Digital Lamang: Mga Young Adult
Mahimo Ba Akong Mahisakop sa Panimalay Kon ang Akong Pamilya Dili Modawat sa Ebanghelyo?
Unsaon man nako nga mahisakop sa usa ka pamilya nga batok sa Simbahan?
Nasayod ko kon sama sa unsa kini nga pagbati nga adunay mga sakop sa pamilya nga adunay negatibo nga mga pagtan-aw sa ebanghelyo ni Jesukristo. Mabati kini nga ikaw nag-inusara. Tensiyonado. Makaugtas. Makapahunahuna kini kanimo kon ikaw gihigugma ba.
Kadaghanan sa akong pamilya dili motuo sa ebanghelyo, ug usa ka igsoon nga lalaki dayag nga namulong batok niini. Bisan og naningkamot ko nga mobati nga ingon og nahisakop ko sa akong kaugalingong panimalay, nakakaplag gihapon ko og hingpit nga kalipay diha sa plano sa Langitnong Amahan alang sa pamilya.
Ania ang pipila sa mga butang nga akong nakat-onan.
Ayaw: Ipalahi ang Kaugalingon gikan sa Uban
Sa sinugdanan, nagtuo ko nga ang paagi lamang nga makalikay sa lisod nga mga pagbati nga wala nahisakop mao ang dili na pagpakigdait sa pamilya nga akong gihigugma.
DILI TINUOD.
Ang Langitnong Amahan mipahinumdom kanako nga ang pamilya mahinungdanon ngadto sa Iyang plano. Gusto Siya nga ako mopadayon sa paghigugma kanila. Bisan pa niana, dili Siya gusto nga magpabilin kita kon ang atong mga kahimtang mahimong abusado.
Apan ang pagpabiling suod mahimong lisod uban sa daghan kaayong emosyon nga nalambigit.
Hinuon: Higugmaa
Usahay mobati kita nga ingon og usa ka sinalikway taliwala niadtong kinsa negatibo sa unsay atong gituohan.
Ang adlaw nga ang akong igsoon nga lalaki misulti kanako nga nasilag siya nako tungod kay nagtuo ko sa ebanghelyo mao ang usa sa akong kinalisoran nga mga adlaw. Mahimong kita adunay mga sakop sa pamilya kinsa dili makahigugma kanato. Apan makakuha kita og kahupayan sa mga pulong ni Pedro nga “Bulahan kamo kon gipakaulawan kamo tungod sa inyong pagsunod kang Kristo kay kini nagpasabot lamang nga ang mahimayaong Espiritu, ang Espiritu sa Dios, anaa kaninyo” (1 Pedro 4:14).
Ang Manluluwas mihangyo kanato nga mopili nga mohigugma (tan-awa sa Juan 15:17), bisan “kon nasilag kaninyo ang kalibotan … [tungod] kamo dili na iya sa kalibotan” (Juan 15:18–19). Ang pagtutok sa paghigugma niini nga mga sakop sa pamilya makapamenos sa mga pagbati sa pag-inusara.
Mahimong makatintal nga moundang na, apan hinumdomi nga ang pailob ug pagsalig sa Dios makausab og mga relasyon. Makabuhat Siya og mga milagro pinaagi kaninyo.
Milungtad kini og taas nga panahon, apan samtang misalig ko sa Dios ug mapailobong mipakita og gugma sa akong igsoong lalaki, nagsugod nga nabuntog niya ang iyang mga pagbati sa kasilag sa Simbahan. Ang among relasyon dili hingpit, apan ang akong mga pag-ampo natubag usa ka lakang matag higayon samtang gihatagan nako og unang prayoridad ang gugma.
Hinuon: Mahimong usa ka Tigpasiugda og Kalinaw
Bisan og dili nato gusto nga ipalayo ang atong mga pamilya, kinahanglan kitang mobiya atol sa mga timaan sa panagbingkil. Kon matapos na ang panagbingkil, mahimo kitang mosulay pag-usab. Si Kristo kasagaran mitubag sa panagbingkil gamit ang kahilom (tan-awa sa Mosiah 14:7). Apan, sama sa gitudlo ni Elder Robert D. Hales (1932–2017) sa Korum sa Napulog Duha ka Apostoles, “Ang pagtubag sa paagi nga sama kang Kristo dili kahimoan og tamdanan o pinasikad sa usa ka pormula. Ang Manluluwas mitubag sa lahing paagi sa matag sitwasyon.”1 Mao nga, sunda ang giya sa Espiritu.
Ang pagpabiling hilom sama sa Manluluwas magpakita sa inyong kaandam nga maminaw. Mahimo ninyong sulayan sa pagsabot ang panglantaw sa uban samtang magpabiling matinud-anon ngadto sa inyong mga sumbanan.
Human sa pagpaminaw, sulayi sa paghulagway ang pipila sa imong mga pagbati. Sa dihang gisultihan nako ang akong pamilya nga ang mga butang nga ilang gisulti nakapasagmuyo kanako, mitubag sila uban ang gugma. Gihisgotan namo kon unsaon nga mas maayong motahod sa usag usa ug likayan ang panagbingkil sa umaabot.
Sama sa gisulti ni Elder Walter F. González sa dihang siya usa ka sakop sa Seventy, “Ang mahigugmaon ug hapsay nga komunikasyon dako og mahimo sa paghupay sa mga tensyon nga mahimong motumaw.”2
Ayaw: Pagbiya sa Simbahan
Tingali mobati kamo nga ang bugtong nga paagi nga mahisakop sa inyong pamilya mao ang pagbiya sa Simbahan.
DILI TINUOD.
Hinuon: Pagpakita og Hugot nga Pagtuo
Pipila sa mga tawo kinsa wala mouyon sa ebanghelyo seguro mosulay nga mohimo kaninyo nga mobati nga sad-an alang sa pagtuo. Sa dihang ang akong igsoon nga lalaki mibiya sa Simbahan, ang among pamilya mibati nga ingon og naghangyo siya kanamo nga mopili tali niya ug sa Simbahan. Kadaghanan sa akong pamilya mipili kaniya ug sa ingon mibiya usab.
Bisan pa niini nga pagpamugos, nakat-on kong mosulti, “Apan wala ko kini ikaulaw kay nakaila ako sa akong gisaligan” (2 Timoteo 1:12).
Nasayod ko kon kinsa ang Dios, ug mipili ko sa pagsalig Kaniya. Kana nga hugot nga pagtuo nakatabang sa paglig-on kanako.
Hinuon: Pangita og Mga Igsoon nga Lalaki ug Mga Igsoon nga Babaye diha ni Kristo
Sama sa gisulti ni Elder Dieter F. Uchtdorf sa Korum sa Napulog Duha ka Apostoles, “Sa Simbahan ni Jesukristo, kamo makakita og pamilya sa mga tawo nga dili kaayo lahi gikan ninyo.”3
Ang inyong mga igsoon nga lalaki ug mga igsoon nga babaye diha ni Kristo nakasabot sa inyong gugma sa ebanghelyo ug makaawhag kaninyo nga mas magpaduol ngadto Kaniya. Makahatag sila kaninyo sa pagkanahisakop nga inyong gitinguha.
Buhata: Salig sa Langitnong Amahan ug ni Jesukristo
Si Elder González mitudlo usab: “Bisan gani ang Manluluwas adunay mga miyembro sa pamilya nga dili parehas sa Iyang mga gituohan. Sa Biblia atong mabasa, ‘Kay bisan gani ang iyang mga igsoon wala motuo kaniya’ (Juan 7:5).”4
Hingpit nga nakasabot si Jesukristo sa inyong mga pagpakigbisog. Dangop Kaniya alang sa pag-alim. Sa Isangyaw ang Akong Ebanghelyo, si Elder Dale G. Renlund sa Korum sa Napulog Duha ka Apostoles misaad nga “ang tanan nga dili makiangayon kabahin sa kinabuhi mahimong mapahusto pinaagi sa Pag-ula ni Jesukristo.”5 Bisan pa man sa atong mga tinguha nga mahisakop, ang tinuod mao nga kasagaran dili kita mobagay sa uban kon kita mga sumusunod sa Dios. Gitawag kita Niya nga Iyang pinili nga katawhan alang sa usa ka rason (tan-awa sa 1 Pedro 2:9; Deuteronomio 14:2). Apan tungod sa atong relasyon sa pakigsaad ngadto Kaniya, kanunay kitang mahisakop ngadto Kaniya. Ug kana mao ang mahinungdanon gayod.