Digital Lamang: Mga Young Adult
Ikaw Lamang ba ang Miyembro sa Simbahan sa Imong Pamilya? Wala Ka Mag-inusara
Tingali malisod kon ikaw lang ang miyembro sa Simbahan sa imong pamilya. Kini nga mga young adult nagtanyag og tambag sa pagpabiling lig-on diha sa imong hugot nga pagtuo bisan pa sa oposisyon.
Pipila ka mga butang niini nga kinabuhi labaw pa ka sakit kay sa motuo sa usa ka butang sa hilabihan gayod ug dayon kadtong imong pinakaminahal sa kalibotan mosalikway o gani mobiay-biay niana nga mga pagtuo. Ang ebanghelyo ni Jesukristo nagdala og kalipay ug katagbawan sa daghang paagi. Hinoon, ang dalan sa pagkadisipulo usahay mamingaw, kon ikaw mohimo og mga lakang sa pag-uswag diha sa ebanghelyo apan ang usa ka higala, ginikanan, o bisan gani kapikas dili mosuporta o moambit sa imong hugot nga pagtuo.
Bisan unsa pa ang imong talagsaong sitwasyon, ikaw kanunay nga makalaom alang sa imong kaugalingon ug alang sa imong pamilya tungod sa Manluluwas nga si Jesukristo. Kon ikaw nawad-an og umoy o nawad-an og kadasig mahitungod sa imong sitwasyon, hinumdumi nga “ang Manluluwas gusto nga mopahiuli sa dili ninyo mapahiuli; gusto Siya nga moayo sa mga samad nga dili ninyo maayo; mobayad Siya sa bisan unsay dili patas nga gipahamtang kaninyo; ug gusto Siya nga permanente ang pagkaayo gani sa gisakitan nga mga kasingkasing.”1
Bisan og ikaw lamang ang miyembro sa Simbahan sa inyong pamilya o ikaw adunay usa ka minahal kinsa mibiya sa Simbahan, ang tambag nga gipakigbahin dinhi sa ubang mga young adult makahatag kanimo og kalig-on ug paglaom nga mopadayon sa unahan.
Unaha ang Ginoo
“Nagtuo ko nga sa dihang ako nabunyagan unom ka tuig nang milabay, ang akong mga ginikanan mahimong interesado sa ebanghelyo ug mouyon nga magpabunyag, apan wala kana mahitabo. Usa ka adlaw nabasa nako ang kasulatan, ‘Ang mahigugma sa iyang amahan o inahan labaw pa kanako, dili takus kanako; ug ang mahigugma sa iyang anak nga lalaki o anak nga babaye labaw pa kanako, dili takus kanako’ (Mateo 10:37). Akong gimahal ang akong mga ginikanan, busa naghunahuna ko kon sa unsang paagi ako makahigugma sa Ginoo labaw pa kay kanila.
“Akong mga ginikanan dili batok sa akong pagpasakop sa Simbahan, apan usahay dili maayo ang ilang pagbati kon ako mogahin og mas daghang panahon sa pagbasa sa mga kasulatan o motambong sa simbahan imbis nga mobuhat sa mga butang uban kanila sa adlaw nga Igpapahulay. Ug lisod ang pagpasabot nganong ako dili na mohimo og pihong mga butang panahon sa Domingo.
“Kami adunay gamay nga panagbangi, apan sa pagsige nako og basa sa mga kasulatan ug sa paglambo sa akong kahibalo kabahin sa Manluluwas ug sa akong Langitnong Amahan, mas midako ang akong gugma alang sa akong pamilya. Ug ako nasayod nga kon ako mosunod kang Jesukristo, ang akong pamilya mapanalanginan. Mihukom ko sa pagbutang Kaniya labaw pa sa tanan nga mga butang. Dili kinahanglang isulti pa, ang relasyon tali kanako ug sa akong pamilya padayon nga nagkamaayo. Nasayod ko nga kon ako magmasulundon ngadto sa Ginoo, Siya mopadayon sa pagpanalangin sa akong pamilya ug kanako.”
—Magaly Perez, Coahuila, Mexico
Pagmatinahuron sa Usag usa
“Ang akong pamilya mitudlo kanako nga magmatinahuron sa usag usa. Bisan kon kami wala nagtuo sa samang mga butang, sila nagtudlo kanako og daghan ug nagtabang nako nga mahimong mas mahisama sa Manluluwas. Sa una kanunay ko nga maguol nga tingali dili nako makauban si papa hangtod sa kahangtoran, apan nasayod ko nga ang Dios nahigugma sa akong pamilya.”
—Anicée Dufour, Provence-Alpes-Côte d‘Azur, France
Mapailubon nga Motabang Kanila nga Makasabot
“Naningkamot ko nga mahimong mas manggihunahunaon kon ako motubag sa mga pangutana ug mga kabalaka sa mga miyembro sa akong pamilya mahitungod sa ebanghelyo. Dugay gayod kini kaayo, apan sa kataposan nakatabang ko nila nga makakita lapas sa sayop nga panabot nga ilang gituohan ug nakatabang kanila nga makaamgo nga naningkamot lang ko nga mahimong labing maayo nga tawo kutob sa akong mahimo.”
—Brian Steven King, North Carolina, USA
Pagkinabuhi ingon nga Panig-ingnan
“Pagpabilin nga Lig-on. Inyong mabayaw ug madasig ang mga tawo nga naglibot kaninyo labaw pa kaysa inyong mahunahuna.”
—Leanna Mohlman, Utah, USA
Hibaloi nga Wala Ka Mag-inusara
“Matag usa kanato adunay lain-laing istorya sa pagkakabig. Ug bisan tuod ang atong mga kahimtang sa pamilya mahimong mahagiton, samtang kita magpadayon sa pagsunod sa mga pulong sa Dios, Siya mogiya kanato sa matag adlaw. Nakaamgo ko nga kon ako mobarog uban sa Dios, ako dili gayod magbarog nga mag-inusara. Ug kana nakatabang kanako nga magpadayon sa pag-uswag diha sa saktong dalan. Kini labaw pa ka bililhon kay sa bisan unsa.”
—Caloy Casuyon, Negros Occidental, Philippines
Tutoki ang Inyong Kaugalingong Mahangturong mga Tumong
“Ang akong mga ginikanan walay suporta sa akong pagtuo. Apan nagpadayon ko sa pag-angkon og paglaom nga kon ako makanunayon ug usa ka maayo nga ehemplo, ang ilang mga kasingkasing mohumok. Nasayod ko nga ang akong pamilya importante, apan ako kanunay nagpabilin nga naglantaw sa akong kaugalingong mahangturong mga tumong ug sa akong kaugalingong panaw sa mortalidad.”
—Kayla Gonzales, Texas, USA
Hinumdumi Nga si Kristo Nasayod kon Unsay Inyong Gibati
“Akong papa ug ako mao lamang ang aktibo nga miyembro sa among pamilya. Unsay nakahatag nako og paglaom mao ang pagkasayod nga si Kristo usab mibati nga nag-inusara usahay. Ug bisan tuod ang akong pamilya ug ako lahi-lahi og paagi sa pagpili ug magkalahi og ganahan nga mga butang, yano ra ang gugma tali kanamo.”
—Merania Stanley, New South Wales, Australia
Palamboa ang Inyong Relasyon ngadto sa Langitnong Amahan
“Kon ang inyong pamilya dili mosuporta kaninyo o masinupakon sa inyong pagtuo, sa akong hunahuna importante ang pagbuhat og mga butang nga makapalambo sa inyong personal nga relasyon ngadto sa Langitnong Amahan. Imbis nga agnihon ang mga sakop sa inyong pamilya ngadto sa ebanghelyo o sa inyong pangisip, tutoki ang pagkahimong pinakamaayo sa imong kaugalingon ug paglambo sa espirituhanong paagi, ug pagmapailubon. Pagmalig-on sa inyong mga desisyon ug isipa kini nga kabahin sa inyong mahangturong pag-uswag. Mga kasingkasing sa mga tawo mausab kon sila makakita sa unsay nahimo sa ebanghelyo ni Jesukristo alang ninyo ug kon giunsa ninyo sa pagpakabuhi.”
—Romana Morris, St. Philip, Barbados
Pilia ang Pagpadayon sa Unahan uban ni Kristo
“Alang nako, nasayod ko nga kon akong gibuhat unsay angay nakong buhaton ug magpakahayag sa mga kinabuhi sa uban, ang tanan mamaayo ra. Wala ko mabalaka mahitungod sa dalan nga gipili sa akong pamilya. Dili ako makakontrolar sa ilang mga desisyon, apan ako makontrolar sa akoa. Ug akong gipili nga mopadayon sa pag-uswag uban ni Kristo, bisan kon dili sila.
“Ang Dios moatiman kanatong tanan, miyembro man kita sa Iyang Simbahan o dili. Ako nag-ampo alang sa akong pamilya, akong gisulat ang ilang mga ngalan sa listahanan sa mga ngalan alang sa pag-ampo [prayer roll] sa templo, ug ako nag-alagad kanila. Mapasalamaton ko sa mga kalainan sa among panglantaw ug sa unsay ilang gitudlo kanako. Ug mapasalamaton gayod ko nga anaa sila sa akong kinabuhi, bisan unsa pa ang among mga kalainan.”
—Megan Johnson, Utah, USA
Ang Ginoo Mogiya Kaninyo
Bisan og lisod usahay kon ang kahimtang sa inyong pamilya diha sa ebanghelyo dili maoy imong gilaoman nga mahitabo, makapadayon kamo uban sa hingpit nga kalipay ug hugot nga pagtuo nasayod nga ang Ginoo sa kanunay mosuporta kaninyo sa inyong mga panlimbasog. Ug dili lang kana, apan makagiya usab Siya kaninyo unsaon sa pagpakita og gugma, pagpakita og pagsabot, ug pagtanyag og kalooy ngadto sa inyong mga minahal kinsa wala mouyon o lahi og pagtuo.
Si Elder Quentin L. Cook sa Kurom sa Napulog Duha ka mga Apostoles misaad nga “samtang atong ipunting ang atong gugma diha sa Manluluwas ug sa Iyang Pag-ula, maghimo Kaniya nga sentro sa atong mga paningkamot sa pagpundok sa Israel sa duha ka bahin sa tabil, mangalagad sa uban, ug sa indibidwal nga paagi mangandam sa pagsugat sa Dios, ang impluwensya sa kaaway mokunhod ug ang hingpit nga kalipay, kahimuot, ug kalinaw sa ebanghelyo mopadako sa atong mga panimalay uban sa Kristohanong gugma.”2
Hinumdumi kanunay nga wala gayud kamo mag-inusara. Makabaton kamo og makahuluganong mga relasyon uban sa inyong mga sakop sa pamilya, ug kanunay kamong makapili nga mahimong ehemplo sa unsay inyong gituohan, bisan kon wala sila motuo niana. Ug labaw sa tanan, hinumdumi nga ang Manluluwas nakasabot sa unsay inyong gibati. Dangup ngadto Kaniya, ug Siya kanunay nga andam sa pagdala kaninyo og kalinaw, paglaom, ug giya sa inyong mga kahimtang.