“Kamo Nahisakop,” Liahona, Mar. 2024.
Mga Young Adult
Kamo Nahisakop
Atong makaplagan ang atong pagbati sa pagkahisakop samtang kita makapalambo og usa ka makahuluganon nga relasyon ngadto sa Langitnong Amahan ug ni Jesukristo.
Detalye gikan sa Glory in Degrees [Himaya diha sa mga Ang-ang], ni Annie Henrie Nader
Matag usa kanato natawo nga adunay natural nga panginahanglan nga mahisakop. Kita natural nga mangindahay alang nianang pagkahisakop sa atong mga kaubanan sa atong mga pamilya, mga higala, mga katrabaho, mga ka-ward, ug sa ubang mga tawo sa atong kinabuhi. Ang atong mga kasingkasing ingon og aduna niining langitnong mga pangindahay alang sa lawom ug nagpadayon nga panginahanglan sa pagkahisakop.
Kamo ug ako kabahin—ug sa gihapon—sa usa ka mahangtoron nga pamilya uban sa Langitnong Amahan, sa wala pa kita moanhi sa yuta. Ang mga kasulatan naghulagway kanato isip “mga dumuduong ug mga magpapanaw sa yuta” (Mga Hebreo 11:13; Doktrina ug mga Pakigsaad 45:13). Sa pagbiya sa atong langitnong panimalay ug sa pag-anhi sa kalibotan nga puno sa kalibog, pag-inusara, ug kasakit, kita makabati nga nahisama sa magpapanaw, nangindahay alang sa atong mahangtoron nga panimalay ug mga relasyon.
Kon kamo mibati sukad og diyutay nga kamingaw sa langit tingali gumikan kini kay ang atong tinuod nga panimalay ug pagkatawo nabugkos ngadto sa atong Langitnong Amahan ug sa Manluluwas, si Jesukristo. Mao kana nganong importante kaayo ang makabaton og usa ka lawom nga koneksiyon uban Kanila. Kon kita makonektado ngadto Kanila pinaagi sa atong mga relasyon sa pakigsaad, kita makakaplag og tinuod nga pagbati sa pagkahisakop nga gipangandoy sa atong mga espiritu.
Ang Atong Relasyon sa Pakigsaad sa Dios
Ang atong mga buhat ug ang atong mga hunahuna magpakita sa mga relasyon nga atong gihatagan og bili. Tinuod gihapon kana sa atong relasyon sa pakigsaad ngadto sa atong Langitnong Amahan ug sa Manluluwas.
Kon kita mohatag og bili sa atong relasyon sa pagkigsaad ngadto sa Dios, ang tanang butang mausab. Imbis magpaimpluwensya sa kalibotan, kita mamahimong maimpluwensya Kaniya ug mas mahimong sama Kaniya. Ang atong mga kinabuhi magsugod sa pagdawat og mas makahuluganon ug espirituhanon nga kalig-on ug gahom. Sa kalit lang ang “pagkahisakop” molapas pa sa mortal nga mga gingharian sa unsay atong gihunahuna nga kahulogan sa “pagkahisakop”.
Kon kana nga relasyon sa pakigsaad uban sa Dios mag-una, ang kalibotanong mga pagbalda mawad-an na sa ilang impluwensya ug kita makakaplag og tinuod nga personal nga kalinaw ug pagkahisakop. Sa usa ka kalibotan nga sa kasagaran wala maghatag og mga butang nga libre, ang atong Langitnong Amahan mahigugmaong naghatag sa Iyang mga panalangin sa pakigsaad dili igsapayan sa atong mga estado niining kalibotan (tan-awa sa 2 Nephi 9:50–51).
Si Presidente Russell M. Nelson maanindot kaayong mitudlo nga “sa higayon kita mohimo og usa ka pakigsaad uban sa Dios, kita mobiya na sa nyutral nga kahimtang hangtod sa kahangtoran. Ang Dios dili mobiya sa Iyang relasyon niadtong kinsa mimugna sa ingon nga bugkos uban Kaniya. Sa pagkatinuod, ang tanan niadtong kinsa mihimo og usa ka pakigsaad sa Dios adunay agianan ngadto sa usa ka espesyal nga matang sa gugma ug kaluoy.”1
Kita motino kon kita adunay suod nga relasyon sa Dios—Siya sa kanunay makanunayon ngari kanato, apan kita kinahanglan gayod nga mopili nga magmakanunayon ngadto Kaniya. Ug kana nga balaan nga pagpili makapagahom ug makapagawasnon! Kini nga pagpili mopagawasnon kanato gikan sa dili tinuod nga panglantaw kon si kinsa kita ug gikan sa makapugong nga mga kadena sa kalibotanong mga gilaoman.
Ug kon kita makakaplag niana nga pagkahisakop uban sa atong Langitnong Amahan, kita dayon makapanglantaw ug makatan-aw sa uban sama sa Iyang pagtan-aw. Sa dihang ako nakasabot kon unsa ang Iyang gibati mahitungod kanako, akong mas nasabtan kon unsa ang Iyang gibati mahitungod kaninyo, ug ang akong abilidad ug tinguha sa pagtabang ug pagpundok sa uban nahimong mas lig-on.
Paghulagway sa Nauvoo Temple sa pagsawop sa adlaw, pinaagi ni Max D. Weaver
Ang mga Pakigsaad Mibukas sa mga Panalangin
Ang Langitnong Amahan ug si Jesukristo nagtinguha nga kita mohimo og mga pakigsaad ngadto Kanila aron nga Sila makapanalangin kanato sa mga paagi nga atong gikinahanglan ug mousab kanato sa mga paagi nga motugot kanato sa pagbalik ngadto sa Ilang presensiya.
Ako modapit kaninyo nga kanunayon ang pag-adto sa balay sa Ginoo kutob sa mahimo. Kon ako mopasalig sa pag-adto kanunay ug tinuyo, ako makadawat og kahupayan gikan sa kalibotan, ug ang akong mga hunahuna ug kinaiyahan mabayaw.
Pinaagi sa pagtuman sa atong mga pakigsaad, kita makadawat og gahom sa pagkapari nga moabli sa mga panalangin sa Pag-ula sa Manluluwas diha sa atong mga kinabuhi. Kadto nga mga panalangin naglakip sa pagkaayo, giya, panalipod, tabang, kalig-on, kalinaw, panglantaw, ug hingpit nga kalipay. Ang Langitnong Amahan nagtinguha sa pagpanalangin kanato sa tanan niini nga mga butang pinaagi sa atong relasyon sa pagkigsaad.
Kon kamo wala pa makadawat sa mga panalangin sa templo, Ako modapit kaninyo sa pagtuon sa mga panalangin sa templo, gahom sa pagkapari, mga pakigsaad, ug unsa ang gitinguha sa Dios alang kaninyo. Ayaw paghulat nga makadawat sa Iyang kahupayan, gahom, ug mahigugmaon nga tabang.
Si Presidente Nelson miingon:
“Ako moawhag kaninyo nga dili magpaabot nga maminyo una pa matugahan diha sa balay sa Ginoo. Sugdi karon ang pagkat-on ug pagsinati unsay gipasabot nga masangkapan sa gahom sa pagkapari.
“Sa matag usa kaninyo kinsa nakahimo og mga pakigsaad sa templo, ako mangamuyo kaninyo sa pagtinguha—sa mainampoon ug sa kanunay—sa pagsabot sa mga pakigsaad ug mga ordinansa sa templo. Espirituhanon nga mga pultahan moabli. Kamo makat-on unsaon sa pag-abli sa tabil tali sa langit ug yuta, unsaon sa paghangyo nga ang mga anghel sa Dios motabang kaninyo, ug unsaon nga mas makadawat og direksyon gikan sa langit. Ang inyong makugihon nga mga paningkamot sa pagbuhat sa ingon mosuporta ug mopalig-on sa inyong espirituwal nga pundasyon.”2
Pagkahisakop pinaagi sa Paghinulsol
Ang makanunayon nga paghinulsol mao ang laing matahom ug gamhanan nga paagi sa pagpabilin nga suod ngadto sa Langitnong Amahan ug ni Jesukristo. Kasagaran kita masipyat sa pagtuo nga kon kita naghinulsol og kadaghan, nan kita nalayo gayod gikan Kanila. Apan ang sukwahi mao ang tinuod!
Ang Paghinulsol wala magbutang kaninyo nga mas mahilayo gikan kanila—kini nagdala kaninyo nga mas masuod ngadto Kanila!
Kamo makakaplag og mas dakong pagkahisakop ug mas lawom nga relasyon ngadto kanila pinaagi sa inyong mga paningkamot sa pagbalik ngadto Kanila alang sa tabang ug sa pagdawat og kapasayloan.
Ang matag usa kanato mahimong mobati nga mas layo sa kahingpitan kay sa atong gusto, apan ako wala maghunahuna nga ang Langitnong Amahan nabalaka niana sama sa Iyang pagtagad sa atong tinguha ug mga paningkamot sa pagsulay pag-usab. Siya nahigugma kanato. Siya nakahibalo kon asa kita padulong, ug Siya mahigugmaong mogiya kanato.
Ang pag-ila sa atong mga kahuyang ug mga kasaypanan nagkinahanglan nga sensitibo, apan pinaagi sa paghinulsol, atong dapiton ang Langitnong Amahan nga mapaduol nianang sensitibo nga bahin kanato. Kana nga kaduol nagtugot Kaniya sa pagtuyhad sa Iyang talagsaong gugma ngari kanato ug mohatag sa pagkaayo, kapasayloan, ug kahilwasan nga atong gikinahanglan. Dinhi niining koneksiyon ngadto sa Dios nga kita makapalambo og pagsalig ug makakaplag og pag-awhag ug tinuod nga pagkahisakop.
The Creation [Ang Paglalang], ni Annie Henie Nader
Pagtinguha og Mas Taas nga Panglantaw
Ang atong panglantaw makatampo sa atong pagbati sa pagkahisakop diha sa Simbahan sa Ginoo. Kita makapili sa panglantaw nga ang atong kaugalingong buhat makatabang sa atong ward, sa atong Relief Society, o sa atong korum sa mga elder nga mamahimong usa ka mahigugmaon nga dapit nga ginsakopan. Ang pagtinguha sa pagtabang sa uban nga mahisakop sa pagkatinuod nagpadako sa atong kaugalingong pagsabot sa pagkahisakop.
Tungod kay kamo mga anak sa Dios, kamo nahisakop—dili igsapayan kon sa unsang paagi ang uban mosabot kaninyo o kon sa unsang paagi kamo mosabot sa inyong kaugalingon. Ang plano sa Amahan sa kalipay gituyo alang kaninyo, ug kamo adunay usa ka importante nga papel diha niini. Matag usa kaninyo adunay kapasidad sa talagsaong pagtampo ug nahisakop sa gingharian sa Dios, bisan unsa pa ang inyong estado sa kaminyoon, edukasyon, o kaagi.
Usa ka hunahuna nga nagbalik-balik og santop sa akong hunahuna mao nga ang mga termino nga “mga young single adult” “mga young adult,” ug “mga single adult” dili kinsa gayod kamo. Kini mga demograpiko nga mga termino nga makatabang sa paghulagway sa edad ug sa estado sa kaminyoon, apan kini dili igo nga tighulagway sa tinuod nga mahangtorong pagkatawo, katuyoan, ug kapasidad.
Ang mga paghingalan o mga pagtandi makahatag og limitasyon kon giunsa nato pagtan-aw ang atong mga kaugalingon ug sa atong tinuod nga bili ug potensiyal diha sa gingharian sa Dios. Sa pagkatinuod kamo mga miyembro sa Ang Simbahan ni Jesukristo sa mga Santos sa Ulahing mga Adlaw. Kamo nakahimo og mga pakigsaad ngadto sa Dios. Kamo makagamit sa gahom sa Iyang pagkapari. Kamo ang mga miyembro sa Relief Society o sa korum sa mga elder. Sama sa gitudlo ni Presidente Nelson, kamo mao, ang anak sa Dios, usa ka anak sa pakigsaad, ug usa ka disipulo ni Jesukristo. Mao kana kon kinsa gayod kamo una ug labaw sa tanan, ug kana ang “mogiya kaninyo ngadto sa kinabuhing dayon diha sa celestial nga gingharian sa Dios.”3
Ang ebanghelyo gipahiuli pinaagi sa usa ka nagpangidaron sa usa ka young adult–nga propeta—si Joseph Smith. Kana mao ang gamhanang hunahuna nga pamalandongan. Ang Langitnong Amahan ug si Jesukristo mipiyal sa Propeta ug sa iyang mga kauban nianang pangidarona aron sa pagpahiuli sa Simbahan. Ang Dios usab misalig kaninyo nga mahimong usa ka bahin niining talagsaong buhat niining ulahi nga mga adlaw.
Kon kamo gustong makahibalo kon kinsa kamo, ug kon kamo gihigugma ba ug gihatagan og bili, pangutan-a ang inyong Amahan sa Langit. Siya kanunayng mosulti kaninyo sa kamatuoran mahitungod kaninyo. Siya motabang kaninyo nga makita ang inyong kaugalingon sama sa Iyang pagtan-aw kaninyo—uban sa hilabihan ka dako nga kapasidad ug gugma. Siya makagiya kaninyo ngadto sa dagkong oportunidad ug kalamboan nga talagsa ra ninyong mahunahuna!
Hinaot nga kitang tanan adunay mata nga makatan-aw sa usag usa ug sa atong kaugalingon, dili pinaagi sa pagtan-aw sa edad o estado sa kaminyoon apan pinaagi sa makapahiusa nga mga panan-aw sa tigtuman sa pakigsaad, isig ka disipulo ni Jesukristo, ug mga anak nga mga lalaki ug anak nga mga babaye sa Dios. Ug niadtong mahangtoron nga mga katungdanan ug mga relasyon, kita makakaplag sa kinatas-an ug labing tinuod nga pagbati sa pagkahisakop.