kristo
“Usa sa akong paborito nga istorya sa kasulatan mao ang babaye diha sa atabay. Sa Juan 4:5–30, atong mabasa ang asoy kabahin ni Jesus nga naghatag sa unang narekord nga pamahayag diha sa publiko sa Iyang Pagka-Mesiyas ngadto sa usa ka Samarianhon nga babaye nga … nagpakabuhi diha sa sala. Apan si Jesus miadto sa atabay sa Samaria ug gikahinagbo kining babaye, nasayod sa tanan mahitungod kaniya, ug namahayag gihapon sa Iyang Pagka-Mesiyas ngadto kaniya, nagdapit kaniya sa pag-inom gikan sa Iyang buhi nga tubig. Kining babaye adunay usa ka personal nga kasinatian uban sa Manluluwas ug nahimong usa ka saksi Kaniya samtang siya midagan ngadto sa siyudad, nanulti sa tanan nga buot maminaw sa pagduol ug sa pagtan-aw sa Kristo, diin daghan ang mibuhat.
“Ang Manluluwas moduol usab kanato, nasayod sa tanang butang mahitungod kanato. Kita usahay maghunahuna nga kita kinahanglan gayod nga mahimong ‘takos’ aron sa pag-ampo o sa pag-angkon sa gugma sa Dios. Apan kini nga istorya nagpakita nga Siya andam sa pagduol kanato kon unsa man kita. Siya gusto nga kita makabaton og usa ka personal nga kasinatian uban Kaniya ug mobati sa Iyang gugma, tungod kay kana nga gugma gamhanan nga puwersa nga makapausab sa atong mga kasingkasing aron nga kita mas hingpit nga makabalik ngadto Kaniya. Kita mamahimong usa ka saksi sa Iyang makapausab nga gahom sa atong mga kinabuhi ug modapit sa uban sa pagduol ug sa pagtan-aw’ sa Kristo, sama sa nahitabo sa Samarianhon nga babaye.
“Sa akong hunahuna ang kasayoran nga adunay mga painting sa mga templo nga nagpakita sa istorya kabahin sa babaye diha sa atabay hilabihan ka malamdagon. Tungod sa Manluluwas ug sa Iyang Maulaon nga sakripisyo, walay usa nga dili makab-ot sa Iyang makatubos nga gahom. Kita kinahanglan dili gayod mobutang og kinutuban kon kinsa sa atong hunahuna ang Iyang maluwas o kon si kinsa ang angayan natong tabangan pinaagi sa Iyang ngalan. Sa sunod higayon nga inyong makita ang painting sa usa ka babaye diha sa atabay, hinumdumi nga tungod Kaniya, adunay paglaom alang kanatong tanan.”
Sister J. Anette Dennis, Facebook, Peb. 28, 2023, facebook.com/RS1stCounselor.
Si Jesukristo Kasagarang Naghatag og Kahupayan pinaagi sa Uban
“Matag usa kanato miagi o moagi sa malisod nga mga kasinatian sa kinabuhi. Mahimong maghunahuna kamo kon sa unsang paagi nga si Jesukristo makahatag og kahupayan diha sa inyong piho nga mga kahimtang.
“… Si Jesukristo tinuod gayod nga naghatag og kahupayan ngadto sa atong mga kalag. Ang Iyang maulaon nga sakripisyo molukop ug mokatap sa tanang bahin sa atong kinabuhi. Siya nasayod sa detalye sa tanan natong mga pagbati, mga kabalaka, mga kasubo, ug mga kalipay. Ug Siya nasayod kon unsaon gayod sa pagtabang ug sa pag-ayo.
“Ang nakanindot, Siya sa kasagaran naghatag niana nga kahupayan pinaagi sa usag-usa! Mao kana kon nganong Siya naghangyo kanato sa pag-amuma sa usag usa, sa pagbangotan uban niadto nga nagbangotan’ ug ‘sa paghupay niadto nga nagkinahanglan sa kahupayan’ (Mosiah 18:9).
“Kon kita mosulti og ‘Relief Society,’ kami nanghinaot nga inyong mabati ug makita ang Manluluwas sa ‘Kahupayan [Relief]”—tungod kay sa Relief Society atong gipunting ang usag usa ngadto sa Manluluwas, nagtanyag sa Iyang gugma, ug nagtinguha nga mahimong Iyang mga kamot diha sa paghatag sa dakong panginahanglan sa espirituhanon ug temporal nga kahupayan sa tanang mga anak sa Dios.”
Sister Kristin M. Yee, Facebook, Abr. 2, 2023, facebook.com/RS2ndCounselor.
Mas Pagatutokan ang Tigluwas Kay sa Pagluwas
“Human sa dul-an sa tulo ka henerasyon nga pagpuyo sa managlahi nga kayutaan, ang mga Nephite nahimong usa ka katawhan pag-usab. Ang katawhan ni Limhi, katawhan ni Alma, ug katawhan ni Mosiah—gani ang katawhan sa Zarahemla. Ang unang butang nga ilang gihimo sa higayon dihang sila nag-uban sa pagpundok mao ang pagpakigbahin sa ilang mga istorya sa pagkaluwas. Ilabi na, ang pagtudlo ug ang pagpamatuod sa Tigluwas Mismo, si Jesukristo. Atong makat-onan gikan niining mga asoy nga ang pagluwas dili kanunayng diha-diha dayon, apan ang kaayo sa Dios diha-diha! (tan-awa sa Mosiah 25:10)
“Ako nasayod gikan sa kasinatian nga kon ako modangop ngadto ni Jesukristo, Siya diha-diha dayon mahimong kabahin sa akong istorya. Busa, kinahanglang mas minos ang akong pagtutok kon sa unsang paagi ako giluwas gikan sa mga hagit sa atong panahon ug mas pagatutokan ang Tigluwas Mismo. Ang Dios diha-diha dayon maayo! Busa, ako dili lang makasalig sa Iyang kabubut-on apan sa Iyang tukmang panahon usab.”
Sister Amy A. Wright, Facebook, Mar. 14, 2023, facebook.com/Primary1stCounselor.
Ang Paghinulsol Mao ang usa ka Pagbalik
“Ang paghinulsol dili yano lang nga aksiyon sa paghunong gikan sa pagbuhat og butang nga sayop apan ang pag-atubang, o pagbalik, ngadto niana nga maayo, kaangayan, makaayo, ug magpahiuyon sa mga pagtulun-an ni Jesukristo.
“Ang Bible Dictionary namahayag, “Ang paghinulsol nagkahulugan nga pagpahibalik sa kasingkasing ug kabubut-on ngadto sa Dios, [ingon man usab] mobiya sa sala nga sagad natong mahimo.”
Sister Amy A. Wright, Facebook, Abr. 29, 2023, facebook.com/Primary1stCounselor.
Ang mga Tunok Mamahimong usa ka Simbolo sa Himaya sa Dios
“Nakabaton ako og maanindot nga oportunidad sa pagbiyahe uban ni Sister Becky Craven bag-ohay lang ug nakauban sa mga Santos didto sa Republic of Cabo Verde, usa ka kapupud-an ug isla nga nasod nga nahimutang taliwala sa Africa ug Portugal. Human mahimamat ang Unang Ginang sa Cabo Verde, gilakaw namo ang nataran sa palasyo sa presidente ug miabot niining maanindot kaayong mga tanaman sa mga bulak. Ang among kuyog nga taga Cabo Verde mipahibalo sa grupo nga kining tanom nailhan kaayo diha sa isla isip ang ‘Korona ni Kristo’. Pagkanindot nga simbolo. Kining tunokon nga punoan sa tanom makapahinumdom sa gilukong nga tunok nga gibutang sa ulo sa Manluluwas sa pagbiay-biay Kaniya nga misangpot ngadto sa Iyang Paglansang sa Kalbaryo. Apan sama sa tanang butang, si Jesukristo makausab sa mga tunok ngadto sa himaya. Sama sa ibabaw sa tunokon nga punoan mao ang mahimayaon nga pagpakita sa matahom baga nga pula nga bulak.
“Si Kristo nagtudlo kanato diha sa Basahon ni Mormon, ‘Ug ang akong Amahan mipadala kanako nga Ako unta ituboy nganha sa krus; ug human niana nga Ako matuboy diha sa krus, nga Ako unta makadala sa tanan nga mga tawo ngari kanako’ (3 Nephi 27:14).
“Ang Paglansang sa Manluluwas, para sa Iyang mga kaaway mao ang pagtapos sa Iyang mga pagtulun-an, sa Iyang pagpangalagad, ug sa Iyang sumusunod, mao ang kabahin sa Iyang mahangtoron nga Pag-ula. Ang dako nga bayad nga gibayran ni Jesukristo alang sa atong mga sala aron nga kita makoronahan sa kinabuhing dayon kon kita moduol ngadto Kaniya.
“Si Propeta Joseph Smith namahayag, ‘Ug karon, human sa daghan nga mga pagpamatuod nga gihatag mahitungod kaniya, kini mao ang pagpamatuod, ang kataposan sa tanan, nga kami naghatag mahitungod kaniya: Nga siya buhi!” (Doktrina ug mga Pakigsaad 76:22).
“Mga kaigsoonan, akong idugang ang akong pagpamatuod ngadto nianang pinalanggang propeta sa Dios. Nga pinaagi sa Pagkabanhaw, si Jesukristo buhi! Sa Pasko sa Pagkabanhaw ug sa matag adlaw, Siya buhi ug nagtawag kanato sa pagduol ug mahimong mabugkos ngadto Kaniya aron nga kita usab mausab. Aron ang mga tunok sa atong mga kinabuhi, pinaagi sa Iyang Pag-ula, mamahimong usa ka simbolo sa Iyang himaya.”
Sister Tracy Y. Browning, Facebook, Abr. 9, 2023, facebook.com/Primary2ndCounselor.